ନୟାଗଡ଼, (ବାଘୁଆବାର୍ତ୍ତା) : ରବିବାର ଦିନ ଦଶପଲ୍ଲା ବ୍ଲକ୍ ନଛିପୁର ଗ୍ରାମପଞ୍ଚାୟତ ଗମ୍ଭାରୀଖୋଲ ଗ୍ରାମଠାରେ କରାଯାଇଥିବା ଏକ ଦେଶୀ ବିହନ ସଂରକ୍ଷଣ ମେଳାରେ ଅନୁଷ୍ଠିତ ହୋଇଯାଇଛି । ବ୍ଲକ୍ର ଘୁଗୁଡିପଡ଼ା, ନଛିପୁର, ସରିଗଣ୍ଡା ଗ୍ରାମପଞ୍ଚାୟତର ଶତାଧିକ ଚାଷୀ, ମହିଳା ଏକତ୍ରିତ ହୋଇ ଆଜି ଏହା ଉପରେ ବିସ୍ତୃତ ଆଲୋଚନା କରିଥିଲେ । ନୂତନ ଚାଷ ପଦ୍ଧତିରେ ଅଧିକ ଅମଳକ୍ଷମ ଧାନ କୁହାଯାଉଥିବା ବିହନ ସମୟ ସମୟରେ ଗଜା ନହେବା, ଅଧିକ ସାର-ପିଡିଆ, କୀଟନାଶକ ଆବଶ୍ୟକ ହେଉଥିବା ଏବଂ ସର୍ବୋପରି ବିହନ ପୁରୁଣା ହେଲେ ଦ୍ୱିତୀୟ କିମ୍ବା ତୃତୀୟ ବର୍ଷରେ ତାହାର ଗଜା ପରିମାଣ କମିଯିବା ସମ୍ପର୍କରେ ବହୁ ପୁରାତନ, ବୟସ୍କ ଚାଷୀ ନିଜ ନିଜର ମତ ରଖିଥିଲେ । ଏହି ମେଳାରେ ପ୍ରାୟ ୨ଶହରୁ ଅଧିକ କିସମର ଧାନ ବିହନ ପ୍ରଦର୍ଶିତ କରାଯାଇଥିଲା । ଏହି ମେଳାରେ କୋରାପୁଟ, ରାୟଗଡ଼ା, ଗଞ୍ଜାମ, ଗଜପତି, ବଲାଙ୍ଗିର, ବଉଦ ପ୍ରଭୃତି ଜିଲ୍ଲାର ଅନେକ ବୟସ୍କ ଚାଷୀ ଯୋଗଦେଇ ସେମାନଙ୍କ ନିକଟରେ ଥିବା ପୁରୁଣା କିସମ ଧାନ, ମୁଗ, ବିରି, ମାଣ୍ଡିଆ, ଅଳସୀ, ବାଉଁଶଧାନ, ବାଜରା, ମକା, ଟମାଟୋ, ଲଙ୍କା, କନ୍ଦମୂଳ ଆଦି ପ୍ରଦର୍ଶିତ କରିବା ସହ ତାର ସହନଶୀଳତା, ଜଳ ଧାରଣ କ୍ଷମତା, ଅମଳ ଆଦି ବିଷୟରେ ପୁଙ୍ଖାନୁପୁଙ୍ଖ ଭାବେ ବର୍ଣ୍ଣନା କରିଥିଲେ ।
