ବଲାଙ୍ଗୀର, (ବାଘୁଆବାର୍ତ୍ତା): ବଲାଙ୍ଗୀର ପୋଷ୍ଟ ଅଫିସରେ ଜାଲ୍ ସାର୍ଟିଫିକେଟ ଦେଇ ଚାକିରି ପାଇଁ ଆବେଦନ ମାମଲା । ଗୁମର ଖୋଲିଲା ବଲାଙ୍ଗୀର ଟାଉନ ଥାନା ପୋଲିସ । ରାଜ୍ୟ ତଥା ରାଜ୍ୟ ବାହାରର ବିଭିନ୍ନ ୟୁନିଭର୍ସିଟି ନାଁରେ ମାଳମାଳ ଜାଲ ସାର୍ଟିଫିକେଟ ଜବତ । ଜାଲ୍ ସାର୍ଟିଫିକେଟ ସିଣ୍ଡିକେଟର ମାଷ୍ଟର ମାଇଣ୍ଡ ମନୋଜ ମିଶ୍ର ଓ ଆଲୋକ ଉଦଗାତାଙ୍କ ସହ ୨୦ ଜଣଙ୍କୁ ଅଟକ ରଖିଛି ପୋଲିସ । ବଲାଙ୍ଗୀର କଲେଜ ଛକରେ ଥିବା ଏକ କୋଚିଂ ସେଣ୍ଟରରେ ପୋଲିସର ଚଢ଼ାଉ ଜାରି ରହିଛି । ଏଠି ତିଆରି ହେଉଥିଲା ଜାଲ ସାର୍ଟିଫିକେଟ । ଜିଲ୍ଲା ଶିକ୍ଷାଧିକାରୀ ଓ ତହସିଲଦାରଙ୍କ ସହ ବରିଷ୍ଠ ଅଧିକାରୀଙ୍କ ସିଲ୍ ଜବତ । ଲାପଟପ୍, କମ୍ପ୍ୟୁଟର ଓ ପ୍ରିଣ୍ଟର ସହ ବହୁ ଗୁରୁତ୍ୱପୂର୍ଣ୍ଣ ସମାଗ୍ରୀ ଜବତ ହୋଇଛି । ଗ୍ରାମୀଣ ଡାକ ସେବା ପଦବୀ ପାଇଁ ଆବେଦନ ବେଳେ ମାଳମାଳ ଜାଲ ସାର୍ଟିଫିକେଟ ଧରାପଡ଼ିଥିଲା । ଡାକ ବିଭାଗର ଯାଞ୍ଚ ବେଳେ ଧରାପଡ଼ିଛି ୩୭ରୁ ଅଧିକ ଜାଲ୍ ସାର୍ଟିଫିକେଟ । ପୋଷ୍ଟାଲ ଅଧୀକ୍ଷକ ରାଜେନ୍ଦ୍ର କୁମାର ପଟ୍ଟନାୟକ ବଲାଙ୍ଗୀର ଟାଉନ ଥାନାରେ ଏତଲା ଦେବା ପରେ ପୋଲିସ କାର୍ୟ୍ୟାନୁଷ୍ଠାନ ଗ୍ରହଣ କରିଛି । ୟୁପିରୁ ସାର୍ଟିଫିକେଟ ଇସ୍ୟୁ ହୋଇଥିବା କହି ବଲାଙ୍ଗୀରରେ ଏହି ନକଲି ସାର୍ଟିଫିକେଟ ତିଆରି ହେଉଥିବା ଜଣାପଡିଛି । ଏବେ ବି ଚଢ଼ାଉ ଜାରି ରହିଛି ।





