ଭୁବନେଶ୍ୱର,(ବାଘୁଆବାର୍ତ୍ତା): ରାଜ୍ୟ ପୁଲିସକୁ ମିଳିଛି ବଡ଼ ସଫଳତା । ସପ୍ତାହକ ମଧ୍ୟରେ ଗିରଫ କରିଛି ହଜାର ହଜାର ଅପରାଧି । ସୂଚନାନୁସାରେ, ଚଳିତମାସ ୭ତାରିଖ ଠାରୁ ୧୪ତାରିଖ ପର୍ଯ୍ୟନ୍ତ ରାଜ୍ୟ ପୁଲିସ ତରଫରୁ ଜାମିନ୍ ବିହୀନ ପରୱାନା ବିରୋଧରେ ଏକ ସ୍ୱତନ୍ତ୍ର ଡ୍ରାଇଭ୍ ପ୍ରସ୍ତୁତ କରିଥିଲା । ଦୀର୍ଘ ଦିନ ଧରି ଅପରାଧ ଘଟାଇ ଆତ୍ମଗୋପନ କରିଥିବା ତଥା କୋର୍ଟଙ୍କ ନିର୍ଦ୍ଦେଶକୁ ଭ୍ରୁକ୍ଷେପ କରୁନଥିବା ଅପରାଧିଙ୍କ ବିରୋଧରେ ଏହି ସ୍ୱତନ୍ତ୍ର ଡ୍ରାଇଭ କାର୍ଯ୍ୟ କରିଥିଲା । ଜେନେରାଲ ରେଜେଷ୍ଟ୍ରି ଏବଂ ସେସନ ଟ୍ରାଏଲ ମାମଲାରେ ସଂପୃକ୍ତ ଥିବା ଅପରାଧିଙ୍କୁ ପୁଲିସ ପକ୍ଷରୁ ଟାର୍ଗେଟ୍ କରାଯାଇଥିଲା । ସପ୍ତାହକରେ ସମୁଦାୟ ରାଜ୍ୟରେ ୩୯୮୮ଜଣ ୱାରେଣ୍ଟିଙ୍କୁ ପୁଲିସ ଗିରଫ୍ କରିଛି । ସେଥିମଧ୍ୟରୁ ୩୩୯୫ଜଣଙ୍କୁ ଜେନେରାଲ ରେଜେଷ୍ଟ୍ରି ଏବଂ ୫୯୩ଜଣଙ୍କୁ ସେସନ ଟ୍ରାଏଲ ମାମଲାରେ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ସପ୍ତାହକ ଭିତରେ ଏତେ ସଂଖ୍ୟକ ଅପରାଧିଙ୍କୁ ଗିରଫ କରିବାରେ ପୁଲିସର ବଡ଼ ସଫଳତାକୁ ନେଇ ପୁଲିସ ମହାନିର୍ଦ୍ଦେଶକ ଅଭୟ ସମସ୍ତ ଜିଲ୍ଲାର ଏସପି ମାନଙ୍କୁ ଧନ୍ୟବାଦ ଜଣାଇଛନ୍ତି । ଗଞ୍ଜାମ ଜିଲ୍ଲାରୁ ସର୍ବାଧିକ ୪୫୨, କେନ୍ଦ୍ରାପଡ଼ା ଜିଲ୍ଲାରୁ ୩୦୭ ଏବଂ ବାଲେଶ୍ୱର ଜିଲ୍ଲାରୁ ୨୯୮ଜଣ ଅପରାଧିଙ୍କୁ ଗିରଫ କରାଯାଇଥିବା ରାଜ୍ୟ ପୁଲିସ ମୁଖ୍ୟାଳୟରୁ ସୂଚନା ମିଳିଛି ।
