ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଏକ ପାହାଡ଼ ପର୍ବତ ଘେରା ଜିଲ୍ଲା ଭାବେ ପରିଚିତ ହୋଇଥିବା ବେଳେ ଏହାର ପରିବେଶ ଅତ୍ୟନ୍ତ ସୁନ୍ଦର । ଜିଲ୍ଲା ମଧ୍ୟରେ ଏଭଳି ଅନେକ ସ୍ଥାନ ରହିଛି, ଯାହାକୁ ନେଇ ଅନେକ ଇତିହାସ ରହିଛି । ସେହିଭଳି ଏକ ସ୍ଥାନ ହେଉଛି କେନ୍ଦୁଢିପି ଗ୍ରାମର ସୁକରମଲ୍ଲ ପାହାଡ଼ରେ ରହିଥିବା ସୁକରମଲ୍ଲ ଠାକୁରାଣୀଙ୍କ ପୀଠ । କେନ୍ଦୁଢିପି, ଇକିରି ଗ୍ରାମ ନିକଟବର୍ତ୍ତୀ ଏହି ପୀଠଟି ପାହାଡ଼ ଉପରେ ରହିଥିବା ବେଳେ ଏହାକୁ ନେଇ ଅନେକ ଐଚ୍ଛିହାସିକ କଥାବସ୍ତୁ ରହିଛି । କଳାପାହାଡ଼ ଆକ୍ରମଣ ସମୟରେ କିଭଳି ଠାକୁରାଣୀ ତାଙ୍କର ମାହାତ୍ମ୍ୟ ଦେଖାଇଥିଲେ ତାହା ଗ୍ରାମବାସୀଙ୍କ ମୁହଁରୁ ଶୁଣିବାକୁ ମିଳୁଛି । ଏହି ପୀଠକୁ ନେଇ ଏକ ସ୍ୱତନ୍ତ୍ର ଢଗ ରହିଛି, ୭ ମୁଣ୍ଡିଆ ୯ ଖୋଲ, ଚାଲ ଦେଖିବ ‘ସୁକରମଲ୍ଲ’ । ପ୍ରତ୍ୟେକ ବର୍ଷ ସୁକରମଲ୍ଲ ଠାକୁରାଣୀଙ୍କ ପୀଠରେ ବର୍ଷା ପାଇଁ ଗିରିପୂଜା ଅନୁଷ୍ଠିତ ହୁଏ । ଏହି ପୀଠର ସ୍ୱତନ୍ତ୍ରତା ପାଇଁ ଆଖପାଖ ଅଂଚଳର କିଛି ଉତ୍ସାହୀ ଯୁବକ ଆଜି ସେଠାରେ ଏକ ସୋଲାର ଲାଇଟ ବ୍ୟବସ୍ଥା କରିଥିବା ବେଳେ ଏହାକୁ ଇକୋ ଟୁରିଜିମ୍ ପକଳ୍ପ ମଂଜୁରୀ ପ୍ରଦାନ କରିବାକୁ ପ୍ରଶାସନ ପଦକ୍ଷେପ ନେବାକୁ ଦାବି କରିଛନ୍ତି ।
