ନୂଆଦିଲ୍ଲୀ (ବାଘୁଆବାର୍ତ୍ତା): ବାବା ରାମଦେବଙ୍କ ବିରୋଧରେ ହେଉ ମୋକଦ୍ଦମା । ଇଣ୍ଡିଆନ ମେଡିକାଲ ଆଶୋସିଏସନ ବା ଆଇଏମଏ ପ୍ରଧାନମନ୍ତ୍ରୀଙ୍କୁ ଚିଠି ଲେଖି ଏହି ଦାବି ଜଣାଇଛନ୍ତି । ଯୋଗଗୁରୁ ବାବା ରାମଦେବଙ୍କ ବିରୁଦ୍ଧରେ ଦେଶଦ୍ରୋହ ମୋକଦ୍ଦମା କରାଯାଉ ବୋଲି ଚିଠିରେ ଉଲ୍ଲେଖ ରହିଛି । ଦେଶରେ ଏଲୋପାଥି ଡାକ୍ତରଙ୍କ ବିରୋଧରେ ବିବାଦୀୟ ମନ୍ତବ୍ୟ ଦେଇଥିଲେ ରାମଦେବ ବାବା । ରାମଦେବ ବାବା ନିଜର ଗୋଟିଏ ବାର୍ତ୍ତାରେ କହିଥିଲେ ଯେ ଅନେକ ଡାକ୍ତର ଦେଶରେ ଭ୍ୟାକ୍ସିନ ନେବା ପରେ ମଧ୍ୟ ମୃତ୍ୟୁବରଣ କରିଛନ୍ତି ଓ ସେ ଏଲୋପାଥି ଚିକିତ୍ସା ବିଷୟରେ ମଧ୍ୟ ପ୍ରଶ୍ନବାଚୀ ସୃଷ୍ଟି କରିଥିଲେ । ସରକାରଙ୍କ କରୋନା ଚିକିତ୍ସାରେ ପ୍ରୋଟୋକଲକୁ ଉଲ୍ଲଘଂନ କରିଥିବା ଅଭିଯୋଗରେ ବାବା ରାମଦେବଙ୍କ ବିରୋଧରେ ମାମଲା ରୁଜୁ କରାଯାଉ ବୋଲି ଆଇଏମଏ ନିଜ ପତ୍ରରେ ଲେଖିଛନ୍ତି । ମେଡିକାଲ ଆଶୋସିଏସନ ପକ୍ଷରୁ ବାବା ରାମଦେବଙ୍କ ବିରୋଧରେ ମାନହାନି ମୋକଦ୍ଦମା ରୁଜୁ କରାଯିବା ସହ ୧୫ ଦିନରେ କ୍ଷମା ମାଗନ୍ତୁ ବାବା ବୋଲି ନୋଟିସରେ ଉଲ୍ଲେଖ କରାଯାଇଛି । ତା ସହ ୧୦୦୦ କୋଟିର କ୍ଷତିପୂରଣ ମଧ୍ୟ ପତଞ୍ଜଳୀ କମ୍ପାନୀ ତରଫରୁ ଦିଆଯାଉ ବୋଲି ଆଶୋସିଏସନ ତରଫରୁ କୁହାଯାଇଛି । କରୋନା ସମୟରେ ବାବାଙ୍କ ଅନେକ ବୟାନ ଚର୍ଚ୍ଚାର ପରିସରକୁ ଆସିଥିଲା । ବାବା ରାମଦେବଙ୍କ କମ୍ପାନୀ ତରଫରୁ ତିଆରି ହୋଇଥିବା କରୋନିଲ ଔଷଧର ଶୁଭାରମ୍ଭ ଦିନ ଦେଶରେ ସ୍ୱାସ୍ଥ୍ୟମନ୍ତ୍ରୀ ଡ.ହର୍ଷବର୍ଦ୍ଧନ ଯୋଗା ଦେବାକୁ ନେଇ ମଧ୍ୟ ଚର୍ଚ୍ଚା ସାମନାକୁ ଆସିଥିଲା ।
