ନୟାଗଡ଼, (ବାଘୁଆବାର୍ତ୍ତା) : ତାଲା ବନ୍ଦ କଟକଣା କୋହଳ ହେବା ପରେ ଚାନ୍ଦପୁର ଅଂଚଳରେ ଡକାୟତ ଗ୍ୟାଙ୍ଗ ତୀବ୍ର ମାତ୍ରରେ ସକ୍ରିୟ ହୋଇଛନ୍ତି । ଚାନ୍ଦପୁର ଦେଇ ଯାଇଥିବା ୧୬ ନଂ ଜାତୀୟ ରାଜପଥକୁ ଡକାୟତ ଗୋଷ୍ଠୀ ଲୁଟ କରିବାର ମୁଖ୍ୟ ସୋତ୍ର ଭାବେ ଆପଣେଇଛନ୍ତି । ଗତକାଲି ବିଳମ୍ବିତ ରାତ୍ରିରେ ଚାନ୍ଦପୁର ବାଇପାସ୍ ନିକଟରୁ ମାରଣାସ୍ତ୍ର ଦେଖାଇ ଲଙ୍କା ବୋଝେଇ ଟ୍ରକକୁ ଡକାୟତ ଗୋଷ୍ଠୀ ଲୁଟି ନେଇଥିବା ବେଳେ ଚାନ୍ଦପୁର ପୁଲିସ ବେଶ ସଫଳତାର ସହ ଟ୍ରକ ଓ ଡ୍ରାଇଭରକୁ ଉଦ୍ଧାର କରିଥିବା ଜଣାଯାଇଛି । ସୂଚନାନୁସାରେ, ଲଙ୍କା ବୋଝେଇ ଟ୍ରକ ଆନ୍ଧ୍ରପ୍ରଦେଶରୁ ପଶ୍ଚିମବଙ୍ଗ ଅଭିମୂଖେ ଯାଉଥିବା ବେଳେ ଚାନ୍ଦପୁର ବାଇପାସ ନିକଟରୁ ଏକ ବୋଲେରୋ ଗାଡ଼ିରେ ୪ ଜଣ ଡକାୟତ ଆସି ଲଙ୍କା ଗାଡ଼ିରେ ଆଡ଼ ପକାଇଥିଲେ । ଟ୍ରକରୁ ହେଲପରକୁ ଓହ୍ଲାଇ ଦେଇ ଡକାୟତମାନେ ଗାଡ଼ି ଓ ଟ୍ରାଇଭରକୁ ନେଇ ଚମ୍ପଟ ମାରିଥିଲେ । ଟ୍ରକ ଡ୍ରାଇଭର ଚାଲି ଚାଲି ଆସି ପେଟ୍ରୋଲିଂ କରୁଥିବା ଚାନ୍ଦପୁର ପୁଲିସକୁ ଖବର ଦେଇଥିଲେ । ଖବରପାଇ ଚାନ୍ଦପୁର ପୁଲିସ ଜିପିଏସ୍ ସହାୟତାରେ ଟ୍ରକ୍କକୁ ପିଛା କରି କରିଥିଲେ । ଫଳରେ ଡକାୟତମାନେ ପୁଲିସ ଗାଡ଼ି ପିଛା କରୁଥିବା ଜାଣିପାରି ଟ୍ରକକୁ ବାଘମାରି ନିକଟ ଗୁଡ଼ମ ଜଙ୍ଗଲରେ ଛାଡ଼ି ଦେଇ ଫେରାର ହୋଇ ଯାଇଥିଲେ । ଘଟଣାସ୍ଥଳରେ ଚାନ୍ଦପୁର ପୁଲିସ ପଂହଚି ସୁରକ୍ଷିତ ଭାବେ ଟ୍ରକକୁ ଉଦ୍ଧାର କରି ଥାନାକୁ ଆଣିବା ସହ ତଦନ୍ତ ଚଳାଇଥିବା ଜଣାଯାଇଛି ।
