ବୈପାରୀଗୁଡ଼ା (ବାଘୁଆବାର୍ତ୍ତା): ବୈପାରୀଗୁଡ଼ା ବ୍ଳକ ରାମଗିରି ପଞ୍ଚାୟତ ଅନ୍ତର୍ଗତ ପୁରୁଣାପାଣି ପୋଖରୀରେ ବୁଡି ମା’ ଓ ଝିଅଙ୍କ ମୃତ୍ୟୁ ଘଟିଛି । ମୃତକମାନେ ହେଲେ ଚଞ୍ଚଳା ଚାଲାଣ (୩୦) ଓ ଝିଅ ସମ୍ମତି ଚାଲାଣ (୧୦) । ଆଜି ପୂର୍ବାହ୍ନରେ ଗ୍ରାମ ନିକଟ ପୋଖରୀକୁ ମା’ ଓ ଝିଅ ଗାଧୋଇବାକୁ ଯାଇଥିଲେ । ଗାଧୋଇବା ବେଳେ ଝିଅ ପୋଖରୀ ଗଭୀର ଜଳକୁ ଚାଲି ଯାଇଥିଲା । ଝିଅକୁ ଉଦ୍ଧାର କରିବାକୁ ଯାଇ ମା’ ମଧ୍ୟ ଗଭୀର ଜଳକୁ ଯାଇ ବୁଡି ଯାଇଥିଲା । ପାଖରେ ଥିବା ମହିଳାମାନେ ତୁରନ୍ତ ଗ୍ରାମକୁ ଯାଇ ଖବର ଦେଇଥିଲେ । ଗ୍ରାମବାସୀ ଉଦ୍ଧାର କରିବାକୁ ଯାଇ ପାଇ ନଥିଲେ । ଶେଷରେ ବୈପାରୀଗୁଡା ଅଗ୍ନିଶମ ବାହିନୀକୁ ଖବର ଦେଇଥିଲେ । ପୋଖରୀ ଗଭୀର ଜଳ ଭିତରକୁ ମା’ ଓ ଝିଅକୁ ଅଗ୍ନିଶମ କର୍ମଚାରୀ ଉଦ୍ଧାର କରିଥିଲେ । ରାମଗିରି ଫାଣ୍ଡି ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଛେଦ ପାଇଁ ପଠାଇଥିଲେ । ମୃତକ ପରିବାରକୁ ୪ ଲକ୍ଷ ଲେଖାଏଁ ସରକାରୀ ଅନୁକମ୍ପାମୂଳକ ସହାୟତା ରାଶି ପ୍ରଦାନ କରାଯିବ ବୋଲି ଜିଲା ଜରୁରୀ ଅଧିକାରୀ ଜ୍ଞାନଜିତ ତ୍ରିପାଠୀ କହିଛନ୍ତି ।
