ନୟାଗଡ଼,(ବାଘୁଆବାର୍ତ୍ତା): ଦୁଇ ଭାଇଙ୍କୁ ମହଙ୍ଗା ପଡ଼ିଛି ଗାଡ଼ି ଶିଖିବା । ଗାଡ଼ି ଶିଖିବା ବେଳେ ଦୁର୍ଘଟଣା କାରଣରୁ ନାବାଳକ ଦୁଇ ଭାଇଙ୍କ ମଧ୍ୟରୁ ବଡ଼ ଭାଇର ମୃତ୍ୟୁ ଘଟିଥିବା ବେଳେ ସାନ ଗୁରୁତର ହୋଇଛି । ସୂଚନାନୁସାରେ, ନୟାଗଡ଼ ଜିଲ୍ଲା ନୂଆଗାଁ ବ୍ଲକ ଅନ୍ତର୍ଗତ ଦୁରୁଦୁରା ଗ୍ରାମର ଜଣେ ବ୍ୟକ୍ତି ଆଜି କୈାଣସି କାରଣରୁ ଗ୍ରାମର ବନମାଳୀ ସାହୁଙ୍କ ଘରକୁ ଯାଇଥିଲେ । ଉକ୍ତବ୍ୟକ୍ତି ଘର ଭିତରେ ବନମାଳୀଙ୍କ ସହ ଗପସପ କରୁଥିବା ବେଳେ ତାଙ୍କ ବାକରେ ଚାବି ଲାଗିଥିଲା । ଏହାର ସୁଯୋଗ ନେଇ ବନମାଳୀଙ୍କ ଦୁଇ ପୁଅ ନାରାୟଣ ସାହୁ (୧୬) ଏବଂ ବିଶ୍ୱନାଥ ସାହୁ(୧୪) ବାଇକ ଶିଖିବା ପାଇଁ ନେଇ ଚାଲି ଯାଇଥିଲେ । ଅନଭିଜ୍ଞତା କାରଣରୁ ସେ ଦୁହେଁ ବାଇକ ନେଇ ନବୀ ବନ୍ଧରେ ଯିବା ସମୟରେ ଦ୍ରୁତ ଗତି ହେତୁ ଭାରସାମ୍ୟ ହରାଇ ବସିଥିଲେ । ଫଳରେ ବାଇକ ସହ ସେମାନେ ନଦୀ ବନ୍ଧରେ ଖସି ଦୁର୍ଘଟଣା ଗ୍ରସ୍ତ ହୋଇଥିଲେ । ଖବରପାଇ ନୟାଗଡ଼ ଅଗ୍ନିଶମ ବିଭାଗ କର୍ମଚାରୀମାନେ ଘଟଣାସ୍ଥଳରେ ପହଂଚି ଦୁଇ ନାବାଳକଙ୍କୁ ଉଦ୍ଧାର କରିବା ସହ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତୀ କରିଥିଲେ । ସେମାନଙ୍କ ଅବସ୍ଥା ଗୁରୁତର ଥିବାରୁ ଡାକ୍ତର ଦୁହିଁଙ୍କୁ ଭୂବନେଶ୍ୱର ସ୍ଥାନାନ୍ତରିତ କରିଥିଲେ । ମାତ୍ର ବାଟରେ ନାରାୟଣଙ୍କ ମୃତ୍ୟୁ ଘଟିଥିବା ବେଳେ ବିଶ୍ୱନାଥଙ୍କ ଅବସ୍ଥା ସଙ୍କଟାପର୍ଣ୍ଣ ରହିଛି ।
