ନୟାଗଡ଼, (ବାଘୁଆବାର୍ତ୍ତା) : ଆଜି ସକାଳୁ ନୟାଗଡ଼ ସହର ସିଟିଲାଇଫ ମଲ ନିକଟରେ ଜଣେ ଅଜଣା ବ୍ୟକ୍ତି ଚେତାଶୂନ୍ୟ ଅବସ୍ଥାରେ ପଡ଼ିଥିବା ଦେଖାଯାଇଥିଲା । ଯାହାକୁ ନେଇ ସହର କିଛି ବ୍ୟକ୍ୟି ୧୦୮ ଆମ୍ବୁଲାନ୍ସକୁ ଯୋଗାଯୋଗ କରିବାରୁ, ଆମ୍ବୁଲାନ୍ସ ସେବା ପକ୍ଷରୁ ଅପରିଚିତ ଲୋକଙ୍କୁ ଡାକ୍ତରଖାନା ନେବାକୁ ସିଧାସିଧା ମନା କରି ଦିଆଯାଇଥିଲା । ଏପରିସ୍ଥଳେ ଖବରପାଇ ନୟାଗଡ଼ ଟାଉନଥାନା ପୁଲିସ ଏସ୍ଆଇ ଧର୍ମେନ୍ଦ୍ର ଶିଆଳଙ୍କ ସହ ଅନ୍ୟକିଛି ପୁଲିସ କର୍ମଚାରୀ ଘଟଣାସ୍ଥଳରେ ପହଂଚି ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ କର୍ମଚାରୀ ଏବଂ ପୁଲିସ ମିଳିତ ଉଦ୍ୟମରେ ଉକ୍ତ ବ୍ୟକ୍ତିଙ୍କୁ ଉଦ୍ଧାର କରାଯାଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତୀ କରାଯାଇଥିବା ବେଳେ ସେ ଏବେ ସୁସ୍ଥ ଥିବା ଜଣାଯାଇଛି । ଗତକାଲି ରାତିରେ ଏହି ବ୍ୟକ୍ତି କୈାଣସି ଏକ ବସରୁ ଓହ୍ଲାଇ ଥିବା ବେଳେ ତାହା ପରର ଘଟଣା ତାଙ୍କର କିଛି ମନେ ନଥିବା କହିଛନ୍ତି । ବସ ଭିତରେ ତାଙ୍କୁ କେହି କିଛି ନିଶା ଦ୍ରବ୍ୟ ସେବନ କରାଇ ଦେଇଥିବା ଅନୁମାନ କରାଯାଉଛି । ଏହି ବ୍ୟକ୍ତି ଜଣଙ୍କ ହେଲେ ଗଞ୍ଜାମ ଜିଲ୍ଲା ଭଂଜନଗର ଥାନା ଅନ୍ତର୍ଗତ ଗିରୁଣ୍ଡି ଗ୍ରାମର ଭଗବାନ ବେହେରାଙ୍କ ପୁଅ ଦେବରାଜ ବେହେରା । ଅନ୍ୟପକ୍ଷେ, ସରକାରଙ୍କଠାରୁ କୋଟି କୋଟି ଟଙ୍କା ଅନୁଦାନ ପାଉଥିବା ୧୦୮ ଆମ୍ବୁଲାନ୍ସ ସେବା ଯେଉଁଠି ଅସୁସ୍ଥଙ୍କୁ ଉଠାଇବାକୁ ଅନିଚ୍ଛା ପ୍ରକାଶ କଲା, ସେ ସ୍ଥାନରେ ପୁଲିସ ଓ ଅଗ୍ନିଶମ କର୍ମଚାରୀଙ୍କ ଏଭଳି କାର୍ଯ୍ୟକୁ ସହରବାସୀ ବେଶ ପ୍ରଂଶସା କରିଛନ୍ତି । ଏହିପରି ଭାବେ ଗତକାଲି ରାତିରେ ନୟାଗଡ଼ ଟାଉନଥାନା ଏସ୍ଆଇ ସ୍ମୃତିରଂଜନ ମହାନ୍ତି ମଧ୍ୟ ପିଡବ୍ଲ୍ୟୁଡି ରାସ୍ତାରୁ ଜଣେ ନିଶାଗ୍ରସ୍ତ ବ୍ୟକ୍ତିଙ୍କୁ ଅଚେତ ଅବସ୍ଥାରେ ଉଦ୍ଧାର କରିଥିବା ଜଣାଯାଇଛି ।
