ଚାନ୍ଦପୁର ଗୋଷ୍ଠୀ ସଂଘର୍ଷ

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ ରଣପୁର ଅନ୍ତର୍ଗତ ଚାନ୍ଦପୁର ଥାନା ଅଂଚଳରେ ଆଜି ଏକ କାଜୁ ଜଙ୍ଗଲକୁ କେନ୍ଦ୍ର କରି ଦୁଇ ଗୋଷ୍ଠୀ ସଂଘର୍ଷ ଘଟଣାରେ ମୃତକଙ୍କ ଶବ ରଖି ଥାନା ସମ୍ମୁଖରେ ଧାରଣା ଦିଆଯାଇଥିଲା । ଖବରପାଇ ନୟାଗଡ଼ ଉପଜିଲ୍ଲାପାଳ ଲଗ୍ନଜିତ ରାଉତ ଘଟଣାସ୍ଥଳରେ ପହଂଚି ଉତ୍ୟକ୍ତ ଲୋକଙ୍କୁ ବୁଝାଶୁଝା ପରେ ସହାୟତା ଘୋଷଣା କରିଥିଲେ । ଫଳରେ ଆନ୍ଦୋଳନ ପ୍ରଶମିତ ହୋଇଛି । ସୂଚନାନୁସାରେ, ଚାନ୍ଦପୁର ଥାନା ଅନ୍ତର୍ଗତ ରାଇପଡ଼ା ଗାଁରେ କାଜୁ ଜଙ୍ଗଲକୁ ସେଇ ଗାଁର ବେଣୁଧର ପ୍ରଧାନ ନିଲାମ ଆଣି ଜଗାରଖା କରୁଥିଲେ । ଯାହାକୁ ନେଇ ଗାଁର ଅନ୍ୟ ଗୋଷ୍ଠୀ ସହ ବିବାଦ ସୃଷ୍ଟି ହୋଇଥିଲା । ଗତକାଲି ବେଣୁଧର କିଛି ଶ୍ରମିକଙ୍କୁ ନେଇ କାଜୁ ଜଙ୍ଗଲରୁ କାଜୁ ମଂଜି ସଂଗ୍ରହ କରୁଥିବା ଅନ୍ୟ ଗୋଷ୍ଠୀର ୨୫ରୁ ଉର୍ଦ୍ଧ୍ୱ ଯୁବକ ବିଭିନ୍ନ ମାରଣାସ୍ତ୍ର ଧରି ଅତର୍କିତ ଆକ୍ରମଣ କରିଥିଲେ । ଫଳରେ ସେଠାରେ କାମ କରୁଥିବା ଦୁର୍ଗା ପ୍ରଧାନ ଓ ବିରଂଚି ପ୍ରଧାନଙ୍କ ଘଟଣା ସ୍ଥଳରେ ମୃତ୍ୟୁ ଘଟିଥିବା ବେଳେ ମୋଟ ୧୧ ଜଣ ଆହାତ ହୋଇଥିଲେ । ସେମାନଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ସଙ୍କଟାପର୍ଣ୍ଣ ଥିବାରୁ ତାଙ୍କୁ ପ୍ରଥମେ ଚାନ୍ଦପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ପରେ ଭୂବନେଶ୍ୱର ସ୍ଥାନାନ୍ତରିତ କରାଯାଇଥିଲା । ମାତ୍ର ମୃତ ଦୁର୍ଗାଙ୍କ ପରିବାର ଥାନା ସମ୍ମୁଖରେ ଶବ ରଖି କ୍ଷତି ପୂରଣ ଦାବି କରି ଆନ୍ଦୋଳନ ଚଳାଇଥିଲେ । ଆଜି ଉପଜିଲ୍ଲାପାଳ ଘଟଣାସ୍ଥଳରେ ପହଂଚି ଉତ୍ୟକ୍ତ ଲୋକଙ୍କୁ ବୁଝା ଶୁଝା କରିବା ସହ ରେଡକ୍ରସ ପାଣ୍ଠିରୁ ଦଶ ହଜାର ଟଙ୍କାର ସହାୟତା ଘୋଷଣା କରିଥିବା ବେଳେ ମୃତକଙ୍କ ପôତୀଙ୍କୁ ଭତ୍ତା ସହ ଆବାସ ଯୋଜନାରେ ଗୃହ ପ୍ରଦାନ କରାଯିବା ସହ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ସହାୟତା ପ୍ରଦାନ କରାଯିବାକୁ ଘୋଷଣା କରିଛନ୍ତି । ପରେ ଆନ୍ଦୋଳନ ପ୍ରଶମିତ ହୋଇଥିବା ଜଣାଯାଇଛି ।