ନୟାଗଡ଼,(ବାଘୁଆବାର୍ତ୍ତା): ଓଡ଼ଗାଁ ବ୍ଳକ କୁରାଳ ଗ୍ରାମ ନେଳିଆସାହିର ପୂର୍ଣ୍ଣଚନ୍ଦ୍ର ପାତ୍ରଙ୍କ ପୁଅ ଅମ୍ରିତ ପାତ୍ର(୧୨) ନିଖୋଜ ହୋଇଥିଲା । ଘଟଣା ସମ୍ପର୍କରେ ସୂଚନା ପାଇବା ପରଠାରୁ ଓଡ଼ଗାଁ ପୁଲିସ ଛାନଭିନ ଆରମ୍ଭ କରିଥିଲା । ପ୍ରାଥମିକ ତଦନ୍ତ ଅନୁସାରେ ସ୍ଥାନୀୟ ଲୋକଙ୍କ କହିବା ଅନୁଯାୟୀ ଏକ ନିବୁଜ ପିକପ ଭ୍ୟାନ ଏଠାରେ ୨/୪ ଦିନ ହେବ କିଛି ସମୟ ରହିବା ପରେ ଏଠାରୁ ଚାଲି ଯାଉଥିଲା । ହେଲେ ଅମ୍ରିତର ବାପା ପୂର୍ଣ୍ଣଚନ୍ଦ୍ର ପାତ୍ର ଜଣେ ବ୍ୟବସାୟୀ ହୋଇଥିବାରୁ ପିକଅପ ଭ୍ୟାନଟି ସେଠାକୁ ଆସୁଥିବା ଭାବି ଲୋକେ ତା ସମ୍ପର୍କରେ ଧ୍ୟାନ ଦେଇନଥିଲେ । ଓଡ଼ଗାଁ ପୁଲିସ ଇତିମଧ୍ୟରେ ରାଜ୍ୟର ସମସ୍ତ ଥାନାକୁ ଘଟଣା ସମ୍ପର୍କରେ ଅବଗତ କରାଇଥିବା ବେଳେ ବାଳକ ଅମ୍ରିତର ଉଦ୍ଧାର ପାଇଁ ପ୍ରାଣପଣେ ଚେଷ୍ଟା ଜାରି ରଖିଥିଲା । ପ୍ରତିଦିନ ପରି ଅମ୍ରିତ ଗୁରୁବାର ସନ୍ଧ୍ୟା ୫ ବେଳେ ବେଙ୍ଗେଇ ସାହିକୁ ଟିୟୁସନ ଯାଉଥିଲା । ଅମ୍ରିତ ଫେରିବାର ୨/୩ ମିନିଟ ପରେ ନବମ ଶ୍ରେଣୀରେ ପଢ଼ୁଥିବା ଦିପ୍ତୀରଞ୍ଜନ ପରିଡ଼ା ସେହି ରାସ୍ତା ଦେଇ ଆସୁଥିବା ବେଳେ ଗୋଟିଏ ନିବୁଜ ପିକଅପ ଭ୍ୟାନ ସେଠାରୁ ବୁଲାଇ ପଳାଉଥିବା ଦେଖିବାକୁ ପାଇଥିଲା । ଦିପ୍ତୀରଞ୍ଜନ ସେ ସମୟରେ ଗାଡ଼ି ଉପରେ ଧ୍ୟାନ ଦେଇନଥିଲେ ମଧ୍ୟ ନିଖୋଜ ଘଟଣା ପରେ ଦିପ୍ତୀରଞ୍ଜନ ଗାଡି ବୁଲାଇବା କଥା ସମସ୍ତଙ୍କୁ କହିଥିଲା । ନିଖୋଜ ପରେ ଘର ଠାରୁ ଦେଢଶହ ମିଟର ଦୂର ଏକ ବାଉଁଶ ବୁଦା ମୁଳରେ ଅମ୍ରିତିର ସାଇକେଲ ପଡ଼ିଥିବା ଦେଖିବାକୁ ମିଳିଥିଲା । ଶୁକ୍ରବାର ସଂନ୍ଧ୍ୟାରେ ନାବାଳକର ଘରେ ନୟାଗଡ଼ ବିଧାୟକ ଡ଼ ଅରୁଣ କୁମାର ସାହୁ ପହଞ୍ଚି ପରିବାର ବର୍ଗଙ୍କୁ ଆଶ୍ୱାସନା ଦେଇଛନ୍ତି। ନୟାଗଡ଼ ଆରକ୍ଷୀ ଅଧୀକ୍ଷକ ଅଲେଖ ପହି ଘଟଣା ସ୍ଥଳ ପରିଦର୍ଶନ କରିବା ସହ ପରିବାର ବର୍ଗଙ୍କୁ ସାନ୍ତ୍ୱନା ଦେଇଥିଲେ । ସମସ୍ତ ଗ୍ରାମବାସୀ ଉକ୍ତ ଘଟଣାରେ ସହଯୋଗ କରିବା ପାଇଁ ଆରକ୍ଷ ଅଧୀକ୍ଷକ ନିବେଦନ କରିଥିଲେ ।

