ନୟାଗଡ଼,(ବାଘୁଆବାର୍ତ୍ତା): ନୂଆଗାଁ ବିଡିଓ ଜଣେ ଯୁବକଙ୍କୁ ଲାଠି ପାହାର ଦେଇଥିବା ନେଇ ଅଭିଯୋଗ ହୋଇଛି । ସୂଚନାନୁସାରେ, ନୂଆଗାଁ ବ୍ଲକ ଅନ୍ତର୍ଗତ ମହୀପୁର ଗ୍ରାମର ରଥି ପ୍ରଧାନଙ୍କ ପୁଅ ଜିତେନ୍ଦ୍ର ପ୍ରଧାନ ଗତବର୍ଷ ତାଙ୍କ ଟାଟା ଏସ୍ସି ଗାଡ଼ିକୁ ବ୍ଲକ ଉନ୍ନୟନ କାର୍ଯ୍ୟରେ ଲଗାଇଥିଲେ । ନଳକୂପ ମରାମତିରେ ତାଙ୍କ ଗାଡ଼ି ଲଗା ଯାଇଥିବା ବେଳେ ଏବାଦକୁ ସେ ୧୪ ହଜାର ୫ ଶହ ଟଙ୍କା ପାଇବାକୁ ଗତକାଲି ବ୍ଲକକୁ ଯାଇ ବିଡିଓ ପ୍ରମୋଦ ଦଳବେହେରାଙ୍କୁ ଅଭିଯୋଗ କରିଥିଲେ । ବିଡିଓ ଅଭିଯୋଗ ଶୁଣିବା ପରେ ଏନେଇ ବଡ଼ବାବୁଙ୍କୁ କାହିଁକି ଟଙ୍କା ପ୍ରଦାନ କରାଯାଇ ନାହିଁ ବୋଲି ପଚାରି ବିଡିଓ ଯାଇ ତାଙ୍କ ଗାଡ଼ି ନିକଟରେ ପହଂଚି ସାରିଥିଲେ । ଫଳରେ ଜିତେନ୍ଦ୍ରଙ୍କ ଅଭିଯୋଗକୁ ବିଡିଓ ଅଣଦେଖା କରୁଥିବା ଦେଖି, ସେ ଅସନ୍ତୋଷ ବ୍ୟକ୍ତି କରି, ଆପଣଙ୍କ ଦେବେ ନାହିଁ ବୋଲେ ମତେ ମନା କରୁ ନାହାନ୍ତି, କାହିଁକି ବାରମ୍ବାର ଦୈାଡ଼ାଉଛନ୍ତି ବୋଲି ପ୍ରଶ୍ନ କରିଥିଲେ । ଏଥିରେ ବିଡିଓ ଉତ୍କ୍ଷ୍ରୀପ୍ତ ହୋଇ ତାଙ୍କ ଗାଡ଼ିରେ ଥିବା ଏକ ଲାଠି ଆଣି ଜିତେନ୍ଦ୍ରଙ୍କୁ ନିସ୍ତୁକ ପିଟିଥିବା ଅଭିଯୋଗ ହୋଇଛି । ମାଡ଼ ମାରିବା ସହ ବିଡିଓ ଅଶ୍ୱୀଳ ଭାଷାରେ ଗାଳି କରି ଗୋଇଠା ମାରି ତଡ଼ି ଦେଇଥିବା ନୂଆଗାଁ ଥାନାରେ ଅଭିଯୋଗ ହୋଇଛି । ଜଣେ ପ୍ରଶାସନିକ ଅଧିକାରୀ ଏଭଳି ମାଡ଼ ମାରିବା ଘଟଣାକୁ ନେଇ ବୁଦ୍ଧିଜୀବୀ ମହଲରେ ଦୃଢ଼ ନିନ୍ଦା କରାଯାଉଥିବା ବେଳେ ଘଟଣାକୁ ଚାପି ଦେବାକୁ ଉଦ୍ୟମ ଚାଲିଥିବା ଚର୍ଚ୍ଚା ହେଉଛି ।
