ନୟାଗଡ଼, (ବାଘୁଆବାର୍ତ୍ତା): ଗଣିଆ-କଣ୍ଟିଲୋ ରାସ୍ତାର ବାଙ୍କମୁଣ୍ଡିଆଠାରେ ଗଣିଆର ଜଣେ ଜିଓ କମ୍ପାନୀର କର୍ମଚାରୀଙ୍କୁ ମରଣାତ୍ମକ ଆକ୍ରମଣ କରି କିଛି ଅଜଣା ଦୁର୍ବୁତ୍ତ ତାଙ୍କ ଠାରୁ ୮୦ ହଜାର ଟଙ୍କା ଲୁଟ୍ କରି ନେଇଥିବା ଜଣାପଡିଛି । ଆକ୍ରମଣର ଶିକାର ହୋଇଥିବା ଯୁବକ ଜଣକ ଗଣିଆ ଥାନା ବିଜୟନଗର ଗ୍ରାମର କାମାକ୍ଷ ପ୍ରସାଦ ବେହେରା । ଘଟଣାରୁ ଜଣାପଡିଛି ସବୁଦିନ ଭଳି ଆଜି ମଧ୍ୟ କାମାକ୍ଷ ତାଙ୍କ ବାଇକ୍ ଯୋଗେ କଣ୍ଟିଲୋରୁ ଟଙ୍କା କଲେକସନ କରି ଗଣିଆ ଫେରୁଥିôବା ବେଳେ ଦିବା ୧୧ ଘଟିକା ସମୟରେ ବାଙ୍କମୁଣ୍ଡିଆଠାରେ କିଛି ଦୁବୁର୍ତ୍ତ ତାଙ୍କର ପିଛା କରି ତାଙ୍କୁ ଅଟକାଇଥିଲେ । ନିକଟରେ ଥିବା ପାହାଡ଼ ପାଖକୁ ତାଙ୍କୁ ନେଇ ତାଙ୍କ ମୁଣ୍ଡକୁ ଶକ୍ତ ଆଘାତ କରିବା ସହିତ ପ୍ରବଳ ମାଡ ମାରି ତାଙ୍କ ଠାରୁ ଟଙ୍କା ନେଇ ଫେରାର ହୋଇ ଯାଇଥିଲେ । କାମାକ୍ଷ ଚେତା ପାଇବା ପରେ ତାଙ୍କ ମାଲିକଙ୍କୁ ଫୋନ କରିଥିଲେ । ମାଲିକ ସେଠଶରେ ପହଞ୍ଚି ତାଙ୍କୁ ଉଦ୍ଧାର କରି ଗଣିଆ ମେକଡିକାଲରେ ଭର୍ତ୍ତି କରିଥିଲେ । ତାଙ୍କ ଅବସ୍ଥା ଅତ୍ୟନ୍ତ ସଙ୍କଟାପନ୍ନ ହେବାରୁ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଥିଲେ । ନୟାଗଡ଼ରେ ପହଞ୍ଚି ତାଙ୍କୁ ପୁଣି ଥରେ ଭୂବନେଶ୍ୱର ସ୍ଥାନାନ୍ତର କରାଯାଇଥିବା ଜିଓ ଷ୍ଟୋରର ମାଲିକ ସୁଧୀର ସାହୁ ଜଣାଇଛନ୍ତି । ଏପରିକି ଗୋଟିଏ କାରରେ ୪ ଜଣ ଆସି କାମାକ୍ଷଙ୍କୁ ଅଟକାଇଥିବା ଷ୍ଟୋର ମାଲିକ ଜଣାଇଛନ୍ତି । ହେଲେ ଗଣିଆ ଆମ୍ବୁଲାନ୍ସଟି ଆଡ଼କଟାରେ ରହୁଥିôବାରୁ ଆସିବାରେ ବିଳମ୍ବ ଘଟିବାରୁ ସେଠାରେ ଚାପା ଉତେଜନା ସୃଷ୍ଟି ହୋଇଥିଲା । ଗଣିଆ ଆମ୍ବୁଲାନ୍ସଟି ଗଣିଆ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ରଖିବାକୁ ସ୍ଥାନୀୟ ଲୋକେ ଦାବି କରିଛନ୍ତି । ଖବର ଲେଖା ହେବା ପର୍ଯ୍ୟନ୍ତ ଥାନାରେ ଅଭିଯୋଗ ହୋଇନଥିବା ଜଣାଯାଇଛି ।
