ଭୁବନେଶ୍ୱର, (ବାଘୁଆବାର୍ତ୍ତା): ରାଜ୍ୟରେ ପରିବାର ନିୟୋଜନ ଅସ୍ତ୍ରୋପଚାର ଲାଗି ପୁରୁଷମାନେ କୁଣ୍ଠାବୋଧ କରୁଛନ୍ତି । ଏପ୍ରିଲ୍ ୨୦୨୨ରୁ ମେ ୨୦୨୩ ଭିତରେ ମାତ୍ର ୧୪୬୭ ଜଣ ପୁରୁଷ ଅସ୍ତ୍ରୋପଚାର କରିଛନ୍ତି । ସ୍ୱାମୀମାନେ ଅସ୍ତ୍ରୋପଚାର ନାଁ ଶୁଣିଲେ ଧରାଛୁଆଁ ଦେଉନାହାନ୍ତି । ପୁଣି କିଏ କହୁଛି ମୋର ପୁରୁଷତ୍ୱ ଉପରେ ପ୍ରଭାବ ଆସିବ, ଆଉ କିଏ କହୁଛି ବଂଶରକ୍ଷାରେ ବାଧା ସୃଷ୍ଟିହେବ । ଏଭଳି ବିଭିନ୍ନ ବାହାନା ଦେଖାଇ ଲୁଚୁଛନ୍ତି । ବିବାହିତ ପୁରୁଷଙ୍କ ବନ୍ଧ୍ୟାକରଣ ପାଇଁ ଡାକ୍ତର ଓ ସ୍ୱାସ୍ଥକର୍ମୀ ଯେତେ ଚେଷ୍ଟା କଲେ ବି ଫେଲ୍ ମାରୁଛନ୍ତି । ସ୍ୱାମୀମାନେ ପତ୍ନୀଙ୍କୁ ବନ୍ଧ୍ୟାକରଣ ପାଇଁ ଆଗକୁ ଠେଲି ଦେଉଛନ୍ତି । ରାଜ୍ୟରେ ଏହି ବର୍ଷ ଭିତରେ ମୋଟ୍ ୯୩ ହଜାର ୨୩୬ଙ୍କ ବନ୍ଧ୍ୟାକରଣ ଅସ୍ତ୍ରୋପଚାର ହୋଇଛି । ସେଥିରୁ ୧୪୬୭ ଜଣ ପୁରୁଷ ଓ ୯୧୭୬୯ ମହିଳା ଅସ୍ତ୍ରୋପଚାର କରିଛନ୍ତି । ବଡ଼ କଥା ହେଲା ରାଜ୍ୟରେ ଉପାନ୍ତ ଓ ଦୁର୍ଗମ ଜିଲ୍ଲାରେ ପୁରୁଷ ବନ୍ଧ୍ୟାକରଣ ସଂଖ୍ୟା ଅଧିକ ରହିଛି । ହେଲେ ଉପକୂଳ ଅଞ୍ଚଳରେ ବନ୍ଧ୍ୟାକରଣ ସଂଖ୍ୟା ନଗଣ୍ୟ । କୋରାପୁଟରେ ୫୫୭, ରାୟଗଡ଼ାରେ ୨୦୩, ମାଲକାନଗିରିରେ ୧୦୩, ବାଲେଶ୍ୱର ୯୫, ଗଞ୍ଜାମରେ ୮୪, ଗଜପତିରେ ୬୧, ସୁନ୍ଦରଗଡ଼ରେ ୬୩ ଆଦି ରହିଛି । ହେଲେ ସୋନପୁରରେ ମାତ୍ର ୩, ଦେବଗଡ଼ରେ ୪, ଢ଼େଙ୍କାନାଳରେ ୫, ଅନୁଗୁଳରେ ୭, କଟକରେ ୧୭, ଖୋର୍ଦ୍ଧାରେ ୨୮, ନୟାଗଡ଼ରେ ୨୯, କେନ୍ଦ୍ରାପଡ଼ାରେ ୧୦, ପୁରୀରେ ୧୭ ଜଣ ଅସ୍ତ୍ରୋପଚାର କରିଛନ୍ତି । ସ୍ୱାସ୍ଥ୍ୟ ଓ ପରିବାର କଲ୍ୟାଣ ନିର୍ଦ୍ଦେଶାଳୟ ଉପ ନିର୍ଦ୍ଦେଶକ ଡାକ୍ତର ମୂରଲୀଧର ପାଢ଼ୀ କହିଛନ୍ତି, ଗତ ବର୍ଷ ଅପେକ୍ଷା ଚଳିତ ବର୍ଷ ଅଧିକ ପୁରୁଷ ବନ୍ଧ୍ୟାକରଣ ଅସ୍ତ୍ରୋପଚାର କରାଯାଇଛି । ହେଲେ ଆଶା ଜନିତ ସଫଳତା ହୋଇପାରୁନି । ମହିଳାଙ୍କ ଅପେକ୍ଷା ପୁରୁଷଙ୍କ ଅସ୍ତ୍ରୋପଚାର ପ୍ରକ୍ରିୟା ସହଜ ଓ ସରଳ । ସ୍ୱଳ୍ପ ସମୟ ଭିତରେ ଅସ୍ତ୍ରୋପଚାର ହୋଇ ଘରକୁ ଫେରିପାରିବେ ।
