ନୟାଗଡ଼ (ବାଘୁଆବାର୍ତ୍ତା): ଅଭିଯୁକ୍ତ ଗଣେଶ ଡାକୁଆ ଆତ୍ମହତ୍ୟା ମାମଲାରେ ଥାନାର ଦୁଇ କର୍ମଚାରୀଙ୍କୁ ନିଲମ୍ବିତ କରାଯାଇଛି । ଦାୟିତ୍ୱରେ ଥିବା ଡିସିଓ ଏବଂ ସେଣ୍ଟ୍ରିଙ୍କୁ ନିଲମ୍ବନ କରାଯାଇଛି । ଘଟଣାର ତଦନ୍ତ ସରିବା ପର୍ଯ୍ୟନ୍ତ ଥାନା ଆଇଆଇସି ବାବୁଲି ନାୟକଙ୍କୁ ଡିପିଓକୁ ସ୍ଥାନାନ୍ତର କରାଯାଇଛି । ସେପଟେ ଦୁଇଟି ଟିମ ଘଟଣାର ତଦନ୍ତ କରୁଛନ୍ତି । ଏଏସପି ପ୍ରଭାତ ଚନ୍ଦ୍ର ରାଉତରାୟ ଅଭିଯୁକ୍ତ ଆତ୍ମହତ୍ୟା ପଛରେ କାହାର ଅବହେଳା ରହିଛି ତଦନ୍ତ କରୁଥିବା ବେଳେ ଡିଏସପି ପ୍ରକାଶ ଜେନା ଅପମୃତ୍ୟୁ ମାମଲାର ତଦନ୍ତ କରୁଛନ୍ତି । ଏସ୍ଡିପିଓ ମହାପାତ୍ରଙ୍କ ସୂଚନା ପ୍ରକାରେ ସୋମବାର ରଙ୍ଗିପୁର ଇଟା ଫ୍ୟାକ୍ଟ୍ରିରେ ଗଣେଶ ମହିଳାଙ୍କୁ ଅସଦାଚରଣ ଓ ଗଣ୍ଡଗୋଳ କରୁଥିବା ଅଭିଯୋଗ ଆସିଥିଲା । ଅଭିଯୋଗକୁ ଭିତ୍ତି କରି ପୁଲିସ ଘଟଣାସ୍ଥଳରେ ପହଞ୍ଚିଥିଲା । ଅଭିଯୁକ୍ତ ଗଣେଶ ଡାକୁଆକୁ ଥାନାକୁ ନେଇ ଆସିଥିଲେ । ଅପରାହ୍ନ ୩ଟା ୩୦ରେ ଅଭିଯୁକ୍ତ ମହିଳା ଓ ଶିଶୁ ଡେସ୍କରେ ରଖାଯାଇଥିଲା । ପରେ କର୍ମଚାରୀମାନେ ନିଜ ନିଜ କାମରେ ପଳାଇଥିଲେ । ସେଣ୍ଟ୍ରି କନେଷ୍ଟବଳ ପ୍ରକାଶ ଚନ୍ଦ୍ର ଜେନା ସେଠାରେ ଜଗିଥିଲେ । କିଛି ସମୟ ସେଠାରେ ରହିବା ପରେ ସେଣ୍ଟ୍ରି ରୁମ ଲକ କରି ଅନ୍ୟ ଏକ ରୁମକୁ ଯାଇଥିଲେ । ତେବେ ରାତି ୭ଟାରେ ହଠାତ ପାଟି ଶୁଭିଥିଲା । ଥାନାର କର୍ମଚାରୀମାନେ ଦୌଡି ଆସିଥିଲେ । ମହିଳା ଓ ଶିଶୁ ଡେସ୍କ ରୁମକୁ । ସେଠାରେ ଗଣେଶ ଡାକୁଆଙ୍କୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା । ସଙ୍ଗେ ସଙ୍ଗେ ତାଙ୍କୁ ଏମକେସିଜି ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରାଯାଇଥିଲେ ହେଁ ସେଠାରେ ଡାକ୍ତର ମୃତ ଘୋଷଣା କରିଥିଲେ ।
