ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ସହର ଉପକଣ୍ଠରେ ନିର୍ମିତ ହାଉସିଂବୋର୍ଡ କଲୋନି ଏବେ ନିଶାଡ଼ି ଓ ଅସାମାଜିକଙ୍କ ଆଡ୍ଡାସ୍ଥଳୀ ପାଲଟିଛି । ନୟାଗଡ଼ ସହରର ପଶ୍ଚିମରେ ଜିଲ୍ଲାପାଳ ଏବଂ ଏସ୍.ପିଙ୍କ କ୍ୱାଟରଠାରୁ ଅତି ନିକଟରେ ନିର୍ମାଣ ହୋଇଥିବା ଏହି କଲୋନିରେ ଷ୍ଟେଟ୍ ହାଉସିଂ ବୋର୍ଡ଼ ୧୮୭ଟି କ୍ୱାର୍ଟର ଏବଂ ୫ଟି ଫ୍ଲାଟ ନିର୍ମାଣ କରିଛି । ଏହି କଲୋନିରେ ଏବେ ବାସଗୃହର ଫିନସିଙ୍ଗ କାମ ଶେଷ କରି ୨୦ ରୁ ୨୫ ପରିବାର ରହିଛନ୍ତି । ଅନ୍ୟ କିଛି ବାସଗୃହରେ ଲୋକମାନେ ରହିବା ପାଇଁ ଘର କାର୍ଯ୍ୟ କରୁଥିବା ବେଳେ ବହୁତ ଗୁଡ଼ିଏ ଘର ପରିତ୍ୟକ୍ତ ହୋଇପଡ଼ିରହିଛି । ଫଳରେ ପଡ଼ି ରହିଥିବା ପରିତ୍ୟକ୍ତ ଘର ଏବଂ ନିକଟସ୍ଥ ଅଂଚଳରେ ଏବେ ନିଶାଡ଼ି ଓ ଅସାମାଜିକଙ୍କ ଆଡ୍ଡାସ୍ଥଳୀ ପାଲଟିଛି । ଫଳରେ ଦିନ ଦ୍ୱିପହରରେ ମଧ୍ୟ ଏଠାରୁ ଲୁଟ ହେଉଥିବା ଜଣାଯାଇଛି । ଏଠାରେ ଘର ନେଇଥିବା ଶିକ୍ଷକ ତଥା କବି ଓ ଅନୁବାଦକ ଶରତ ଚନ୍ଦ୍ର ଆଚାର୍ଯ୍ୟ ନିଜର ଘରକୁ ବାସପୋଯୋଗୀ କରିବା ପାଇଁ ନିର୍ମାଣ କାର୍ଯ୍ୟ କରୁଛନ୍ତି । ଏମ୍ଆଇଜି ୨୧ ନଂ ଘର ନିର୍ମାଣ ପାଇଁ ଆବଶ୍ୟକ ଉପକରଣ ରଖିଥିବା ବେଳେ ଗୁରବାର ଦିନ ଦ୍ୱିପହରରେ କିଛି ଅସାମାଜିକ ବ୍ୟକ୍ତି ତାଙ୍କ ଘରର ତାଲା ଭାଙ୍ଗି ଏକ ପାଣି ପମ୍ପ ଚୋରୀ କରି ନେଇଥିବା, ସେ ଥାନାରେ ଅଭିଯୋଗ କରିଛନ୍ତି । ନିକଟରେ ଲାଗିଥିବା ଏକ ସିସିଟିଭିରେ ଚୋରୀ କରିବାକୁ ଆସିଥିବା ଦୁଇ ଯୁବକଙ୍କ ଫଟୋ କୟଦ ହୋଇଥିବା ବେଳେ ଏବେ ତାହା ତଦନ୍ତ ପରିସର ଭୁକ୍ତ ରହିଛି ।
