ଭୁବନେଶ୍ୱର, (ବାଘୁଆବାର୍ତ୍ତା): ୨୦୨୬ ମାର୍ଚ୍ଚ ସୁଦ୍ଧା ସରିବ ଖୋର୍ଦ୍ଧା ରୋଡ୍-ବଲାଙ୍ଗିର ରେଳ ଲାଇନ୍ କାମ । ଏହି ଲାଇନ୍ ପାଇଁ ବିଶେଷ ଆହ୍ୱାନ ଥିବା ୭ଟି ସୁଡ଼ଙ୍ଗ କାମ ସରିଛି । ଶେଷ ସୁଡ଼ଙ୍ଗ ଖନନ କାମ ମେ ୩୦ ତାରିଖରେ ସରିବା ପରେ ଏବେ ଏହି ବହୁ ପ୍ରତୀକ୍ଷିତ ରେଳ ଲାଇନ୍ ଶୀଘ୍ର କାର୍ଯ୍ୟକ୍ଷମ ହେବା ନେଇ ସ୍ଥାନୀୟ ଅଞ୍ଚଳରେ ଆଶା ସଞ୍ଚାର ହୋଇଛି । ଖୋର୍ଦ୍ଧା ରୋଡ୍-ବଲାଙ୍ଗିର ରେଳ ଲାଇନ୍ ମୋଟ ୩୦୧ କିଲୋମିଟର ହୋଇଥିବା ବେଳେ ଖୋର୍ଦ୍ଧା ରୋଡ୍ରୁ ଦଶପଲ୍ଲା ୧୦୬ କିଲୋମିଟର କାମ ସରିଛି । ସେହିପରି ବଲାଙ୍ଗିରରୁ ପୁରୁଣାକଟକ ୧୨୦ କିମି ମଧ୍ୟ କାମ ସରିଛି । କେବଳ ପୁରୁଣାକଟକରୁ ଆଢ଼େନିଗଡ଼ ପର୍ଯ୍ୟନ୍ତ ୭୫ କିମି କାମ ବାକି ରହିଥିଲା । ସେହି ଅଞ୍ଚଳରେ ଏହି ସୁଡ଼ଙ୍ଗଯାକ ରହିଥିବାରୁ ବିଳମ୍ବ ହେଉଥିଲା । ମାତ୍ର ଏହି ସମସ୍ୟା ଦୂର ହେବା ପରେ ଏଣିକ ଅବଶିଷ୍ଟ କାମ ଯୁଦ୍ଧକାଳୀନ ଭିତ୍ତିରେ ଚାଲିବ । ଶୀଘ୍ର ପୂର୍ବ ଏବଂ ପଶ୍ଚିମ ଓଡ଼ିଶା ମଧ୍ୟରେ ସୁଗମ ରେଳ ସଂଯୋଗ ସ୍ଥାପନ ହୋଇପାରିବ । ଯାହା ଯାତ୍ରୀ ଏବଂ ମାଲ ପରିବହନକୁ ବ୍ୟାପକ ଲାଭ ଦେବ ବୋଲି ପୂର୍ବତଟ ରେଳପଥର ବରିଷ୍ଠ ଅଧିକାରୀ କହିଛନ୍ତି । ଖୋର୍ଦ୍ଧା ରୋଡ୍-ବଲାଙ୍ଗିର ରେଳ ଲାଇନ୍ ପୂର୍ଣ୍ଣ କାର୍ଯ୍ୟକ୍ଷମ ହେବା ପରେ ଓଡ଼ିଶାର ଅର୍ଥନୀତି ଏବଂ ସମାଜ ଉପରେ ପରିବର୍ତ୍ତନକାରୀ ପ୍ରଭାବ ପକାଇବ । ଭୁବନେଶ୍ୱର ଏବଂ ବଲାଙ୍ଗୀର ମଧ୍ୟରେ ଯାତ୍ରା ସମୟ ହ୍ରାସ କରିବ । ବାଣିଜ୍ୟ ଏବଂ ଆଞ୍ଚଳିକ ବିକାଶକୁ ପ୍ରୋତ୍ସାହିତ କରିବ । ନୟାଗଡ ଜିଲ୍ଲାର ବୁଗୁଡ଼ା ଏବଂ ଦଶପଲ୍ଲା ମଧ୍ୟରେ ଥିବା ସୁଡଙ୍ଗ ନମ୍ୱର ଟି୨ର ଖନନ କାର୍ଯ୍ୟ ଶୁକ୍ରବାର ସରିବା ସହିତ ଏହି ରେଳ କରିଡରରେ ସମସ୍ତ ସାତଟି ସୁଡଙ୍ଗର ଖନନ କାର୍ଯ୍ୟ ସମାପ୍ତ ହୋଇଛି । ସୁଡଙ୍ଗ ନମ୍ୱର ଟି୨ ୧,୭୭୫ ମିଟର ଦୈର୍ଘ୍ୟ ରହିଛି । ଏହି ସୁଡ଼ଙ୍ଗ ୨-ଡିଗ୍ରୀ ବକ୍ର ସହ ନିର୍ମାଣ କରାଯାଇଛି । ଏହା ନୂଆ ପ୍ରଯୁକ୍ତିବିଦ୍ୟା ପଦ୍ଧତି ନୂଆ ଅଷ୍ଟ୍ରିଆନ୍ ଟନେଲିଂ ପଦ୍ଧତିରେ ନିର୍ମିତ ହୋଇଛି । ଜଟିଳ ୭ଟି ସୁଡ଼ଙ୍ଗର ମୋଟ ୧୨.୭୬ କିମି ଲମ୍ୱ । ସେଥିମଧ୍ୟରୁ ନୟାଗଡ ଜିଲ୍ଲାରେ ଥିବା ଟି-୧ ଲମ୍ବ ୮୦୦ ମିଟର ଥିବା ବେଳେ ଟି-୨ର ୧,୭୭୫ ମିଟର ଓ ଟି-୩ର ୨,୬୨୦ ମିଟର ରହିଛି । ବୌଦ୍ଧ ଜିଲ୍ଲାରେ ଥିବା ଟି- ୪ର ଲମ୍ବ ୪,୧୮୩ ମିଟର ଓ ୭୦୦-ମିଟର ଏସ୍କେପ୍ ସୁଡ଼ଙ୍ଗ ହୋଇଥିବା ବେଳେ ଟି-୫ର ୩୧୭ ମିଟର, ଟି-୬ର ୨୯୦.୭୫ ମିଟର ଓ ଟି-୭ର ୧,୯୭୫ ମିଟର ଲମ୍ବ ରହିଛି । ଏହି ସୁଡ଼ଙ୍ଗ ନିର୍ମାଣ ପ୍ରାକୃତିକ ଚ୍ୟାଲେଞ୍ଜରେ ଭରି ରହିଥିଲା । ଏଥିରେ ଅତ୍ୟନ୍ତ ପରିବର୍ତ୍ତନଶୀଳ ମାଟି ଏବଂ ପଥର ଭରି ରହିଛି । ତେଣୁ ଉପଯୁକ୍ତ ଡିଜାଇନ୍ ସହିତ ବକ୍ର ଆଲାଇନମେଣ୍ଟ କରିବା କଷ୍ଟକର ବ୍ୟାପାର ଥିଲା । ଏହା ସହିତ ବନ୍ୟପ୍ରାଣୀ କ୍ଷେତ୍ରରେ ଶବ୍ଦ ଏବଂ କମ୍ପନ ନିୟନ୍ତ୍ରଣ ବ୍ୟବସ୍ଥାର ସହ ରେଳ ନିର୍ମାଣ କାମ କରାଯାଇଥିବା ବିଭାଗୀୟ ଅଧିକାରୀ କହିଛନ୍ତି ।
ସରିଲା ସୁଡଙ୍ଗ ଖନନ, ୨୦୨୬ ମାର୍ଚ୍ଚ ସୁଦ୍ଧା ଖୋର୍ଦ୍ଧା ବଲାଙ୍ଗିର ରେଳ ଲାଇନ୍
