ଓଡ଼ଗାଁ, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଓଡ଼ଗାଁ ବନାଞ୍ଚଳ ଅନ୍ତର୍ଗତ ଫାଶିପଲ୍ଲୀ ଶୁଳିଆ ସଂରକ୍ଷିତ ଜଙ୍ଗଲରୁ ବିଳମ୍ବିତ ରାତିରେ ବନବିଭାଗ ୨ ଶିକାରୀଙ୍କୁ ଗିରଫ କରିଛି। ସେମାନେ ହେଲେ ମଗରବନ୍ଧ ଗ୍ରାମର ରବି ପାତ୍ର (୫୩) ଓ ଅଜୟ କୁମାର ପାତ୍ର (୨୦)। ବନାଞ୍ଚଳ ଅଧିକାରୀ ନିଖିଳେଶ ମଲ୍ଲିକ ନେତୃତ୍ୱରେ ବନବିଭାଗର ଏକ ଟିମ ଫାଶିପଲ୍ଲୀ ଶୁଳିଆ ସଂରକ୍ଷିତ ଜଙ୍ଗଲରେ ପାଟ୍ରୋଲିଙ୍ଗ କରୁଥିବାବେଳେ ଅଭିଯୁକ୍ତଦ୍ୱୟ ବିଭିନ୍ନ ଶିକାର ସରଞ୍ଜାମ ଧରି ଜଙ୍ଗଲ ମଧ୍ୟରେ ପ୍ରବେଶ କରୁଥିବାବେଳେ ବନକର୍ମଚାରୀଙ୍କ ହାବୁଡ଼ରେ ପଡ଼ିଥିଲେ। ବନ କର୍ମଚାରିମାନେ ସେମାନଙ୍କ ଠାରୁ ଗୋଟିଏ ଦେଶୀ ବନ୍ଧୁକ ସମେତ ଅଫୁଟା ଗୁଳି, କଟୁରି, ଟର୍ଚ୍ଚ ଲାଇଟ, ଦିଆସିଲି, ସୁତୁଲୀ ବାଣ ଜବତ କରିଛନ୍ତି। ସେମାନଙ୍କ ବିରୁଦ୍ଧରେ ମାମଲା ରୁଜୁ କରାଯାଇ କୋର୍ଟଚାଲାଣ କରାଯିବ ବୋଲି ବନାଞ୍ଚଳ ଅଧିକାରୀ ସୂଚନା ଦେଇଛନ୍ତି।





