ନୟାଗଡ଼,(ବାଘୁଆବାର୍ତ୍ତା): କରୋନା ମହାମାରୀ ସମୟରେ ଅନ୍ୟତମ ଯୋଦ୍ଧା ଭାବେ ପରିଚିତ ଗଣମାଧ୍ୟମ ପ୍ରତିନିଧିଙ୍କୁ ସ୍ୱତନ୍ତ୍ର ସହାୟତା ଓ ପ୍ରୋତ୍ସାହନ ନେଇ ନୟାଗଡ଼ ଜିଲ୍ଲା ସାମ୍ବାଦିକ ସଂଘ ସଭାପତି ପ୍ରମୋଦ ପଟ୍ଟନାୟକ ଶନିବାର ଜିଲ୍ଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀଙ୍କ ନିକଟକୁ ଏକ ଦାବିପତ୍ର ପ୍ରଦାନ କରିଛନ୍ତି । ସୂଚନାନୁସାରେ, କରୋନା ଭୂତାଣୁକୁ ନେଇ ସାରା ବିଶ୍ୱ ଏବେ ଆତଙ୍କିତ । ଭାରତରେ ପ୍ରାୟ ୭୦ ପ୍ରତିଶତ ଲୋକ ଗ୍ରାମାଞ୍ଚଳରେ ରହୁଥିବା ବେଳେ ୨୬ ପ୍ରତିଶତ ଲୋକ ନିରକ୍ଷର ହୋଇଥିବାରୁ ସେମାନଙ୍କୁ ସାମାଜିକ ଦୂରତ୍ୱ ଏବଂ ସଙ୍ଗରୋଧ ବିଷୟରେ ଜଣାଇବା ଆଜିର ସମୟରେ ଏକ ବଡ଼ ଆହ୍ୱାନ । ସରକାରଙ୍କ ପ୍ରତ୍ୟେକଟି ସତର୍କ ସୂଚନା, ଚେତାବନୀ, ସହାୟତା ବିଷୟରେ ଜନସାଧାରଣଙ୍କୁ ବିଶ୍ୱାସଯୋଗ୍ୟ ଭାବେ ଅବଗତ କରାଇବା ଗୁରୁତ୍ୱପୂର୍ଣ୍ଣ ଦାୟିତ୍ୱ ଗଣମାଧ୍ୟମ ସୁଚାରରୂପେ ସମ୍ପାଦନ କରିଚାଲିଛି । ପ୍ରତ୍ୟେକ ବିଭ୍ରାନ୍ତିକର ଖବରରୁ ଦୂରେଇ ରହିବା ଓ କରୋନା ମହାମାରୀ ସମୟରେ ଲୋକଙ୍କୁ ପ୍ରତି ମୁହୂର୍ତ୍ତରେ ଅପ୍ଡେଟ୍ ରଖିବାର ଗୁରୁଦାୟିତ୍ୱ ଗଣମାଧ୍ୟମ ପ୍ରତିନିଧିମାନେ ନିଜ ମୁଣ୍ଡକୁ ନେଇଛନ୍ତି । ସରକାରୀ କର୍ମଚାରୀଙ୍କ ଭଳି ବେଦନଭୋଗୀ ନହୋଇ ସୁଦ୍ଧା ମହାମାରୀ ବିପତ୍ତି ବେଳେ ସାମ୍ବାଦିକମାନେ ସେମାନଙ୍କ ଦାୟିତ୍ୱବୋଧରୁ ଦୂରେଇ ଯାଇନାହାନ୍ତି । କରୋନାକୁ ପ୍ରତିହତ କରିବା ପାଇଁ ଦିନରାତି ଏକ କରିଦେଇଛନ୍ତି । ରାଜ୍ୟ ସରକାର ଡାକ୍ତର, ନର୍ସ, ସ୍ୱାସ୍ଥ୍ୟକର୍ମୀ, ଆଶାକର୍ମୀ, ଅଗ୍ନିଶମ ପ୍ରମୁଖଙ୍କୁ କରୋନା ଯୋଦ୍ଧା ଭାବେ ଘୋଷଣା କରିଛନ୍ତି । ସେମାନଙ୍କୁ ଆର୍ଥିକ ପ୍ରୋତ୍ସାହନ ଭଳି ଅନେକ ପ୍ୟାକେଜ ଘୋଷଣା କରିଛନ୍ତି । କିନ୍ତୁ ଦୁଃଖର ବିଷୟ, ନିଜ ଜୀବନକୁ ବାଜି ଲଗାଇ କରୋନାକୁ ମୁକାବିଲା କରିବା ପାଇଁ ସଂକଳ୍ପ ନେଇଥିବା ଅସଲ ବିନ୍ଧାଣୀ ଗଣମାଧ୍ୟମ ପ୍ରତିନିଧିମାନଙ୍କର ନିସ୍ୱାର୍ଥପର କାର୍ଯ୍ୟକୁ ସରକାର ସମ୍ପୂର୍ଣ୍ଣ ଅଣଦେଖା କରିଛନ୍ତି । ସାମ୍ପ୍ରତିକ ପରିସ୍ଥିତିରେ ଗଣମାଧ୍ୟମର ଗୁରୁତ୍ୱକୁ ବିଚାରକୁ ନେଇ କାର୍ଯ୍ୟରତ ସାମ୍ବାଦିକମାନଙ୍କୁ ସରକାର କରୋନାର ଅନ୍ୟତମ ଯୋଦ୍ଧା ଭାବେ ପରିଗଣିତ କରିବା ସଙ୍ଗେ ସଙ୍ଗେ ସ୍ୱତନ୍ତ୍ର ସହାୟତା ଏବଂ ପ୍ରୋତ୍ସାହନ ପ୍ରଦାନ କରିବା ନିମନ୍ତେ ଦାବି କରିଛନ୍ତି ।
ସାମ୍ବାଦିକଙ୍କୁ ପ୍ରୋତ୍ସାହନ ନେଇ ଜିଲ୍ଲାପାଳଙ୍କୁ ଦାବିପତ୍ର ଦେଲେ ସଭାପତି
