ମୋ ସ୍ୱାମୀଙ୍କୁ ଆକ୍ରମଣ, ମୋତେ ରେଫ୍ ଧମକ୍, ଜିଲ୍ଲାପାଳଙ୍କୁ ଫେରାଦ୍

ନୟାଗଡ଼,(ବାଘୁଆବାର୍ତ୍ତା): ଅସହନୀୟ ଦୁର୍ବ୍ୟବହାର କରିବା ସହିତ ଜାତିଆଣ ଆକ୍ଷେପ ଓ ମରଣାନ୍ତକ ଆକ୍ରମଣ କରିବା ନେଇ ଜିଲ୍ଲାପାଳଙ୍କୁ ଲିଖିତ ଅଭିଯୋଗ କରିଛନ୍ତି ଗାତେରୀ ଗ୍ରାମର ବାସନ୍ତୀ ସେଠୀ । ସୂଚନାନୁସାରେ, ନୂଆଗାଁ ଥାନା ମହିପୁର ଫାଣ୍ଡି ଅନ୍ତର୍ଗତ ଗାତେରୀ ଗ୍ରାମର ଲକ୍ଷ୍ମୀଧର ସେଠୀଙ୍କ ପରିରବାରକୁ ଅସହନୀତ ଦୁର୍ବ୍ୟବହାର କରିବା ସହିତ ମରଣାନ୍ତକ ଆକ୍ରମଣ, ଜାତିଆଣ ଆକ୍ଷେପ ଗ୍ରାମର କିଛି ବ୍ୟକ୍ତି କରିଥିଲେ । ଏହାକୁ ନେଇ ଚଳିତ ବର୍ଷ ଜାନୁୟାରୀ ୧୨ତାରିଖରେ ଲକ୍ଷ୍ମୀଧର ସେଠୀଙ୍କ ସ୍ତ୍ରୀ ବାସନ୍ତୀ ସେଠୀ ଥାନାରେ ଅଭିଯୋଗ କରିଥିଲେ । ଅଭିଯୁକ୍ତ ମାନଙ୍କ ନାମରେ ମାମଲା ଋଜୁ କରାଯାଇଥିଲେ ମଧ୍ୟ ଆଜି ସୁଦ୍ଧା କୌଣସି ଅଭିଯୁକ୍ତଙ୍କୁ ଗିରଫ କରାଯାଇ ନାହିଁ । ସେହି ଅଭିଯୁକ୍ତ ମାନଙ୍କ ମଧ୍ୟରୁ ଶରଣକୁଳ ଥାନା ଆଙ୍ଗିସିଙ୍ଗି ଗ୍ରାମର ଭିକାରୀ ପ୍ରଧାନଙ୍କ ପୁଅ ଧୋବା ପ୍ରଧାନ ଗୁଣ୍ଡା ହୋଇ ଆସି ଘରକୁ ଟେକା ପଥର ମାରିବା ସହିତ ବିଭିନ୍ନ ମାରଣାସ୍ତ୍ର ଦେଖାଇ ଜୀବନରୁ ମାରି ଦେବାକୁ ଧମକ ଦେଉଛି । ଗୁରୁବାର ଦିନ ମୋ ସ୍ୱାମୀ ଲକ୍ଷ୍ମୀଧର ସେଠୀକୁ ହାଣିବାକୁ ଗୋଡ଼େଇବାରୁ ପ୍ରାଣ ବିକଳରେ ଜଙ୍ଗଲରେ ପସିଗଲେ ଏବଂ ମୋତେ ରାସ୍ତା ଉପରେ ରେଫ୍ କରିବାକୁ ଧମକ ଦେଉଛି ବୋଲି ଅଭିଯୋଗ ପତ୍ରରେ ବାସନ୍ତି ସେଠୀ ଜିଲ୍ଲାପାଳଙ୍କୁ ଦର୍ଶାଇଛନ୍ତି । ଆସନ୍ତା ୪୮ଘଣ୍ଟା ଭିତରେ ଯଦି ଅଭିଯୁକ୍ତମାନେ ଗିରଫ୍ ନହୁଅନ୍ତି ତେବେ ସୋମବାର ୧୦ଟା ସମୟରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବେ ବୋଲି ଚେତାବନୀ ଦେଇଥିବା ଜଣାପଡିଛି ।