ନୀଳଗିରି (ବାଘୁଆବାର୍ତ୍ତା): ବାଲେଶ୍ୱର ଜିଲ୍ଲା ନୀଳଗିରି ଏସଡିପିଓ ରିତେଶ କୁମାର ମହାପାତ୍ରଙ୍କ ନିର୍ଦ୍ଦେଶରେ ବିଭିନ୍ନ ଥାନାରେ ପୋଲିସ ବିଭିନ୍ନ ଅଞ୍ଚଳରୁ ଚଢ଼ାଉ କରି ବିପୁଳ ପରିମାଣରେ ଦେଶୀ ଓ ବିଦେଶୀ ମଦ ବାଇକ ଜବତ କରିବା ସହ ଅଭିଯୁକ୍ତଙ୍କୁ ଗିରଫ କରିଛି । ସୂଚନାନୁସାରେ ଏବେ କରୋନା ବେଳେ ଚାରିଆଡେ ଚୋରା ମଦ ବେପାରୀ ଅଧିକ ସକ୍ରିୟ ହୋଇଉଠିଛନ୍ତି । ବିଭିନ୍ନ ସ୍ଥାନାରେ ଚୋରା ବେପାରୀ ମାନେ ବେଆଇନ ଭାବେ ମଦ ଚାଲାଣ କରୁଛନ୍ତି । ବେଆଇନ ମଦ କାରବାର ବନ୍ଦ କରିବାକୁ ନୀଳଗିରି ଏସଡିପିଓ ବିଭିନ୍ନ ଥାନାକୁ ନିର୍ଦ୍ଦେଶ ଦେଇଛନ୍ତି । ନୀଳଗିରି ଆଇଆଇସି ପ୍ରଭଞ୍ଜନ ବେହେରାଙ୍କ ଏକ ଟିମ ବିଭିନ୍ନ ସ୍ଥାନରେ ଚଢ଼ାଉ କରିଥିଲେ । ଓଲଡଙ୍ଗ ଛକରେ ଏକ ବଜାଜ ଡିସକଭର ବାଇକ, ୧୦୦ ଲିଟର ଦେଶୀ ମଦ ଜବତ କରିବା ସହ ସିଆଡିମାଳ ଅଂଚଳର ଜୟକୃଷ୍ଣ ଦାସ ବାବୁ ଓ ଛୋଟକାନପୁର ଅଞ୍ଚଳର ପ୍ରଦୀପ କୁମାର ପାତ୍ର ଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ଏନେଇ ମାମଲା ରୁଜୁ ହୋଇଛି । ଔପଦା ପୋଲିସ ମଧ୍ୟ ୧୦ ଲିଟର ଦେଶୀ ମଦ ଜବତ କରିବା ସହ ଜଣେ ବ୍ୟକ୍ତି ଗିରଫ କରାଯାଇଛି । ଖଇରା ଥାନା ଅଧିନ ତିନୋଟି ସ୍ଥାନରୁ ଖଇରା ପୋଲିସ ଚଢ଼ାଉ କରି ୧୮୮ ଲିଟର ବିଦେଶୀ ମଦ ଜବତ କରିବା ସହ ଦୁଇ ଅଭିଯୁକ୍ତ ଗିରଫ କରାଯାଇଛି । ସେହିପରି ରେମୁଣା ପୋଲିସ ମଧ୍ୟ ୭୭ ଲିଟର ଦେଶୀ ମଦ ଜବତ କରିଥିବା ବେଳେ ଜଣେ ଗିରଫ କରାଯାଇଛି । ଏକ ଦିନରେ ନୀଳଗିରି ଉପଖଣ୍ଡ ଅଧୀନରେ ଥିବା ଥାନା ଅଞ୍ଚଳରେ ଚୋରା ମଦ କାରବାର ଉପରେ ବ୍ୟାପକ ଚଢ଼ାଉ ଜାରି ରହିବ ବୋଲି ଏସଡିପିଓ ରିତେଶ କୁମାର ମହାପାତ୍ର ସୂଚନା ଦେଇଛନ୍ତି ।
