ନୟାଗଡ଼,(ବାଘୁଆବାର୍ତ୍ତା): ଅନଲାଇନର ଅନେକ ମାଟ୍ରିମୋନିରେ ନିଜକୁ ଜଣେ ବରିଷ୍ଠ ପୁଲିସ ଅଫିସରର ପରିଚୟ ଦେଇଥିଲେ । ମାଟ୍ରିମୋନିରେ ଡିଏସପି ବୋଲି ପରିଚୟ ଦେଇ ଏକାଧିକ ଯୁବତୀଙ୍କୁ ବିବାହ କରିଥିବା ଜଣେ ନକଲି ଡଏସପିକୁ ଲାଲବାଗ୍ ଥାନା ପୁଲିସ ଗିରଫ କରିଛି । ତେବେ ନକଲି ଡିଏସପି ଜଣକ ହେଲେ ନୟାଗଡ଼ ଜିଲ୍ଲା ପାମ୍ପଡା ଅଞ୍ଚଳର ବଳରାମ ପ୍ରହରାଜ । ନକଲି ଡିଏସପି ଜଣକ ୫ଯୁବତୀଙ୍କୁ ବିବାହ କରିସାରିଥିବା ବେଳେ ଷଷ୍ଠ ବିବାହ କରିବାକୁ ଯୋଜନା କରୁଥିବା ବେଳେ ପୁଲିସ୍ ହାତରେ ଧରାପଡ଼ିଛି । ଅଭିଯୁକ୍ତ ଜଣକ ଆଠଗଡ଼, ଅନୁଗୁଳ, ଖୋର୍ଦ୍ଧା, ନରସିଂହପୁର ଅଞ୍ଚଳରେ ପୁଲିସର ପରିଚୟ ଦେଇ ସ୍ଥାନ ବଦଳାଉଥିଲା ବେଳେ ନିଜକୁ ବିଭିନ୍ନ ସ୍ଥାନରେ ସେ ଅବିବାହିତ ବୋଲି କହିଆସୁଥିଲା । ସୂଚନାନୁସାରେ, ନୟାଗଡ଼ ଜିଲ୍ଲା ପାମ୍ପଡା ଅଞ୍ଚଳର ବଳରାମ ପ୍ରହରାଜ ବିବାହିତ ହୋଇଥିବା ବେଳେ ବିଭିନ୍ନ ମାଟ୍ରିମୋନିରେ ଅବିବାହିତ ଦର୍ଶାଇ ନିଜକୁ ଜଣେ ସିଆରପିଏଫ ଡିଏସପି ବୋଲି ପରିଚୟ ଦେଇଥିଲା । ଯାହାଫଳରେ ଯୁବତୀମାନେ ଆକୃଷ୍ଟ ହେଉଥିଲେ । ଏହାକୁ ଦେଖି ଅନୁଗୁଳ ଅଞ୍ଚଳର ଆଦିବାସୀ ଯୁବତୀ ତଥା ସରକାରୀ ବିଦ୍ୟାଳୟର ଶିକ୍ଷୟତ୍ରୀ ଥିବା ଅନିମା କୁମାରୀ ପ୍ରଧାନ ଗତବର୍ଷ ନକଲି ଆଇଡିକୁ ଦେଖୀ ବଳରାମଙ୍କୁ ବିବାହ କରିବାକୁ ମନ ବଳେଇଥିଲେ । ଉକ୍ତ ଆଇଡିରେ ବଳରାମ ନିଜର ନାମ ପରିବର୍ତ୍ତନ କରି କୈଳାସ ଚନ୍ଦ୍ର ମିଶ୍ର ବୋଲି ଦର୍ଶାଇଥିଲା । ତେବେ ଅନିମା ଫୋନ କରି ବଳରାମଙ୍କୁ ବିବାହ କରିବାକୁ ପ୍ରସ୍ତାବ ଦେଇଥିଲେ । ଏପରିକି ଦୁହେଁ ଏକ ମନ୍ଦିରରେ ମଧ୍ୟ ବିବାହ କରିଥିଲେ । ତେବେ ବଳରାମ କିଛିଦିନ ଅନିମାଙ୍କ ପାଖରେ ରହିବା ପରେ ବିଭିନ୍ନ ବାହାନା ଦେଖାଇଥିଲେ । ଚତୁରତାର ସହିତ ବଳରାମ ଅନିମାଙ୍କ ଠାରୁ ସୁନା ଅଳଙ୍କାର ଓ ଏଟିଏମ କାର୍ଡ ନେଇ ଚମ୍ଡଟ ମାରିଥିଲେ । ଅନିମା ବଳରାମଙ୍କୁ ଡାକିବାରୁ ବିଭିନ୍ନ ଆଳ ଦେଖାଇ ବାହାରେ ରହୁଥିଲେ । ତେବେ ଗାଡ଼ିର କାଗଜପତ୍ର ବଦଳାଇବା ପାଇଁ ଅନିମା କଟକ ଅସିଥିବା ବେଳେ ସେଠାରେ ବଳରାମଙ୍କୁ ଦେଖିବାକୁ ପାଇଥିଲେ । ଏହାପରେ ଅନିମା ବଳରାମକୁ କାବୁ କରି ନିକଟସ୍ଥ ଥାନାକୁ ଖବର ଦେଇଥିଲେ । ପୁଲିସ ଆସିବା ପରେ ବଳରାମଙ୍କୁ ପୁଲିସ ଜିମା ଦେଇଥିଲେ ଅନିମା । ପୁଲିସ ଥାନାକୁ ନେଇ ତନାଘନା ଆରମ୍ଭ କରିବାରୁ ସବୁ ସତକଥା ଓଗାଳିଥିଲା ବଳରାମ । ତେବେ ପୁଲିସ ତାକୁ ଗିରଫ କରି କୋର୍ଟ ଚାଲାଣ କରିଥିବା ସୂଚନା ମିଳିଛି ।
