ପରିତ୍ୟକ୍ତ ବିଦ୍ୟାଳୟ ପାଲଟିଛି ମଦ୍ୟପଙ୍କ ଆଡ୍ଡାସ୍ଥଳୀ

ଖଣ୍ଡପଡ଼ା, (ବାଘୁଆବାର୍ତ୍ତା) : ଖଣ୍ଡପଡ଼ା ସହରର ଜେଲ ରୋଡ଼ରେ ଅବସ୍ଥିତ ଟାଉନ ବାଳିକା ପ୍ରାଥମିକ ବିଦ୍ୟାଳୟଟି ଏବେ ପରିତ୍ୟକ୍ତ ଅବସ୍ଥାରେ ପଡ଼ିରହିଛି । ଏହାର ସୁଯୋଗ ନେଇ ନିଶାଖୋର ବ୍ୟକ୍ତିମାନେ ସଞ୍ଜ ନଇଁଲେ ବିଦ୍ୟାଳୟ ପରିସର ଓ ବାରଣ୍ଡାରେ ଆଡ୍ଡା ଜମାଇ ମଦ୍ୟପାନ କରୁଥିବା ଅଭିଯୋଗ ହୋଇଛି । ସମୟେ ସମୟେ ଉକ୍ତ ସ୍ଥାନରେ ମଧ୍ୟ ଭୋଜି ଭାତର ଆସର ଜମୁଥିବା ଜଣାଯାଇଛି । ସୂଚନାଯୋଗ୍ୟ ଉକ୍ତ ବିଦ୍ୟାଳୟରେ ଛାତ୍ରଛାତ୍ରୀଙ୍କ ଉପସ୍ଥାନ କମ୍ ଯୋଗୁଁ ସରକାରଙ୍କ ନିର୍ଦ୍ଦେଶକ୍ରମେ ଖଣ୍ଡପଡ଼ା ରାମଚନ୍ଦ୍ର ଉଚ୍ଚ ବିଦ୍ୟାଳୟ ସହ ଉକ୍ତ ବିଦ୍ୟାଳୟର ମିଶ୍ରଣ ପକ୍ରିୟା ଶେଷ ହୋଇଥିବା ବ୍ଳକ ଶିକ୍ଷାଧିକାରୀଙ୍କ କାର୍ଯ୍ୟାଳୟ ସୁତ୍ରରୁ ଜଣାପଡିଛି । ବିଦ୍ୟାଳୟର ମିଶ୍ରଣ ପକ୍ରିୟା ପରେ ଶିକ୍ଷାବିଭାଗ କର୍ତୃପକ୍ଷ ବିଦ୍ୟାଳୟର ଶ୍ରେଣୀଗୃହ ଗୁଡିକରେ ତାଲା ଝୁଲାଈ ଦେଈଥିବା ବେଳେ ମୁଖ୍ୟ ଫାଟକଟି ଖୋଲା ପଡିଛି । ମଦ୍ୟପ ବ୍ୟକ୍ତିମାନେ ବିଦ୍ୟାଳୟ ପରିସରରେ ଭିଡ ଜମାଉଥିବା ବେଳେ କୁଢ କୁଢ ମଦ ବୋତଲ, ଅଈଁଠା ଖଲି ଓ ଠୁଙ୍ଗା ସେଠାରେ ପଡିଥିବା ନଜରକୁ ଆସୁଛି । ପ୍ରକାଶଥାଉକି ଉକ୍ତ ବିଦ୍ୟାଳୟର ଉନ୍ନତୀକରଣ ନିମନ୍ତେ ବିଭିନ୍ନ ସମୟରେ ଲକ୍ଷଲକ୍ଷ ଟଙ୍କା ଖର୍ଚ୍ଚ ହୋଇଥିଲେ ହେଁ ସରକାରଙ୍କ ସମ୍ପତିକୁ ସୁରକ୍ଷା ଦେବାରେ ବିଭାଗୀୟ ଅଧିକାରୀଙ୍କ ଅବହେଳାକୁ ନେଇ ସାଧାରଣରେ ତୀବ୍ର ପ୍ରତିକ୍ରୀୟା ପ୍ରକାଶପାଇଛି । ଖଣ୍ଡପଡା ସହରର ସର୍ବ ପୁରାତନ ଏହି ଶିକ୍ଷାନୁଷ୍ଠାନଟି୧୯୦୫ ମସିହାରେ ସ୍ଥାପିତ ହୋଇଥିବା ବେଳେ ଏହାର ରକ୍ଷଣାବେକ୍ଷଣ ଦିଗରେ ସ୍ଥାନୀୟ ପ୍ରଶାସନ ଓ ଶିକ୍ଷାବିଭାଗ ଉଚ୍ଚ କର୍ତୃପକ୍ଷ ଦୃଷ୍ଟିଦେବାଜୁ ଦାବିହେଉଛି ।