ଭୂବନେଶ୍ୱର, (ବାଘୁଆବାର୍ତ୍ତା) : ଓଡ଼ିଶା ଛତିଶଗଡ଼ ସୀମାନ୍ତରେ ସୃଷ୍ଟି ହୋଇଛି ଅଭାବନୀୟ ପରିସ୍ଥିତି । ହଜାର ହଜାର ଶ୍ରମିକ ଓଡ଼ିଶା ଭିତରକୁ ପଶିବାକୁ ଚେଷ୍ଟା କରି ବିଫଳ ହେବା ପରେ ସେଠାରେ ପରିସ୍ଥିତି ଭୟାବହ ହୋଇପଡ଼ିଛି । ବରଗଡ଼ ଜିଲା ସୀମାନ୍ତ ଲୁହୁରାଚଟି କୁ ହଜାର ହଜାର ପ୍ରବାସୀ ଶ୍ରମିକ ଆସି ପହଂଚିବାରୁ ସେଠାରେ ପରିସ୍ଥିତି ଅଣାୟତ୍ତ ହୋଇପଡିଛି । ରାତି 3 ଟାରୁ ପଶ୍ଚିମବଙ୍ଗ ଓଡିଶା ର ହଜାର ହଜାର ପ୍ରବାସୀ ଓ ଶ୍ରମିକ ଓଡିଶାକୁ ପ୍ରବେଶ କରିବା ପାଇଁ ପହଞ୍ଚିଥିଲେ । ମହାରାଷ୍ଟ୍ର ର ଶହ ଶହ ଗାଡ଼ିରେ ଲୋକେ ସୀମାରେ ପହଞ୍ଚିଯିବା ଫଳରେ ପ୍ରଶାସନ ବ୍ୟବସ୍ଥ ଠପ ହୋଇପଡିଥିଲା । ଶ୍ରମିକମାନେ ନାହିଁ ନ ଥିବା ଅସୁବିଧାର ସମ୍ବୁଖୀନ ହେବା ସହ କିଛି ଶ୍ରମିକ କ୍ଷୁବ୍ଧ ହୋଇ ରାସ୍ତା ରେ ବସିପଡିଥିଲେ ଫଳରେ ରାସ୍ତା ଜାମ ହୋଇଯାଇଥିଲା । ଛତିଶଗଡ଼ ଭିତରକୁ ପାଖା ପାଖି ପାଂଚ କିମି ପର୍ଯ୍ୟନ୍ତ ସଡକ ପଥରେ ରାସ୍ତା ଜାମ ରହିଥିଲା । ସକାଳେ ଅତିରିକ୍ତ ପୋଲିସ ପହଂଚି ପରିସ୍ଥିତି ଆୟତ୍ତ କରିବାକୁ ଚେଷ୍ଟା କରି ଥିବା ସତ୍ତ୍ୱେ ଦୀର୍ଘ ସମୟ ପର୍ଯ୍ୟନ୍ତ ଅବ୍ୟବସ୍ଥା ଲାଗି ରହିଥିଲା ।କିଛି ବସ ବରଗଡ଼ ରୁ ଆଣି ଶ୍ରମିକମାନଙ୍କୁ ଗନ୍ତବ୍ୟସ୍ଥଳକୁ ପଠାଯାଇଥିଲା । ସୀମାନ୍ତ ଲୁହୁରାଚଟି ରେ ରାତି 3 ଟାରୁ ପଞ୍ଜିକରଣ ବନ୍ଦ ରହିଥିବାରୁ ଏପରି ଅବ୍ୟବସ୍ଥା ହୋଇଥିବା ଜଣାପଡିଛି । ଅପରପକ୍ଷରେ ପ୍ରବାସୀ ଶ୍ରମିକମାନେ ଚାଲି ଚାଲି ଓଡିଶାକୁ ପ୍ରବେଶ କରିବାକୁ ଲାଗିଲେ । ଯାହାକୁ ନେଇ ପଣ୍ଡକିପାଲୀ ସରପଞ୍ଚ ପ୍ରମିଳା ନାଏକ ଲୁହୁରାଚଟି କୁ ସଡଡାଉନ ଘୋଷଣା କରିଥିଲେ । ଅନୁରୂପ ଭାବରେ ସୋହେଲା ସରପଞ୍ଚ ଜିତେନ୍ଦ୍ର ଭୋଇ ମଧ୍ୟ ସୋହେଲା କୁ ସଡଡାଉନ ଘୋଷଣା କରିଥିଲେ । ଫଳରେ ଉଭୟ ସ୍ଥାନରେ ଦୋକାନ ବଜାର ବନ୍ଦ ରହିଥିଲା । ତେବେ ବର୍ତ୍ତମାନ ସ୍ଥିତିରେ ପ୍ରବାସୀ ଶ୍ରମିକ ଙ୍କ ଆଗମନ କୁ ଦୃଷ୍ଟିରେ ରଖି ପ୍ରଶାସନିକ ବ୍ୟବସ୍ଥା ସୁଦୃଢ଼ କରିବାକୁ ଦାବି ହେଉଛି ।