ଉକ୍ତ ଅଞ୍ଚଳରେ ଥିବା ସମସ୍ତ ସିସି ଟଭି ଯାଞ୍ଚ କରିବା ପାଇଁ ଓଡ଼ଗାଁ ପୁଲିସଙ୍କୁ ନିର୍ଦ୍ଦେଶ ଦେଇଥିଲେ । ଆରକ୍ଷୀ ଅଧୀକ୍ଷକଙ୍କ ସହିତ ଏସଡିପିଓ କିରଣ ହେମ୍ରମ ଓଡ଼ଗାଁ ଥାନା ଅଧିକାରୀ ପୁର୍ଣ୍ଣଚନ୍ଦ୍ର ପଟ୍ଟାୟତ ଓ ସ୍ଥାନୀୟ ସରପଞ୍ଚ ବିଜନ ପାଇକରାୟ ପ୍ରମୁଖ ଉପସ୍ଥିତ ରହିଥିଲେ । ଭୁବନେଶ୍ୱରରୁ ଏକ ଚାରି ଜଣିଆ ଡଗ ସ୍କ୍ୱାଡ ଟିମ ପହଞ୍ଚିଥିଲେ । ଏହି ଡଗ ସ୍କ୍ୱାଡ ଟିମ ବିଭିନ୍ନ ସ୍ଥାନରେ ତନାଘନା କରିଥିଲା । ଚାରି ଦିନ ହେଲା ପୁଲିସ ପାଇଁ ମୁଣ୍ଡ ବିନ୍ଧାର କାରଣ ପାଲଟିଥିବା ଅମ୍ରିତକୁ ଉଧାର କରାଯାଇଛି । ସୁଚନାସୁସାରେ କୁରାଳ ପଣ୍ଡିତ ସାହିର ଶୁସାନ୍ତ କୁମାର ପଣ୍ଡାଙ୍କ ଘରୁ ଅମ୍ରିତକୁ ଉଦ୍ଧାର କରାଯାଇଛି । ଶୁସାନ୍ତ ପଞ୍ଜାବରେ ରୁହନ୍ତି । ଆଜି ସକାଳ ୮ ଘଣ୍ଟିକା ସମୟରେ ଅମ୍ରିତ ଜଣେ ମହିଳାଙ୍କୁ ଡାକିଥିଲେ । ଉକ୍ତ ମହିଳା ଜଣକ ପାଣି ପାଇଁ ଯାଉଥିଲେ । ମହିଳା ଜଣକ ଅମ୍ରିତକୁ ଦେଖି ଗ୍ରାମବାସୀଙ୍କୁ ଖବର ଦେଇଥିଲେ । ସଙ୍ଗେ ସଙ୍ଗେ ହଜାର ହଜାର ଲୋକ ରୁଣ୍ଡ ହୋଇଯାଇଥିଲେ । ଅମ୍ରିତଙ୍କ ମା ଖବର ପାଇ ସ୍ଥାନୀୟ ସରପଞ୍ଚ ବିଜନ ପାଇକରାୟଙ୍କ ସହ ମିଶି ଉଦ୍ଧାର କରିଥିଲେ । ସୁଚନାମୁତାବକ ଅମ୍ରିତର କହିବା ଅନୁସାରେ ତାର ହାତଗୋଡ଼ ବାନ୍ଧି ରଖିଥିଲେ । ଖାଇବାକୁ ଦେଉଥିଲେ । ଓଡ଼ଗାଁ ପୁଲିସ ଖବର ପାଇ ସଙ୍ଗେ ସଙ୍ଗେ ଅମ୍ରିତ ଓ ତାଙ୍କ ମାକୁ ଆଣି ପଚରାଉଚୁରା ଯାରି ରଖିଛି । ନିଖୋଜ ଦିନ ଠାରୁ ଅମ୍ରିତ ସେହି ଘରେ ଥିଲେ ନା କାଲି ରାତିରେ ତାଙ୍କୁ ଛଡା ଯାଇଛି ଏହାକୁ ନେଇ ବିଭିନ୍ନ ପ୍ରଶ୍ନବାଚୀ ସୃଷ୍ଟି ହୋଇଛି? ଉକ୍ତ ଘରର ଚାବି କାହା ପାଖରେ ଥିଲା ? ଅମ୍ରିତ ସେଠାକୁ କିପରି ଆସିଲା ଓ କେହି କିପରି ଜାଣିପାରିଲେ ନାହିଁ ଏହାହିଁ ସମସ୍ତଙ୍କର ଦ୍ୱନ୍ଦ ବଢ଼ାଇଛି । ଏଥି ସହିତ ପିକପ ଭ୍ୟାନଟି କେଉଁଆଡେ ଗଲା ? ଏହାର ସମସ୍ତ ଗୁମର ପୁଲିସ ଖୋଲିବ ବୋଲି ସମସ୍ତେ ଆଶାବାଦି ଅଛନ୍ତି । ଏହି ଘଟଣାର ପର୍ଦ୍ଦାଫାସ କରିବା ପାଇଁ ଓଡ଼ଗାଁ ପୁଲିସକୁ ଓଡ଼ଗାଁର ସମସ୍ତ ସାମ୍ବାଦିକ ମାନେ ସମ୍ପୂର୍ଣ୍ଣ ତଥ୍ୟ ପ୍ରଦାନ କରି ଆସୁଥିଲେ । ନୟାଗଡ଼ ବିଧାୟକ ଡ.ଅରୁଣ କୁମାର ସାହୁ ଆସାମୀକୁ ଧରିବା ପାଇଁ ପ୍ରତିମୁହୁର୍ତ୍ତରେ ପୁଲିସ ସହିତ ଯୋଗାଯୋଗରେ ରହୁଥିଲେ ।





