ଟ୍ୱିନ୍ସିଟିରେ ଦିନକୁ ଡିମାଣ୍ଡ୍ ୩ କେଜି

ଭୁବନେଶ୍ୱର, (ବାଘୁଆବାର୍ତ୍ତା): ଶହେ କି ଦୁଇ ଶହ ଗ୍ରାମ୍ ନୁହେଁ, ଗୋଟିଏ ଦିନରେ ଦ୍ୱୈତନଗରୀରେ ୩ କେଜିରୁ ଅଧିକ ବ୍ରାଉନ୍ସୁଗର୍ ବିକ୍ରି ହେଉଛି । କଲେଜ ପଢ଼ୁଆଙ୍କ ସଉକ ପାଇଁ ଆସିଥିବା ଏହି ଧଳାଜହର ଏବେ ସବୁ ବର୍ଗକୁ ଗ୍ରାସିଗଲାଣି । ବସ୍ତିରୁ ବସ୍ତିକୁ ମାଡ଼ିଗଲାଣି । ହେଲେ ପୁଲିସ ମାସକୁ ମାତ୍ର ଶହେ କି ଦୁଇ ଶହ ଗ୍ରାମ ବ୍ରାଉନ୍ସୁଗର୍ ଜବତ କରିପାରୁଛି । କାଁ ଭାଁ ଖୁଚୁରା ବେପାରୀଙ୍କୁ ବାନ୍ଧୁଛି । ମାଫିଆ କି ବଡ଼ ବେପାରୀଙ୍କୁ ଧରିପାରୁନି । କିଛି ବର୍ଷ ତଳେ ଏସ୍ଟିଏଫ୍ ପଞ୍ଝାରେ ପଡ଼ିଥିବା ସେକ୍ ରାଜା ରିମାଣ୍ଡ୍ ବେଳେ ସୂଚନା ଦେଇଥିଲା ଯେ, ସେ ବାଲେଶ୍ୱରର ଜଳେଶ୍ୱରରୁ ଭୁବନେଶ୍ୱରକୁ ବିଭିନ୍ନ ରୁଟ୍ରେ ଗୋଟିଏ ମାସରେ ପ୍ରାୟ ୧୫/୨୦ କେଜି ବ୍ରାଉନ୍ସୁଗର୍ ଚାଲାଣ କରୁଥିଲା । ଗତ ଏପ୍ରିଲ୍ ୧୧ରେ କୁଖ୍ୟାତ ବ୍ରାଉନ୍ସୁଗର୍ ବେପାରୀ ସେକ୍ ଜାମସେଦ୍କୁ ଏନ୍କାଉଣ୍ଟର୍ କରିଥିଲା ଭୁବନେଶ୍ୱର ପୁଲିସ୍ । ସେ ପୁଲିସ୍ ନିକଟରେ ମାନିଥିଲା ଯେ ସେ ମାସକୁ ୨୦ କେଜିରୁ ଅଧିକ ବ୍ରାଉନ୍ସୁଗର୍ ଆଣି ଭୁବନେଶ୍ୱରରେ ଖୁଚୁରା ବେପାରୀଙ୍କୁ ଯୋଗାଏ । ତାର ଅନ୍ୟ ୪ ଜଣ ସହଯୋଗୀ ମଧ୍ୟ ପ୍ରତି ମାସରେ ୧୦ରୁ ୧୨ କେଜି ବ୍ରାଉନ୍ସୁଗର୍ ଭୁବନେଶ୍ୱରକୁ ଆଣୁଥିଲେ । ଜଣେ ବରିଷ୍ଠ ପୁଲିସ ଅଧିକାରୀଙ୍କ ସୂଚନା ମୁତାବକ, ରାଜା ଓ ଜାମସେଦ୍ ଭଳି ୫ରୁ ୬ଜଣ ମାଫିଆଙ୍କ ସିଣ୍ଡିକେଟ୍ ଏବେ ରାଜଧାନୀରେ ସକ୍ରିୟ ଅଛି । ଯେଉଁ ପରିମାଣ ବ୍ରାଉନ୍ସୁଗର ଭୁବନେଶ୍ୱର ଓ କଟକକୁ ଆସୁଛି, ତାର ଅନୁମାନ କରିବା କଷ୍ଟକର । ତେବେ ଉପରୋକ୍ତ ତଥ୍ୟକୁ ତର୍ଜମା କଲେ, କଟକ-ଭୁବନେଶ୍ୱରର ନିଶାଡି଼ ଦିନକରେ ୩/୪ କେଜି ଧଳାଜହର ଗିଳିଦେଉଥିବେ । ନିଶା ବେପାରୀମାନେ ଗରାଖଙ୍କ ଡିମାଣ୍ଡ୍ ଅନୁସାରେ ଏହାକୁ ଯୋଗାଇ ପାରୁନାହାନ୍ତି । ପୁଲିସ ରେକର୍ଡ କହୁଛି, ଜାନୁଆରୀ ୧ ତାରିଖରୁ ଆଜି ପର୍ଯ୍ୟନ୍ତ ମାତ୍ର ୮୨ ଲକ୍ଷ ଟଙ୍କାର ବ୍ରାଉନ୍ସୁଗର୍ ଓ କୋଟିଏ ଟଙ୍କାର ଗଞ୍ଜେଇ ଜବତ କରାଯାଇଛି । ଏଥିସହ ବେଆଇନ୍ ନିଶା କାରବାର ଅଭିଯୋଗରେ ୭୮ ଜଣ ନିଶା ବେପାରୀଙ୍କୁ ଗିରଫ କରାଯାଇଛି । ମିଆଁମାରରୁ ବ୍ରାଉନ୍ସୁଗର୍ ବାଂଲାଦେଶରେ ପହଞ୍ଚୁଛି । ସେଠାରୁ ବାଲାଂଦେଶ ସୀମା ଦେଇ ପଶ୍ଚିମବଙ୍ଗର ଲାଲଗୋଲ୍ଲା ସହରରେ ବ୍ରାଉନ୍ସୁଗର ପହଞ୍ଚୁଛି । ବାଲେଶ୍ୱର ଜିଲ୍ଳାର ଜଳେଶ୍ୱର ସହର ହେଉଛି ମାଫିଆଙ୍କ ଆଡ୍ଡାସ୍ଥଳୀ । ସେଠାରୁ କାର, ବସ୍, ଟ୍ରକ ମାଧ୍ୟମରେ ପ୍ରଥମେ ଖୋର୍ଦ୍ଧା, ଜଟଣୀ, ପିପିଲିକୁ ବିପୁଳ ମାତ୍ରାରେ ବ୍ରାଉନ୍ସୁଗର୍ ପଠାଯାଉଛି । ମାଫିଆ ଖୋର୍ଦ୍ଧା ଓ ପୁରୀର ବିଭିନ୍ନ ସ୍ଥାନରେ ବ୍ରାଉନ୍ସୁଗର୍କୁ ଗଚ୍ଛିତ ରଖୁଛନ୍ତି । ସେଠାରୁ ଖୁଚୁରା ବେପାରୀମାନେ ଆଣି ଭୁବନେଶ୍ୱର ଗଳିକନ୍ଦିରେ ବିକ୍ରି କରୁଛନ୍ତି । ୧୯୮୫ ମସିହା ପୂର୍ବରୁ ଭୁବନେଶ୍ୱରରେ ବ୍ରାଉନ୍ସୁଗର୍ ବେପାର ନ ଥିଲା । ୧୯୮୬ରେ ଜଣେ କିମ୍ବା ଦୁଇ ଜଣ ବେପାରୀ କାରବାର କଲେ । ୨୦୦୦ ମସିହା ପରଠାରୁ ନିଶା ବେପାରୀ ଓ ନିଶାଡ଼ିଙ୍କ ସଂଖ୍ୟା ବଢ଼ିଲା । ହେଲେ ପୁଲିସ୍ ହାତରେ କେହି ଧରାପଡ଼ିନଥିଲେ । କମିଶନରେଟ୍ ପୁଲିସ୍ ୨୦୧୨ ଓ ୨୦୧୪ରେ ବ୍ରାଉନ୍ସୁଗର୍ ଜବତ କରିନାହିଁ କି କାହାକୁ ଗିରଫ କରିନାହିଁ । ୨୦୧୫ରେ କମିଶନରେଟ୍ ପୁଲିସ୍ କଟକ ଓ ଭୁବନେଶ୍ୱରରୁ ୮. ୭୧୦ ଗ୍ରାମ୍, ୨୦୧୬ରେ ୬୮୬.୫୫ ଗ୍ରାମ୍, ୨୦୧୭ରେ ୩୫୮.୦୨ ଗ୍ରାମ୍, ୨୦୧୮ରେ ୭୦୦ ଗ୍ରାମ୍ ଓ ୨୦୧୯ରେ ୧ କେଜି ୨ ଶହ ଗ୍ରାମ୍ରୁ ଅଧିକ ଧଳାଜହର ଜବତ କରିଛି । ୨୦୨୦-୨୨ କରୋନା କାଳରେ ବ୍ରାଉନସୁଗର୍ ଜବତ ପରିମାଣ ଖସିଥିଲା । ଏବେ ବର୍ଷକୁ ଭୁବନେଶ୍ୱରରୁ ୧୦/୧୫ କେଜି ଜବତ ହେଉଛି । ମାତ୍ର ମାଫିଆଙ୍କ ବିରୋଧରେ ଯେଉଁଭଳି କାର୍ଯ୍ୟାନୁଷ୍ଠାନ ହେବା କଥା ତାହା ହେଉନି ।