ନିର୍ମାଣ ଶ୍ରମିକ ସେବା ସପ୍ତାହ ଅନୁଷ୍ଠିତ
ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଶ୍ରମ ବିଭାଗ ଦ୍ୱାରା ଜିଲ୍ଲା ସ୍ତରୀୟ ନିର୍ମାଣ ଶ୍ରମିକ ସେବା ସପ୍ତାହ ପାଳିତ ହୋଇଯାଇଛି । ପଠାଣି ସାମନ୍ତ ପ୍ରେକ୍ଷାଳୟରେ ଅନୁଷ୍ଠିତ ସ୍ୱତନ୍ତ୍ର କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତି କରଣ, ମତ୍ସ୍ୟ ଓ ପ୍ରାଣୀ ସଂପଦ ଏବଂ ଉଚ୍ଚଶିକ୍ଷା ବିଭାଗ ମନ୍ତ୍ରୀ ଡ. ଅରୁଣ କୁମାର ସାହୁ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ନୟାଗଡ଼ ଜିଲ୍ଲାପାଳ ଡ. ପୋମା ଟୁଡୁ, ଯୋଜନା ବୋର୍ଡ଼ ଅଧ୍ୟକ୍ଷ ତଥା ରଣପୁର ବିଧାୟକ ସତ୍ୟ ନାରାୟଣ ପ୍ରଧାନ, ବ୍ଲକ ଅଧ୍ୟକ୍ଷା ଗୋଲାପ ଦଳବେହେରା, ଭାରପ୍ରାପ୍ତ ଜିଲ୍ଲା ଶ୍ରମ ଅଧିକାରୀ ଲୋକନାଥ ପଣ୍ଡା ପ୍ରମୂଖ ଯୋଗ ଦେଇଥିଲେ । ମୁଖ୍ୟ ଅତିଥି ତାଙ୍କ ବକ୍ତବ୍ୟରେ, ନିର୍ମାଣ ଶ୍ରମିକ ମାନଙ୍କୁ ରାଜ୍ୟ ସରକାର ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବହୁ ଗୁରୁତ୍ୱ ପ୍ରଦାନ କରିଛନ୍ତି ବୋଲି କହିବା ସହ ଯେଉଁ ନିର୍ମାଣ ଶ୍ରମିକମାନେ ଅନ୍ୟର ଘର ତିଆରି କରୁଥିବା ବେଳେ ନିଜେ ଘର ଖଣ୍ଡେ କରିବା ପାଇଁ ବଂଚିତ ରହୁଥିଲେ ଏବଂ ନିଜର ପରିବାର ପୋଷଣ ପାଇଁ ଶିକ୍ଷା ବ୍ୟବସ୍ଥା, ଦୁର୍ଘଟଣା, ଝିଅ ବାହାଘର ନେଇ ଚିନ୍ତିତ ରହୁଥିଲେ, ଆଜିର ସରକାର ସେମାନଙ୍କ ପାଇଁ ସବୁ ପ୍ରକାର ସହାୟତା ଯୋଗାଇ ଦେବା ସହ ମୁହଁରେ ହସ ଫୁଟାଇଥିବା କହିଛନ୍ତି । ମୁଖ୍ୟତଃ ମୁଖ୍ୟମନ୍ତ୍ରୀ ନିର୍ମାଣ ଶ୍ରମିକଙ୍କ ନେତା ସୁବାସ ସିଂ ରାଜ୍ୟସଭା ପଠାଇବା ପାଇଁ ଚିନ୍ତା କରିବା ନିର୍ମାଣ ଶ୍ରମିକଙ୍କ ପାଇଁ ଏକ ଶୁଭ ସଂଙ୍କେତ ବୋଲି ମୁଖ୍ୟ ଅତିଥି ଡ. ସାହୁ ପ୍ରକାଶ କରିବା ସହ ପ୍ରତ୍ୟେକ ନିର୍ମାଣ ଶ୍ରମିକ ଯେପରି ପଂଜିକୃତ୍ତ ହୋଇପାରିବେ ମୁଖ୍ୟ ଅତିଥି ଗୁରୁତ୍ୱ ଦେବାକୁ ବିଭାଗକୁ ପରାମର୍ଶ ଦେଇଥିଲେ । ନୟାଗଡ଼ ଜିଲ୍ଲାରେ ୫୪ ହଜାର ନିର୍ମାଣ ଶ୍ରମିକ ପଂଜିକୃତ୍ତ ହୋଇଥିବା ବେଳେ ସେମାନଙ୍କ ମଧ୍ୟରେ ମାତ୍ର ୧୩ ପ୍ରତିଶତ ମହିଳା ବୋଲି ଜିଲ୍ଲାପାଳ ତାଙ୍କ ବକ୍ତବ୍ୟରେ ସୂଚନା ଦେବା ସହ ମହିଳାମାନେ କିଭଳି ଅଧିକ ପଂଜିକୃତ୍ତ ହୋଇପାରିବେ ସେଥିପ୍ରତି ଧ୍ୟାନ ଦେବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ । ଏହି କାର୍ଯ୍ୟକ୍ରମରେ ଆଜି ମୋଟ ଏକ କୋଟି ୧୭ ଲକ୍ଷ ୬୯ ହଜାର ଟଙ୍କାର ସହାୟତା ରାଶି ପ୍ରଦାନ କରାଯାଇଛି । କାର୍ଯ୍ୟକ୍ରମରେ ବହୁ ମହିଳା ଓ ପୁରୁଷ ନିର୍ମାଣ ଶ୍ରମିକ ଯୋଗ ଦେଇଥିଲେ ।
