ନୟାଗଡ଼, (ବାଘୁଆବାର୍ତ୍ତା) : ୫ ବର୍ଷର ନାବାଳିକା ପରୀ ହତ୍ୟା ଘଟଣାକୁ ନେଇ ସବୁଠି ସୃଷ୍ଟି ହୋଇଛି ଅସନ୍ତୋଷର ପରିସ୍ଥିତି । ନ୍ୟାୟ ଦାବିରେ ଯଦୁପୁର ଗ୍ରାମର ଶହ ଶହ ଲୋକ ନୟାଗଡ଼ ଖଣ୍ଡପଡ଼ା ପୂର୍ତ୍ତ ବିଭାଗ ରାସ୍ତାକୁ ଗାଁ ମୁଣ୍ଡରେ ଅବରୋଧ କରିଛନ୍ତି । ନାବାଳିକ ନିଖୋଜ ଘଟଣାକୁ ମାସେ ବିତିବାକୁ ବସିଥିବା ବେଳେ ଆଜି ଯଦୁପୁର ଗ୍ରାମବାସୀଙ୍କ ମଧ୍ୟରେ ଦୀର୍ଘଦିନ ଧରି କୁହୁଳୁଥିବା ଅସନ୍ତୋଷ ଆଜି ଉଗ୍ରଋପ ଧାରଣ କରିଛି । ଗ୍ରାମର ଶତାଧିକ ମହିଳା, ପୁରୁଷ କୋଭିଡ୍ ନିୟମକୁ ଭାଙ୍ଗି ପରୀକୁ ନ୍ୟାୟ ଦାବିରେ ରାଜରାସ୍ତାକୁ ଓହ୍ଲାଇଛନ୍ତି । ଗ୍ରାମବାସୀମାନେ ଗାଁ ମୁଣ୍ଡ ତଥା ନୟାଗଡ଼ ଖଣ୍ଡପଡ଼ା ରାସ୍ତାକୁ ଦୀର୍ଘ ସମୟ ଧରି ଅବରୋଧ କରିଛନ୍ତି । ଖବରପାଇ ବରିଷ୍ଠ ପୁଲିସ ଅଧିକାରୀ ଏବଂ ତହସିଲଦାର ଘଟଣାସ୍ଥଳରେ ପଂହଚି ୧୫ ଦିନ ମଧ୍ୟରେ ଦୋଷୀକୁ ଧରିବା ପାଇଁ ପ୍ରତିଶୃତି ଦେବା ପରେ ଆଜି ରାସ୍ତାରୋକ ହଟିଥିବା ଜଣାଯାଇଛି ।
ଅନ୍ୟପକ୍ଷେ, ଏହି ଘଟଣାକୁ ନେଇ ଆଜି ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପଦର୍ଶନ କରାଯାଇଛି । ୭ ଦିନ ମଧ୍ୟରେ ତଦନ୍ତ ପ୍ରକିୟାକୁ ଶେଷ କରି ଅଭିଯୁକ୍ତକୁ ଗିରଫ କରିବା ଦାବି ନେଇ ଆଜି ଏବିଭିପି ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଶାନ୍ତି ପୂଣ୍ଣ ବିକ୍ଷୋଭ କରାଯିବା ସହ ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କୁ ସ୍ମାରକ ପତ୍ର ପ୍ରଦାନ କରାଯାଇଛି । ଏହି କାର୍ଯ୍ୟକ୍ରମରେ ଜିଲ୍ଲା ସଂଯୋଜକ ପ୍ରିୟବ୍ରତ ମିଶ୍ର, ନଗର ସଂପାଦକ ଦିଲ୍ଲୀପ କୁମାର ନାୟକ, ସହ ସଂପାଦକ ରିଶି ପଟ୍ଟନାୟକ, ଆଲୋକ ବରାଡ଼, ସଚ୍ଚିକାନ୍ତ ବାଇ, ବିଶ୍ୱରଂଜନ ବେହେରା, ପ୍ରତାପ କୁମାର ପ୍ରଧାନ, ସୋମେଶ ପଟ୍ଟନାୟକ, ସୂର୍ଯ୍ୟପ୍ରସାଦ ଦାଶ, ଦେବବ୍ରତ ମିଶ୍ର, କୃପାସିନ୍ଧୁ ରାଉତ, ସୁନିଲ ବାଇ, ଚିତ୍ତରଂଜନ ଦାସ ପ୍ରମୂଖ ଯୋଗ ଦେଇଥିଲେ ।
