ନୟାଗଡ଼,(ବାଘୁଆବାର୍ତ୍ତା): ମାତୃ ଦିବସରେ ମା’କୁ ଝୁରିଲେ କରୋନା ଯୋଦ୍ଧା ତଥା ସୁନାଖଳା ଫାଣ୍ଡି ଅଧିକାରୀ ପ୍ରଦୀପ କୁମାର ସାମଲ । ଏହି ଉପ ଆରକ୍ଷୀ ନିରିକ୍ଷକ ନିଜ ଅଂଚଳରେ ଜନସଚେତନତା ସୃଷ୍ଟି କରିବାରେ ଜିଲ୍ଲାରେ କାର୍ଯ୍ୟ କରୁଥିବା ସବୁ ବିଭାଗ କର୍ମଚାରୀଙ୍କଠାରୁ ଆଗରେ ବୋଲି ଜଣାଯାଇଛି । ଗାଁ ଗାଁରେ ବୁଲି ଲୋକଙ୍କୁ ବୁଝାଇ, ଶୁଝାଇ ସେ ସଚେତନ କରିବା ସହ ବେଳେ ବେଳେ ସେ ତାଙ୍କର ନାଟକୀୟ ଢଙ୍ଗ ପାଇଁ ସମସ୍ତଙ୍କ ଦୃଷ୍ଟି ଆକର୍ଷଣ କରିବା ସହ କିଛି ବ୍ୟକ୍ତିଙ୍କ ଆକ୍ରୋଷର ଶୀକାର ମଧ୍ୟ ହେଉଛନ୍ତି । ତଥାପି ନିନ୍ଦା ଓ ଅପନିନ୍ଦାକୁ ଖାତିର ନକରି ତାଙ୍କର କର୍ତ୍ତବ୍ୟ କରି ଚାଲିଛନ୍ତି । ଏକକ ଅଭିନୟ ମାଧ୍ୟମରେ କରୋନା ସଚେତନତା କରି କିଛିଦିନ ହେବ ଚର୍ଚ୍ଚାରେ ରହିଥିବା ଏହି ଉପ ଆରକ୍ଷୀ ନିରିକ୍ଷକ ଆଜି ମାତୃଦିବସରେ ମା’କୁ ଝୁରିଛନ୍ତି । ସେ ତାଙ୍କ ଫେସବୁକ୍ ପେଜ୍ରେ ମା’ଙ୍କ ଫଟୋ ସେୟାର କରି ଏଭଳି କିଛି ଲେଖିଛନ୍ତି, ‘ମୋ ବୋଉକୁ ମୁଁ ଦୂରରେ ଥାଇ ମୁଣ୍ଡିଆ ମାରୁଛି, କାରଣ ଲୋକେ କହୁଛନ୍ତି ଆମେ କୁଆଡ଼େ କରୋନା ଯୋଦ୍ଧା । ଆମେ ଚାକିରୀ କରିଛୁ, ସମାଜର ମଙ୍ଗଳ ପାଇଁ କାମ କରୁଛୁ । ଆପଣମାନେ ମନେ ରଖିବା ଉଚିତ୍ ଜଣେ ପୁଲିସ ଚାକିରିଆ ତିନୋଟି ଚୁଲି ସହିତ ସଂମ୍ପର୍କ । ୧- ନିଜର କର୍ତ୍ତବ୍ୟ ସ୍ଥାନ, ୨- ନିଜର ପିଲାମାନେ ରହୁଥିବା ସ୍ଥାନ, ୩- ନିଜର ଜନ୍ମ ସ୍ଥାନ । ତେଣୁ ଇଚ୍ଛା ଥିଲେ ବି କିଛି କରି ପାରୁ ନାହିଁ । ଠିକ୍ ସମୟରେ ସମୟ ବାଧକ ସାଜୁଛି । ଫୋନରେ ବାପା ବୋଉଙ୍କ ସହିତ କଥା ହୋଇ ନିଜକୁ ସନ୍ତୁଷ୍ଟ କରୁଛି ।’ ଏଭଳି ହୃଦୟ ବିଦାରକ ମନର କଥା ଲେଖି ଶ୍ରୀଯୁକ୍ତ ସାମଲ ନିଜର କର୍ତ୍ତବ୍ୟ ଓ ଦାୟିତ୍ୱ ପ୍ରତି ନିଜର ପରାକାଷ୍ଟାକୁ ପ୍ରତିପାଦନ କରିଥିବା ବେଳେ କରୋନା ମୁକାବିଲା ପାଇଁ ଯାହା କଷ୍ଟ ପଡ଼ୁ ପଛେ, କର୍ତ୍ତବ୍ୟ କରିବାକୁ କେବେ ବି ପଛଘୁଂଚା ଦେବେ ନାହିଁ ବୋଲି କହିଛନ୍ତି ।
