କଟକରେ ଦୋଳ-ହୋଲି ଉପରେ କଟକଣା; ମେଳଣ ପଡିଆରେ ଏକାଠି ହେବେନି ୨ଶହରୁ ଅଧିକ ଲୋକ

ଭୁବନେଶ୍ବର,(ବାଘୁଆବାର୍ତ୍ତା): ଆଠ ଦିନ ପରେ ପବିତ୍ର ଦୋଳ ପୂର୍ଣ୍ଣିମା। ତା’ପର ଦିନ ହୋଲି ପର୍ବ। କିନ୍ତୁ ଚଳିତ ବର୍ଷ କୋଭିଡ-୧୯ ଯୋଗୁଁ ଦୋଳ ଯାତ୍ରା ଓ ହୋଲି ଖେଳ ନେଇ ଆଶଙ୍କା ଦେଖାଯାଇଛି। ରାଜ୍ୟରେ କଟକଣା ସହିତ ଏହି ୨ଟି ପର୍ବ ପାଳନ ହେବ ବୋଲି ଆଶା କରାଯାଉଛି। କଟକରେ ଦୋଳ ମେଳଣ ଓ ହୋଲି ପାଳନ ଉପରେ କଟକଣା ଲଗାଇଛି ସ୍ଥାନୀୟ ପ୍ରଶାସନ । ମେଳଣ ପଡିଆରେ ୨ ଶହରୁ ଅଧିକ ଲୋକ ଏକାଠି ହୋଇପାରିବେ ନାହିଁ । ଦୋଳ ବିମାନ ଯାତ୍ରା ବେଳେ ୧୦ରୁ ଅଧିକ ଲୋକ ରହିପାରିବେ ନାହିଁ । ମେଳଣ ପଡିଆରେ ଡାକବାଜି ଯନ୍ତ୍ର ବାଜିପାରିବ ନାହିଁ । ଦୋଳ ମେଳଣରେ କୌଣସି ସାଂସ୍କୃତିକ କାର୍ଯ୍ୟକ୍ରମ ହୋଇପାରିବ ନାହିଁ ବୋଲି ନିର୍ଦ୍ଦେଶ ହୋଇଛି।ସେହପରି ହୋଲି ପାଇଁ ମଧ୍ୟ କଟକଣା ଲାଗିଛି । ନିଜ ଘରେ ରହି ହୋଲି ଖେଳିବାକୁ ପରାମର୍ଶ ହୋଇଛି । ବଡ ଧରଣର ଏକାଠି ହୋଇ ହୋଲି ଖେଳିବାକୁ ଅନୁମତି ନାହିଁ । କରୋନା ସଂକ୍ରମଣକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନେଇଛି ଜିଲ୍ଲା ପ୍ରଶାସନ । ପୂର୍ବ ବର୍ଷ ମଧ୍ୟ କରୋନା ଯୋଗୁଁ ହୋଲି ପାଳନ ହୋଇପାରି ନଥିଲା । ତେବେ ଆଜି ରାଜ୍ୟରେ ସଂକ୍ରମଣ ସଂଖ୍ୟା ବୃଦ୍ଧି ପାଇବା ପରେ ଏଭଳି ପଦକ୍ଷେପ ନେଇଛି ପ୍ରଶାସନ ।