ନୂଆଦିଲ୍ଲୀ, (ବାଘୁଆବାର୍ତ୍ତା): ସୁପ୍ରିମକୋର୍ଟର ପ୍ରଧାନ ବିଚାରପତିଙ୍କ ସମେତ ଅନ୍ୟ ବିଚାରପତିଙ୍କୁ ଚିଠି ଲେଖିଲେ ସିବିଏସଇ ଦ୍ୱାଦଶ ଶ୍ରେଣୀ ଛାତ୍ରଛାତ୍ରୀ । ପ୍ରାୟ ୩୦୦ ଛାତ୍ରଛାତ୍ରୀ ପ୍ରଧାନ ବିଚାରପତି ଏଲଭି ରମନ୍ନାଙ୍କ ସମେତ ଅନ୍ୟ ବିଚାରପତିଙ୍କୁ ପତ୍ର ଲେଖି ଅନୁରୋଧ କରିଛନ୍ତି । ସିବିଏସଇ ଦ୍ୱାଦଶ ପରୀକ୍ଷା କେନ୍ଦ୍ର ବା ଅଫଲାଇନରେ ନକରିବାକୁ ସେମାନେ ଚିଠିରେ ଉଲ୍ଲେଖ କରିଛନ୍ତି । ଚିଠିରେ ଉଲ୍ଲେଖ ଅଛି ଯେ, ଦେଶରେ କରୋନା ସ୍ଥିତି ଜଟିଳ ରହିଛି । ଅନେକ ଛାତ୍ରଛାତ୍ରୀ ସେମାନଙ୍କ ପରିବାର ଲୋକ ଓ ମାତାପିତାଙ୍କୁ ହରାଇଛନ୍ତି । ପରିସ୍ଥିତି ଘର ଭିତରେ ରହିବାକୁ ବାଧ୍ୟ କରୁଛି । ଦେଶରେ ଲକ୍ଷାଧିକ ଛାତ୍ରଛାତ୍ରୀ କରୋନାର ଦ୍ୱିତୀୟ ଲହର ମଧ୍ୟ ଭାଗରେ ପରୀକ୍ଷା କେନ୍ଦ୍ରରେ ପରୀକ୍ଷାକୁ ନେଇ ଭୟ ଓ ଆଶଙ୍କା ରହିଛନ୍ତି । ଏପରି ସ୍ଥିତିରେ ପରୀକ୍ଷା କରାଗଲେ ପରୀକ୍ଷା କେନ୍ଦ୍ର ହିଁ କୋଭିଡ ହସସ୍ପଟ ପାଲଟିବାର ସମ୍ଭାବନା ରହିଛି । ଯଦି ଛାତ୍ରଛାତ୍ରୀମାନେ କରୋନା ସଂକ୍ରମିତ ହୁଅନ୍ତି ତେବେ ସରକାର ଓ ସିବିଏସଇ ଦାୟୀ ରହିବେ ବୋଲି ଚିଠିରେ ଉଲ୍ଲେଖ ରହିଛି । ଏପରି ଜଟିଳ ସ୍ଥିତିରେ ପରୀକ୍ଷା କେନ୍ଦ୍ରରେ ପରୀକ୍ଷାର ସମ୍ଭାବ୍ୟ ଆୟୋଜନକୁ ଛାତ୍ରଛାତ୍ରୀ ମାନେ ନିନ୍ଦା କରିଛନ୍ତି । ଏହାସହ ଅନଲାଇନ ପରୀକ୍ଷା ଓ ଅନ୍ୟ ବିକଳ୍ପ ପ୍ରକ୍ରିୟାରେ ମୂଲ୍ୟାୟନ କରିବାକୁ ସେମାନେ ପ୍ରସ୍ତୁତ ଥିବା କହିଛନ୍ତି । ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଛାତ୍ରଛାତ୍ରୀଙ୍କ ଭବିଷ୍ୟତକୁ ନେଇ ଏକ ଉଚ୍ଚସ୍ତରୀୟ ବୈଠକ ଡାକିଥିଳେ । ଏଥିରେ ସମସ୍ତ ବୋର୍ଡ ପରୀକ୍ଷା ବାବଦରେ ଚର୍ଚ୍ଚା ହୋଇଥିଲା । କେନ୍ଦ୍ର ଶିକ୍ଷାମନ୍ତ୍ରୀ ରମେଶ ପୋଖରୀୟାଲ ମଧ୍ୟ ସମସ୍ତ ରାଜ୍ୟକୁ ପରୀକ୍ଷା ଆୟୋଜନ ନେଇ ମତାମତ ଓ ପରାମର୍ଶ ମାଗିଛନ୍ତି ।
ପ୍ରଧାନ ବିଚାରପତିଙ୍କୁ ଚିଠି ଲେଖିଲେ ସିବିଏସଇ ଦ୍ୱାଦଶ ଛାତ୍ରଛାତ୍ରୀ, ଅଫଲାଇନ ପରୀକ୍ଷା ନ ହେଉ
