ନୟାଗଡ, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଟାଉନଥାନା ଅନ୍ତର୍ଗତ ଚଣ୍ଡିବସ୍ତ ଗ୍ରାମରେ ଆଜି ସଂନ୍ଧ୍ୟାରେ ଗୋଷ୍ଠୀ ସଂଘର୍ଷ ଘଟି ଉଭୟ ପକ୍ଷରୁ ୧୦ରୁ ଉର୍ଦ୍ଧ୍ୱ ଲୋକ ଆହାତ ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତୀ ହୋଇଛନ୍ତି । ସୂଚନାନୁସାରେ, ଚଣ୍ଡିବସ୍ତ ଗ୍ରାମରେ ଦୁଇ ଗୋଷ୍ଠୀ ମଧ୍ୟରେ ପୂର୍ବରୁ ବିବାଦ ରହିଥିବା ବେଳେ ଆଜି ସଂନ୍ଧ୍ୟାରେ ଗ୍ରାମର ଜୀବନ ବିଶ୍ୱାଳ ଏବଂ ରମେଶ ପ୍ରଧାନଙ୍କ ମଧ୍ୟରେ କୈାଣସି କାରଣରୁ ନେଇ ବଚସା ସୃଷ୍ଟି ହୋଇଥିଲା । ଏହି ବଚସାରେ ଗ୍ରାମର ଲଗେନ ବିଶ୍ୱାଳ ଓ ଗଗନ ବିଶ୍ୱାଳ ଆସି ଜୀବନଙ୍କୁ ସହଯୋଗ କରିବା ପରେ ଘଟଣା ଉଗ୍ରଋପ ଧାରଣ କରିଥିଲା । ପ୍ରଥମେ ଉଭୟ ଗୋଷ୍ଠୀ ମଧ୍ୟରେ ଠେଲାମାଡ଼ ଆରମ୍ଭ ହୋଇ ଗାଁରେ ଠେଙ୍ଗା, ବାଡ଼ି, ଖଣ୍ଡା ଆଦି ବୁଲିଥିଲା । ଫଳରେ ଗ୍ରାମରେ ଦୁଇ ଗୋଷ୍ଠୀ ମଧ୍ୟରେ ହୋଇଥିବା ଏହି ଗଣ୍ଡଗୋଳରେ ଗ୍ରାମର ଗୋବିନ୍ଦ ପ୍ରଧାନ, ଭୀମସେନ ପ୍ରଧାନ, ବୁବୁନ ପ୍ରଧାନ, ରମେଶ ପ୍ରଧାନ, ବାନାମ୍ବର ପ୍ରଧାନ, ବାପି ପେଣ୍ଠୋଇ, ଲଣ୍ଡା ପେଣ୍ଠୋଇ, ନରସିଂହ ପ୍ରଧାନ, ମଂଜୁଲତା ବିଶ୍ୱାଳ, ଇନ୍ଦୁ ପ୍ରଧାନ ପ୍ରମୂଖ ଆହାତ ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତୀ ହୋଇଛନ୍ତି । ଖବରପାଇ ନୟାଗଡ଼ ଟାଉନଥାନା ପୁଲିସ ଗ୍ରାମରେ ପହଂଚି ଘଟଣାର ତଦନ୍ତ ଆରମ୍ଭ କରିଥିବା ବେଳେ ଗ୍ରାମରେ ଉତ୍ତେଜନାକୁ ପ୍ରଶମିତ କରିବାକୁ ବ୍ୟାପକ ପୁଲିସ ମୁତୟନ କରାଯାଇଛି । ଏଥିସହିତ ଜିଲ୍ଲା ମୁଖ୍ୟ ଚିକିତ୍ସାଳୟରୁ କିଛି ବ୍ୟକ୍ତିଙ୍କୁ ଚିକିତ୍ସା ପରେ ଛାଡ଼ି ଦିଆଯାଇଥିବା ବେଳେ ଅନ୍ୟକିଛି ବ୍ୟକ୍ତି ଚିକିତ୍ସାଧିନ ରହିଛନ୍ତି ।
