ନୟାଗଡ଼, (ବାଘୁଆବାର୍ତ୍ତା): ଓଡ଼ିଶା ଛୁଇଁଥିବା ବାତ୍ୟା ଅମ୍ପନ ଆଜି ସ୍ଥଳଭାଗ ଛୁଇଁ ସାରିଥିବା ବେଳେ ବାତ୍ୟା ସମୟରେ ଘଟିଛି ଏକ ନିଆରା ଘଟଣା । ଅଗ୍ନିଶମ ବିଭାଗ ପାଇଁ ଆଜି ଏକ ନୂଆ ଜୀବନ ପୃଥିବୀ ପୃଷ୍ଠରେ ପାଥ ଥାପିଛି । ଦେବଦୂତ ସାଜିଛନ୍ତି ଅଗ୍ନିଶମ ବାହିନୀ । ସୂଚନାନୁସାରେ, ମହାକାଳପଡ଼ା ରୋଜାହର ଗ୍ରାମର ହାତୀମ୍ ସେଠୀଙ୍କ ପôତୀ ଜାନକୀ ସେଠୀ ଆଜି ବାତ୍ୟା ସମୟରେ ଗର୍ଭ ବେଦନା ପାଇଥିଲେ । ଏହି ସମୟରେ ରାସ୍ତା ଉପରେ ଅନେକ ଗଛ ଉପୁଡ଼ି ପଡ଼ିଥିଲା । ଏହି ଗଛକୁ ପାର ହୋଇ ଗର୍ଭବତୀଙ୍କୁ କିଭଳି ଡାକ୍ତରଖାନା ନିଆଯିବ ତାକୁ ନେଇ ଚିନ୍ତା ସୃଷ୍ଟି ହୋଇଥିଲା । ଖବରପାଇ ଅଗ୍ନିଶମ ବିଭାଗ କର୍ମଚାରୀ ରାସ୍ତାରୁ ଦ୍ରୁତଗତିରେ ଗଛକାଟି ଗର୍ଭବତୀଙ୍କୁ ଡାକ୍ତରଖାନା ଅଭିମୂଖେ ନେବାରେ ସଫଳ ହୋଇଥିଲେ । ବାଟରେ ଯିବା ସମୟରେ ଜାନକୀ ଏକ କନ୍ୟା ସନ୍ତାନ ଜନ୍ମ ଦେଇଥିବା ବେଳେ ଅଗ୍ନିଶମ ବିଭାଗ ତାଙ୍କୁ ତୁରନ୍ତ ଡାକ୍ତରଖାନାରେ ପହଂଚାଇବାରେ ସଫଳ ହୋଇଥିଲେ । ଏବେ ଉଭୟ ମାଆ ଓ ଶିଶୁକନ୍ୟା ସୁସ୍ଥ ଥିବା ଜଣାଯାଇଛି ।
