ମନମୋହିଲା ‘ଅଜୁନୀ’
ନୟାଗଡ଼,(ବାଘୁଆବାର୍ତ୍ତା ବ୍ୟୁରୋ): ଜିଲ୍ଲା ସଂସ୍କୃତି ପରିଷଦ ଏବଂ ନାଟ୍ୟଧାରା ଆୟୋଜିତ ରାଜ୍ୟ ସ୍ତରୀୟ ନାଟକ ମହୋତ୍ସବ ୨୦୨୦ ପଠାଣି ସାମନ୍ତ ପ୍ରେକ୍ଷାଳୟରେ ଉଦ୍ଯାପିତ ହୋଇଯାଇଛି । ଆଜିର ସଂନ୍ଧ୍ୟାରେ ଉଦଘାଟକ ଭାବେ ପୌରପାଳିକା କାର୍ଯ୍ୟନିର୍ବାହୀ ଅଧିକାରୀ ସନ୍ତୋଷ କୁମାର ଜେନା ଯୋଗ ଦେଇଥିବା ବେଳେ ଅନ୍ୟତମ ଅତିଥି ଭାବେ ନାଟ୍ୟଚେତନା ନିର୍ଦ୍ଦେଶକ ସୁବୋଧ ପଟ୍ଟନାୟକ ଯୋଗ ଦେଇଥିଲେ । ନାଟ୍ୟକାର ଡ. ବୈଜୟନ୍ତୀ ମିଶ୍ର, ପ୍ରମୋଦ ମହାନ୍ତିଙ୍କ ନିର୍ଦ୍ଦେଶିତ କଟକର ଶ୍ରଦ୍ଧାଞ୍ଜଳି ଅନୁଷ୍ଠାନ ପକ୍ଷରୁ ନାଟକ “ଅଜୁନୀ’ ମଞ୍ଚସ୍ଥ ହୋଇଛି । ନାଟକ ଅଜୁନୀ ସାଧାରଣ କିନ୍ନରଟିଏ । ସମାଜ ଆଖିରେ ସେ ଭୟଭୀତ ନହୋଇ ସେ କିନ୍ନର ସଂପ୍ରଦାୟରେ ନିଜକୁ ସାମିଲ କରି ଦେଇଛି । ଘରେ ରହିଛି ଗାଁ ଲୋକଙ୍କର ସେବା କରିଛି । ଘଟଣାଚକ୍ରରେ ସେ ଭଲ ପାଇବସିଛି ଅନ୍ୟଏକ କିନ୍ନର ଗଙ୍ଗାକୁ । ଦୁହେଁ ବିବାହ କରିବାକୁ ସିଦ୍ଧାନ୍ତ ନେଇଛନ୍ତି । କିନ୍ତୁ ମା’ ପାର୍ବତୀ ଏହାର ବିରୋଧ କରିଛନ୍ତି । ଆମ ସମାଜ ଦୁଇଟା କିନ୍ନରଙ୍କ ବିବାହକୁ ସହଜରେ ଗ୍ରହଣ କରିବନି ବୋଲି ସେ ଉପଲବ୍ଧି କରିଛନ୍ତି । ଗଙ୍ଗା-ଅଜୁନୀ ପ୍ରେମ ଭାଙ୍ଗିବାକୁ ଅଜୁନୀର ବିବାହ ବୟଷ୍କା ରେବ ସାଥୀରେ କରାଇ ଦେଇଛନ୍ତି । ବଡ଼ଭାଇ ରଞ୍ଜନ ଓ ଭାଉଜ ଶୋଭା ଗାଁ ଜମି ବିକି ସହରରେ ଘର କରି ରହିଛନ୍ତି ଏବଂ ସାହାଯ୍ୟ ସମବେଦନା ପରିବର୍ତ୍ତେ ଗଞ୍ଜଣା ଦେଇ ଚାଲିଛନ୍ତି । ଯୁଗକୁ ରେବ ମା’ ହେଇଛି । ଅଜୁନୀ ଭଳି ଜଣେ କିନ୍ନରଙ୍କର ବାପା ହେବା ସମ୍ଭବ? ଏହି ଅପବାଦରେ ଭାଙ୍ଗିପଡିଛି ପାର୍ବତୀ । ହୃଦ୍ଘାତରେ ମରିଯାଇଛି ପାର୍ବତୀ । ଅଜୁନୀ ବିଚରା କ’ଣ କରନ୍ତା । ଆଦରି ନେଇଛି ରେବ ଏବଂ ତା’ର ପୁଅକୁ । ନାଟକଟି ବେଶ୍ ଲୋକପ୍ରିୟ ହେବା ସହିତ ବହୁ ଦର୍ଶକ ଏହାକୁ ଉପଭୋଗ କରିଥିଲେ । ଅତିଥିମାନେ ନୟାଗଡ଼ରେ ୭ଦିନ ଧରି ଅନୁଷ୍ଠିତ ହୋଇଥିବା ରାଜ୍ୟସ୍ତରୀୟ ନାଟ୍ୟ ମହେତ୍ସବକୁ ପ୍ରଶଂସା କରିବା ସହିତ ଆୟୋଜକମାନଙ୍କୁ ପ୍ରଶଂସା କରିଥିଲେ । ନାଟ୍ୟଧାରାର ସଭାପତି ପ୍ରମୋଦ ପଟ୍ଟନାୟକ, ନିର୍ଦ୍ଦେଶକ ଡ. ବିଜୟ କୁମାର ଚୈାଧୁରୀ ଏବଂ ସଂପାଦକ ଲକ୍ଷ୍ମୀଧର ମହାପାତ୍ରଙ୍କ ପ୍ରତ୍ୟେକ୍ଷ ତତ୍ୱାବଧାନରେ ଆୟୋଜିତ ହେଉଥିବା ରାଜ୍ୟ ସ୍ତରୀୟ ନାଟକ ମହୋତ୍ସବ ଚଳିତ ମାସ ୧ ତାରିଖରୁ ଆରମ୍ଭ ହୋଇଥିବା ବେଳେ ଏହା ଆଜି ଉଦଯାପିତ ହୋଇଯାଇଛି ।
