ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଶରଣକୁଳ ଥାନା ଅନ୍ତର୍ଗତ ପଂଚରିଡ଼ା ମାନପୁର ଗ୍ରାମର ଜଣେ ଯୁବକ ଗତକାଲି ଚିକିତ୍ସାଧିନ ଅବସ୍ଥାରେ ମୃତ୍ୟୁ ବରଣ କରିଥିବା ବେଳେ ତାଙ୍କର ଶବ ସତ୍କାର ପରେ ସ୍ୱାବ ରିର୍ପୋଟ ପଜିଟିଭ୍ ଆସିଥିବା ଜଣାଯାଇଥିଲା । ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ତାଙ୍କର ମୃତ୍ୟୁ ଘଟିଥିବା ବେଳେ ତାଙ୍କର ପୂର୍ବରୁ ଦେଇଥିବା ସ୍ୱାବ ନେଗେଟିଭ୍ ଆସିଥିବା କହି ଡାକ୍ତର ତାଙ୍କ ଶବକୁ ପରିବାର ଲୋକଙ୍କୁ ହସ୍ତାନ୍ତର କରି ଦେଇଥିଲେ । ସେ ଜଣେ ମେଳାପୀ ଯୁବକ ହୋଇଥିବାରୁ ଗ୍ରାମରେ ଶବ ପହଂଚିବା ପରେ ଏକ ଶୋକାକୂଳ ପରିସ୍ଥିତି ସୃଷ୍ଟି ହୋଇ ତାଙ୍କ ଶେଷ ଯାତ୍ରାରେ ଶତାଧିକ ଲୋକ ସାମିଲ ହୋଇଥିଲେ । ମାତ୍ର ଗତକାଲି ରାତିରେ ତାଙ୍କର କରୋନା ପଜିଟିଭ୍ ଆସିଥିବା ନେଇ ଜଣାପଡ଼ିବା ପରେ ଏବେ ମାନପୁର ଗାଁରେ ଭୟର ବାତାବରଣ ସୃଷ୍ଟି ହେବା ସହ ଗ୍ରାମର ୩ ଶହ ଲୋକଙ୍କ ଜୀବନ ପ୍ରତି ବିପଦ ଆଶଙ୍କା ଘନିଭୂତ ହୋଇଛି । ଏହି ଘଟଣା ଜଣାପଡ଼ିବା ପରେ ଆଜି ସ୍ଥାନୀୟ ସରପଂଚଙ୍କ ଉପରେ ଗ୍ରାମବାସୀ ଗରଗର ହେଉଥିବା ବେଳେ ସରପଂଚ ନାଚାର ପାଲଟିଥିବା ଜଣାଯାଇଛି । ପ୍ରାଥମିକ ଭାବେ ଉକ୍ତ ଅଂଚଳକୁ ସରପଂଚ ସାତଦିନିଆ ଅଘୋଷିତ ସଟ୍ଡାଉନ୍ କରିଥିବା ବେଳେ ଏନେଇ ପଂଚାୟତ କାର୍ଯ୍ୟାଳୟରୁ ଚିଠି କରିବାକୁ ପଂଚାୟତ ନିର୍ବାହୀଙ୍କୁ ଡାକିଲେ ମଧ୍ୟ ସେ ଆସୁନଥିବା ସରପଂଚ ପ୍ରକାଶ କରିଛନ୍ତି । କରୋନା ଭୟରେ ଏଭଳି ପରିସ୍ଥିତି ସୃଷ୍ଟି ହୋଇଥିବା ବେଳେ ଘଟଣା ସଂମ୍ପର୍କରେ ବାରମ୍ବାର ବିଡିଓଙ୍କୁ ଜଣାଇବା ପରେ, ସେ ଜିଲ୍ଲାପାଳଙ୍କ ସହ କଥା ହୋଇଥିବା କହୁଛନ୍ତି । ମାତ୍ର ଏଭଳି ଘଡ଼ି ସନ୍ଧି ମୂହୂର୍ତ୍ତରେ କ୍ଷମତା ପ୍ରାପ୍ତ ଜିଲ୍ଲାପାଳ ତଥା ସରପଂଚ କିଂ କର୍ତ୍ତବ୍ୟ ବିମୂଢ଼ ହୋଇପଡ଼ିଥିବା ବେଳେ ଗ୍ରାମବାସୀଙ୍କୁ ସେ କିଭଳି କରୋନା କବଳରୁ ରକ୍ଷା କରିବେ ସେ ନେଇ ଚିନ୍ତା ପ୍ରକଟ କରିଛନ୍ତି । ତାଙ୍କୁ ପ୍ରଶାସନ ପକ୍ଷରୁ ସହଯୋଗ କରାଯାଇ, ଉକ୍ତ ଅଂଚଳକୁ ସାନିଟାଇଜେସନ୍ କରାଯିବା ସହ ଅଂଚଳବାସୀଙ୍କ କରୋନା ପରୀକ୍ଷା କରାଇ ଚିକିତ୍ସା ସୁବିଧା ଯୋଗାଇ ଦେବାକୁ ନିବେଦନ କରିଛନ୍ତି । ଅନ୍ୟପକ୍ଷେ, ମୃତ ଯୁବକଙ୍କ ସ୍ୱାବ ୧ ତାରିଖରେ ସଂଗ୍ରହ ହୋଇଥିବା ବେଳେ ୩ ତାରିଖରେ ତାଙ୍କର ରିର୍ପୋଟ ପଜିଟିଭ୍ ଆସିଥିଲା । ୩ ତାରିଖରେ ଉକ୍ତ ବ୍ୟକ୍ତି ମୃତ୍ୟୁ ବରଣ କରିଥିବା ସ୍ପଷ୍ଟ ହୋଇଥିବା ବେଳେ ଉକ୍ତ ଯୁବକଙ୍କ ମୃତ୍ୟୁକୁ କରୋନା ମୃତ୍ୟୁ ଭାବେ ଗ୍ରହଣ କରିବାକୁ ପ୍ରସ୍ତୁତ ହେଉନଥିବା କାରଣ ନା ଅନ୍ୟ କିଛି କାରଣ ପାଇଁ ଏଭଳି ପରିସ୍ଥିତି ସୃଷ୍ଟି ହୋଇଛି ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ବିପଦରେ ୩ ଶହ ଜୀବନ : ଭିଏଲ୍ଡବ୍ଲ୍ୟୁ ଆସୁ ନାହାନ୍ତି, ବିଡିଓ କଥା ହୋଇଛନ୍ତି
