ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ ଅନ୍ତର୍ଗତ ବାଣିଗୋଚ୍ଛା ଥାନା ନୂଆଗାଁ ପଂଚାୟତର ଗେନେଗେଣ୍ଡା ଗ୍ରାମରେ ଆଜି ଏକ ଅଭାବନୀୟ ଘଟଣା ଘଟିଛି । ଗ୍ରାମରେ କାର୍ଯ୍ୟରତ ଆଶାକର୍ମୀ ମାଧୁରୀ ନାୟକ ଲୋକଙ୍କୁ କରୋନା ସଚେତନତା କରୁଥିବା ବେଳେ କିଛି ଅସାମାଜିକ ବ୍ୟକ୍ତି ତାଙ୍କୁ ଗରମ ପେଜ ମାଡ଼ କରିଛନ୍ତି । ଏଥିରେ ମାଧୁରୀଙ୍କ ମୁହଁର ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହୋଇଥିବା ବେଳେ ତାଙ୍କୁ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତୀ କରାଯାଇଛି । ଖବରପାଇ ଡାକ୍ତରଖାନାରେ ଦଶପଲ୍ଲା ବିଡିଓ ଦେବୀ ପ୍ରସାଦ ମହାନ୍ତି ପହଂଚି ଘଟଣାର ଅନୁସନ୍ଧାନ କରିଥିବା ବେଳେ ବାଣିଗୋଚ୍ଛା ପୁଲିସ ସନ୍ଦେହରେ ଜଣେ ବ୍ୟକ୍ତିଙ୍କୁ ଅଟକ ରଖିଥିବା ଜଣାଯାଇଛି । ଅନ୍ୟପକ୍ଷେ, ଏହି କାଣ୍ଡ ଘଟାଇଥିବା ଅନେକ ଅସାମାଜିକ ବ୍ୟକ୍ତି ଗ୍ରାମରୁ ଫେରାର ହୋଇଯାଇଥିବା ଜଣାଯାଇଛି ।
