ଜିଲ୍ଲାପାଳ ଓ ମନ୍ତ୍ରୀଙ୍କ ତନାଘନା
ନୟାଗଡ଼,(ବାଘୁଆବାର୍ତ୍ତା) : ନୟାଗଡ଼ ଜିଲ୍ଲାକୁ ଆଜି ବାହାର ରାଜ୍ୟରୁ ଏକ ଶବ ପହଂଚିଛି । ଗତ କିଛିଦିନ ତଳେ ରଣପୁର ବ୍ଲକ ଅର୍ନ୍ତଗତ ଗଡ଼ବାଣିକିଲୋ ଗ୍ରାମକୁ ଉତ୍ତରପ୍ରଦେଶରୁ ଏକ ଶବ ଆସିଥିଲା । କରୋନା କଟକଣା ଯୋଗୁଁ ତାମିଲନାଡ଼ୁରେ ଅଟକି ରହିଥିବା ନୟାଗଡ଼ର ୨୦ ଜଣ ଶ୍ରମିକଙ୍କ ମଂଧ୍ୟରୁ ଜଣେ ଶ୍ରମିକଙ୍କ ମୃତ୍ୟୁ ଘଟିଥିବା ଜଣାପଡ଼ିଛି । ମୃତକ ନୟାଗଡ ଜିଲ୍ଲାର ନୋତର ପଂଚାୟତ ବଉଳସାହି ଗ୍ରାମର ଅମୀନ ପଢିଆରୀଙ୍କ ପୁତ୍ର ସଚ୍ଚିଦାନନ୍ଦ ପଢିଆରୀ (୩୫) ବୋଲି ଜଣାପଡିଛି । ତାଙ୍କର ଦୁଇଟି ଛୋଟ ଶିଶୁ କନ୍ୟା ଅଛନ୍ତି । ଦୁଇଦିନ ତଳେ ରାତିରେ ସଚ୍ଚିଦାନନ୍ଦଙ୍କ ପେଟ ମାରିବା ପରେ ତାଙ୍କର ଆକସ୍ମିକ ଭାବେ ମୃତ୍ୟୁ ଘଟିଥିଲା । ସୂଚନା ଯୋଗ୍ୟ ଯେ ସଚ୍ଚିଦାନନ୍ଦ ଜଣେ କନ୍ଟ୍ରାକ୍ଟରଙ୍କ ଜରିଆରେ ତାମିଲନାଡୁ ରାଜ୍ୟ କୋଇମ୍ବାଟୁର ଲକ୍ଷ୍ମୀମାଲିନା ଓାର୍କ୍ସ (ଏମଏମଡୁ୍ୟ) କମ୍ପାନୀକୁ କାମ କରିବାକୁ ଯାଇଥିଲେ ।
କରୋନା କଟକଣା ଯୋଗୁଁ ସଚ୍ଚିଦାନନ୍ଦ ଏବଂ ଅନ୍ୟ ୨୦ ଜଣ ଶ୍ରମିକ ନିଜ ଗ୍ରାମକୁ ଫେରିନପାରି ସେଠାରେ ଅଟକି ରହିଥିବା ବେଳେ ତାଙ୍କର ଏଭଳି ଅକାଳରେ ମୃତ୍ୟୁ ଘଟିଛି । ତାଙ୍କ ଶବ କିଭଳି ନୟାଗଡ଼କୁ ଆସି ପାରିବ ସେ ସମ୍ପର୍କ ରେ ମନ୍ତ୍ରୀ ଡ. ଅରୁଣ କୁମାର ସାହୁଙ୍କ ସହିତ ସ୍ଥାନୀୟ ଜନପ୍ରତିନିଧି ଆଲୋଚନା କରିଥିଲେ । ମନ୍ତ୍ରୀ ଡ. ସାହୁ, ଜିଲ୍ଲାପାଳ ଡ. ପୋମା ଟୁଡୁ ଏବଂ ସହକାରୀ ଶ୍ରମ ଅଧିକାରୀ ଲୋକନାଥ ପଣ୍ଡାଙ୍କ ଦୃଷ୍ଟି ଆକର୍ଷଣ କରି ଶବ କିପରି ନିଜ ଗ୍ରାମକୁ ଆସିପାରିବ ସେଥିପ୍ରତି ଅନେକ ପଦକ୍ଷେପ ନେଇଛନ୍ତି । ଫଳରେ ମୃତକଙ୍କ ଶବ ବ୍ୟବଛେଦ କରାଯାଇ ତାମିଲନାଡୁରୁ ନୟାଗଡ଼ରେ ପହଂଚିଛି । ପ୍ରଶାସନ ପକ୍ଷରୁ ବ୍ୟାପକ ପୋଲିସ ଓ ସ୍ୱାସ୍ଥ୍ୟ ବିଭାଗର ସହଯୋଗ ନିଆଯାଇଛି । ଜନଗହଳି ଯେପରି ନହେବ ସେଥିପ୍ରତି ଦୃଷ୍ଟି ଦିଆଯାଇଛି । ରାତି ୩ଟାରେ ଗ୍ରାମରେ ଶବ ପହଂଚିବା ପରେ ଶୋକାକୂଳ ପରିବେଶରେ ଶବ ସତ୍କାର କରାଯାଇଛି । ଶବ ଧରି ଫେରିଥିବା ତିନି ଜଣ ବ୍ୟକ୍ତିଙ୍କୁ କ୍ୱାରେଣ୍ଟାଇନରେ ରଖାଯାଇଛି ।
