ନୟାଗଡ଼ରେ ରେକର୍ଡ଼, ସାଂସ୍କୃତିକ କାର୍ଯ୍ୟକ୍ରମରେ ୧୪ ଶହ ଛାତ୍ରଛାତ୍ରୀ ସାମିଲ

ନୟାଗଡ଼,(ବାଘୁଆବାର୍ତ୍ତା) : ସର୍ବଭାରତୀୟ ନୟାଗଡ଼ କପ୍ ଫୁଟବଲ୍ ଟୁର୍ଣ୍ଣାମେଣ୍ଟ ଫାଇନାଲ ମ୍ୟାଚ ଅବସରରେ ଆଜି ନୟାଗଡ଼ ଖେଳପଡ଼ିଆଠାରେ ଏକ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା । ନୟାଗଡ଼ ବିଧାୟକ ଡ. ଅରୁଣ କୁମାର ସାହୁଙ୍କ ପୃଷ୍ଟପୋଷକତାରେ ଆୟୋଜିତ ଏହି କାର୍ଯ୍ୟକ୍ରମକୁ ବିଭିନ୍ନ ବିଦ୍ୟାଳୟ ଖେଳଶିକ୍ଷକ ସହଯୋଗ କରିଥିଲେ । ବିଭିନ୍ନ ସ୍କୁଲ ଓ କଲେଜର ୧୪ ଶହ ଛାତ୍ରଛାତ୍ରୀ ଖେଳପଡ଼ିଆରେ ଏକାଠି ହୋଇଥିଲେ । ଛାତ୍ରଛାତ୍ରୀ ମାସଡ୍ରିଲ୍ କରିବା ସହ ଜୟ ହୋ, ରସରକେଲି ଓ ହିନ୍ଦୀ ରିମିସ୍କି ଗୀତରେ ନୃତ୍ୟ ପରିବେଷଣ କରିଥିଲେ । ୧୩ ସ୍କୁଲର ଛାତ୍ରଛାତ୍ରୀ ମଧ୍ୟରୁ ୮ଟି ଦଳ ନୃତ୍ୟୁ ପରିବେଷଣରେ ସାମିଲ ହୋଇଥିଲେ । ୩୦ ମିନିଟ ଧରି ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିବା ବେଳେ ଏତେ ସଂଖ୍ୟକ ଛାତ୍ରଛାତ୍ରୀ ଏକକାଳୀନ କାର୍ଯ୍ୟକ୍ରମରେ ସାମିଲ ହେବା ନୟାଗଡ଼ ପାଇଁ ଏକ ରେକର୍ଡ଼ ବୋଲି ବିଧାୟକ କହିଥିଲେ । ସେହିଭଳି ଭାବେ ବାହାରୁ ଆସିଥିବା ଖେଳାଳୀମାନେ ଏହି କାର୍ଯ୍ୟକ୍ରମକୁ ଉପଭୋଗ କରିବା ସହ ଏହା ବିରଳ ବୋଲି ମତ ଦେଇଥିଲେ । ସାଂସ୍କୃତିକ କାର୍ଯ୍ୟକ୍ରମ ନାଟ୍ୟ ନିର୍ଦ୍ଦେଶକ ଶରତ ଚନ୍ଦ୍ର ଆଚାର୍ଯ୍ୟ, ଶେଖ୍ ଅବଦୁଲ ଖାଲିକ, ନୃତ୍ୟ ନିର୍ଦ୍ଦେଶକ ନୀରଞ୍ଜନ ସାହୁ ପରିଚାଳନା କରିଥିଲେ । ହଜାର ହଜାର ଦର୍ଶକ ସାଂସ୍କୃତିକ କାର୍ଯ୍ୟକ୍ରମକୁ ଉପଭୋଗ କରିଥିଲେ ।