ଜୟପୁର, (ବାଘୁଆବାର୍ତ୍ତା): ଜୟପୁର ପାରାବେଡ଼ାରେ ଥିବା ଅରବିନ୍ଦନଗର ସରସ୍ବତୀ ଶିଶୁ ବିଦ୍ୟା ମନ୍ଦିରର ଜଣେ ଛାତ୍ରଙ୍କ ଅସ୍ବାଭାବିକ ମୃତ୍ୟୁ ହୋଇଛି। ମୃତ ଛାତ୍ରଙ୍କ ପରିଚୟ ଶିବାଶିଷ ନାୟକ। ସବୁ ଦିନ ପରି ସେ ଗୁରୁବାର ସ୍କୁଲ୍ ଯାଇଥିଲେ। ପରୀକ୍ଷା ମଧ୍ୟ ଦେଇଥିଲେ। ହେଲେ ଘରକୁ ଫେରିବା ପରେ କୌଣସି କାରଣରୁ ଛାତ ଉପରକୁ ଦୀର୍ଘ ସମୟ ଯାଏଁ ଯାଇଥିଲେ। ପରେ ପରିବାର ଲୋକ ତାଙ୍କୁ ଅଚେତ ଅବସ୍ଥାରେ ଛାତରୁ ଉଦ୍ଧାର କରିଥିଲେ। ସେହି ସମୟରେ ତାଙ୍କ ମୁହଁରୁ ଫେଣ ବାହାରୁଥିଲା। ସେ ବିଷ ପିଇ ଆତ୍ମହତ୍ୟା କରିଥିବା କିମ୍ବା କିଏ ତାଙ୍କୁ ବିଷ ମିଶାଇ ଖାଇବାରେ ଦେଇଥିବା ପରିବାର ଲୋକ ସନ୍ଦେହ କରି ଜୟପୁର ଟାଉନ ଥାନାରେ ଏତଲା ଦେଇଛନ୍ତି। ତେବେ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ଟଙ୍କା ପାଇଁ କିଛି ଛାତ୍ର ଓ ଅଣଛାତ୍ର ତାଙ୍କୁ ଧମକ ଦେଉଥିବାରୁ ସେ ମାନସିକ ଚାପରେ ଥିଲେ ବୋଲି ପରିବାର ଲୋକ କହିଛନ୍ତି। ଏନେଇ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।





