ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ନୂଆଗାଁ ଥାନା ଅନ୍ତର୍ଗତ ମହୀପୁର ଫାଣ୍ଡି ପୁଲିସ ଏକ କାର ଏବଂ ୫୦ କେଜି ଗଞ୍ଜେଇ ଜବତ କରିଥିବା ଜଣାଯାଇଛି । ସୂଚନାନୁସାରେ, ଗତକାଲି ରାତିରେ ମହୀପୁର ଫାଣ୍ଡି ଅନ୍ତର୍ଗତ ମାଳିସର ଗ୍ରାମ ନିକଟରେ ଏକ ମାରୁତି ସୁଜିକ୍ ସ୍ୱିଫ୍ଟି ଡିଜାୟାର କାର ସନ୍ଦେହ ଜନକ ଅବସ୍ଥାରେ ଠିଆ ହୋଇଥିଲା । ଏନେଇ ପୁଲିସ ଖବରପାଇ ଘଟଣାସ୍ଥଳରେ ପହଂଚି ଏହାର ଡିକି ଯାଂଚ କରିଥିବା ବେଳେ ସେଥିରେ ୩ଟି ଜରି ବସ୍ତା ରହିଥିଲା । ପୁଲିସ ଏହି ଗାଡ଼ି ଏବଂ ବସ୍ତାକୁ ଫାଣ୍ଡିକୁ ଆଣି ମାଜିଷ୍ଟେଡ୍ଙ୍କ ଉପସ୍ଥିତିରେ ଯାଂଚ କରିବା ପରେ ସେଥିରେ ୫୦ କେଜି ୨୦୦ ଗ୍ରାମ ଗଞ୍ଜେଇ ରହିଥିବା ଜଣାପଡ଼ିଥିଲା । ପୁଲିସ ଗାଡ଼ି, ଗଞ୍ଜେଇ ଏବଂ ଗାଡ଼ି ଭିତରେ ରହିଥିବା ବିଭିନ୍ନ ବ୍ୟାଙ୍କ ପାସବୁକ୍ ଏବଂ ଏଟିଏମ୍ କାଡ଼ ଜବତ କରିଥିବା ଜଣାଯାଇଛି । ଏହି ଘଟଣାର ତଦନ୍ତ ନୟାଗଡ଼ ଏସ୍ଡିପିଓ ନୀରଞ୍ଜନ ପାଢ଼ୀ କରୁଥିବା ବେଳେ ଚଢ଼ାଉରେ ମହୀପୁର ଫାଣ୍ଡି ଅଧିକାରୀ ରମେଶ ଦେବତା, ଏଏସ୍ଆଇ ପ୍ରମୋଦ କୁମାର ନନ୍ଦ ପ୍ରମୂଖ ସାମିଲ ହୋଇଥିଲେ । ଏହି ଘଟଣାରେ କାହାରିକୁ ଗିରଫ କରାଯାଇନଥିବା ସୂଚନା ମିଳିଛି ।
୫୦ କେଜି ଗଞ୍ଜେଇ ଓ କାର ଜବତ
