ନୟାଗଡ଼ ଓ ଦଶପଲ୍ଲାରେ ଶାନ୍ତିପୂର୍ଣ୍ଣ ରଥଯାତ୍ରା

ନୟାଗଡ଼, (ବାଘୁଆବାର୍ତ୍ତା) : ସୁପ୍ରିମକୋର୍ଟ ସାରା ଓଡ଼ିଶାରେ ରଥଯାତ୍ରା ପାଳନ କରିବାକୁ ବାରଣ କରିଥିବା କାରଣରୁ ନୟାଗଡ଼ ଜିଲ୍ଲାର କୈାଣସି ବି ସ୍ଥାନରେ ରଥ ଗଡ଼ିନଥିବା ଜଣାଯାଇଛି । ନୟାଗଡ଼ ଜଗନ୍ନାଥ ମନ୍ଦିରରେ ଆଜି ଦୋବତ୍ତର ମୁଖ୍ୟ ତଥା ଉପଜିଲ୍ଲାପାଳ ଲଗ୍ନଜିତ ରାଉତଙ୍କ ତତ୍ୱାବଧାନରେ ନୀତିକାନ୍ତି କରାଯାଇଛି । ଯେଭଳି କୈାଣସି ବିଶୃଙ୍ଖଳା ନହେବ ସେ ଦିଗରେ ନଜର ରଖାଯାଇଥିଲା । ନୟାଗଡ଼ ଜଗନ୍ନାଥ ମନ୍ଦିରରେ ପ୍ରଥମ ଥର ପାଇଁ ରଥଯାତ୍ରା ବନ୍ଦ ହୋଇଥିବା ବେଳେ ଆଜି ଅନେକ ଭକ୍ତ ଏହାକୁ ନେଇ ଅସନ୍ତୋଷ ବ୍ୟକ୍ତ କରିଥିଲେ । ଯାହାକୁ ନେଇ ମନ୍ଦିର ପାଖକୁ ଆସିଥିବା କିଛି ଭକ୍ତଙ୍କୁ ଆଜି ଦିନକ ପାଇଁ ଦର୍ଶନ ଅନୁମତି ଦିଆଯାଇଛି । ସେବାୟତମାନେ ଯଥାରୀତି ସଂମ୍ପର୍ଣ୍ଣ କରିଥିବା ଜଣାଯାଇଛି । ସେହିଭଳି ଦଶପଲ୍ଲାରେ କରୋନା କାରଣରୁ ରଥଯାତ୍ରା ବନ୍ଦ ହୋଇଥିବା ବେଳେ ମନ୍ଦିର ପରିସରରେ ଗୁଣ୍ଡିଚା ନୀତି ପାଳନ କରାଯାଇଛି । ଦଶପଲ୍ଲା ଗଡ଼ଜାତର କୁଞ୍ଜବନଗଡ଼ ଦଧିବାମନଜୀଉଙ୍କ ରଥ ନିର୍ମାଣ ସରିଥିବା ବେଳେ ଏଣ୍ଡୋମେଣ୍ଟ କମିଶନ ରଥଯାତ୍ରା ବନ୍ଦ କରିବା ନେଇ ନିର୍ଦ୍ଦେଶ ଦେଇଥିବାରୁ କେବଳ ବିଧି ରକ୍ଷା କରାଯାଇଛି । ଆଜି ଠାକୁରଙ୍କ ନୀତି ଅନୁସାରେ ପଂହଣ୍ଡି କରି ମନ୍ଦିର ସମ୍ମୁଖରେ ଥିବା ଗରୁଡ଼ଙ୍କ ଠାରେ ରଖା ଯାଇ ପୂଜା କରାଯାଉଛି । ନଅ ଦିନ ଯାତ୍ରା ସମସ୍ତ ବିଧି ଏହି ସ୍ଥାନରେ ପାଳନ କରାଯିବ ବୋଲି ଜଣାଯାଇଛି । ଅନୁରୂପ ଭାବେ ଦେଢ଼ସରଠାରେ ଥିବା ଦଧିବାମନ ଜୀଉ, ପୁରୁଣା ଦଶପଲ୍ଲାରେ ବିଜେ ଜଗନ୍ନାଥ ଜୀଉଙ୍କର ମନ୍ଦିର ପରିସରରେ ନୀତିକାନ୍ତି କରାଯାଇଛି ।