ଦେବଗଡ, (ବାଘୁଆବାର୍ତ୍ତା): ପ୍ରେମରେ ବ୍ରେକଅଫ ପରେ ପ୍ରେମିକାଙ୍କୁ ହତ୍ୟା କଲା ପ୍ରେମିକ । ଦେବଗଡ ଭାରତ ଫାଇନାନ୍ସରେ କାର୍ଯ୍ୟ କରୁଥିବା ଯୁବତୀଙ୍କ ହତ୍ୟା ଘଟଣାରେ ଏଭଳି ତଥ୍ୟ ସାମ୍ନାକୁ ଆସିଛି । ହତ୍ୟାକାରୀ ପ୍ରେମିକଙ୍କ ସମେତ ୨ ଜଣ ଅଭିଯୁକ୍ତଙ୍କୁ ପୋଲିସ ଗିରଫ କରିଥିବା ବେଳେ ଘଟଣାସ୍ଥାଳରେ ଆଜି ସିନ ରିକ୍ରେଏସନ କରାଯାଇଛି । ଗତ ମଙ୍ଗଳବାର ରାତି ପ୍ରାୟ ୧୧ ଟା ସମୟରେ ଭାରତ ଫାଇନାନ୍ସ ଅଫିସରେ କାମ କରୁଥିବା ସମ୍ବଲପୁର ଜିଲ୍ଲା କୁଚିଣ୍ଡା ଅଂଚଳର ରୀତା ସାହୁଙ୍କୁ ନିର୍ମମ ଭାବେ ହତ୍ୟା କରାଯାଇଥିଲା । ଏନେଇ ପୋଲିସ ଏକ ମାମଲା ରୁଜୁ କରିବା ସହ ତଦନ୍ତ ପରେ ପ୍ରେମ ଜନିତ ଘଟଣାକୁ ନେଇ ହତ୍ୟାକାଣ୍ଡ ହୋଇଥିବା ଜାଣିବାକୁ ପାଇଥିଲା । ରୀତା ବୁର୍ଲାରେ କାମ କରୁଥିବା ବେଳେ ରେଙ୍ଗାଲି ଥାନା ପଣ୍ଡଲୋଇ ଗ୍ରାମର ଅଶ୍ୱିନୀ ଷଣ୍ଢଙ୍କ ସହ ପ୍ରେମ ସମ୍ପର୍କ ଗଢି ଉଠିଥିଲା । ମାତ୍ର କିଛି ମାସ ତଳେ ଅଶ୍ୱିନୀଙ୍କ ଠାରୁ ରୀତା ଦୂରେଇ ଯାଇଥିଲେ । ଏହାକୁ କେନ୍ଦ୍ର କରି ଗତ ମଙ୍ଗଲବାର ରାତି ପ୍ରାୟ ୧୧ ଟା ସମୟରେ ରୀତାଙ୍କୁ ଛୁରିରେ ଆକ୍ରମଣ ପରେ ପଥର ଛେଚି ହତ୍ୟା କରାଯାଇଥିଲା । ଅଶ୍ୱିନୀ ତାଙ୍କର ଜଣେ ସହଯୋଗୀଙ୍କ ସହ ମିଶି ରୀତାଙ୍କୁ ହତ୍ୟା କରିଥିଲେ । ଏହି ଘଟଣାରେ ପୋଲିସ ଉଭୟଙ୍କୁ ଗିରଫ କରିଥିବା ବେଳେ ଅଧିକ ତଦନ୍ତ ଜାରି ରଖିଛି ।





