ନୟାଗଡ଼,(ବାଘୁଆବାର୍ତ୍ତା): ଜିଲ୍ଲା ସଂସ୍କୃତି ପରିଷଦ ଏବଂ ନାଟ୍ୟଧାରା ଆୟୋଜିତ ରାଜ୍ୟ ସ୍ତରୀୟ ନାଟକ ମହୋତ୍ସବ ୨୦୨୦ ଚତୁର୍ଥ ଦିବସ ଆଜି ପଠାଣି ସାମନ୍ତ ପ୍ରେକ୍ଷାଳୟରେ ଅନୁଷ୍ଠିତ ହୋଇଯାଇଛି । ଆଜିର ସଂନ୍ଧ୍ୟାରେ ଉଦଘାଟକ ଭାବେ ନୟାଗଡ଼ ଅତିରିକ୍ତ ଜିଲ୍ଲାପାଳ ବିଧାନ ଚନ୍ଦ୍ର ରାୟ ଯୋଗ ଦେଇଥିବା ବେଳେ ଅନ୍ୟତମ ଅତିଥି ଭାବେ ସୂଚନା ଓ ଲୋକ ସଂମ୍ପର୍କ ଅଧିକାରୀ ଡ. ପ୍ରମୋଦ କୁମାର ନାୟକ, ନାଟ୍ୟକାର ଡ. ବିଜୟ କୁମାର ଶତପଥୀ ଯୋଗ ଦେଇଥିଲେ । ନୟାଗଡ଼ ମାଟି ମଞ୍ଚ ନାଟକ ପାଇଁ ଆଗାମୀ ଦିନରେ ପ୍ରସିଦ୍ଧ ହେବାକୁ ଯାଉଥିବା ନେଇ ଅତିଥି ମାନେ ବକ୍ତବ୍ୟରେ କହିବା ସହ ଏହି ମାଟିରେ ଅନେକ ମଂଚ କଳାକାର ଜନ୍ମ ଗ୍ରହଣ କରି ନାଁ କମାଇଛନ୍ତି । ଚତୁର୍ଥ ଦିବସରେ ବେଲପାହାଡ଼ର ନାଟ୍ୟ ଅନୁଷ୍ଠାନ ମିରର୍ ଥିଏଟର ଦ୍ୱାରା ପରିବେଷିତ ହୋଇଥିଲା ନାଟକ ‘ଲାଲ୍ ପାଏନ୍’ । ନାଟ୍ୟକାର ସୁବାସ ଚନ୍ଦ୍ର ପ୍ରଧାନଙ୍କ ରଚିତ ଓ ନିର୍ଦ୍ଦେଶିତ ଏହି ନାଟକକୁ ଦର୍ଶକ ବେଶ ଉପଭୋଗ କରିଥିବା ବେଳେ ଏହି ନାଟକଟିରେ ମହାନଦୀ ମୁହାଣରେ ହୋଇଥିବା ପ୍ରଳୟଙ୍କାରୀ ବନ୍ୟାରେ ଉପକୂଳ ବର୍ତ୍ତୀ ଜିଲ୍ଲାରେ ଅନେକ କ୍ଷୟକ୍ଷତି ହୋଇଥିବାର ଚିତ୍ର ଦେଖିବାକୁ ମିଳିଛି । ଏଥିସହିତ ଏହି ବିପର୍ଯ୍ୟୟରୁ ବଂଚିବା ପାଇଁ ହୀରାକୁଦ ନଦୀବନ୍ଧ ଯୋଜନାର ଋପ ନିଆଗଲା । ଏହା ଦ୍ୱାରା ସମ୍ବଲପୁର, ସୁନ୍ଦରଗଡ଼, ଝାରଶୁଗୁଡ଼ା ଓ ବରଗଡ଼ ଭଳି ଜିଲ୍ଲାର ଅନେକ ଗ୍ରାମ, ଘରଡିହ, ଭିଟାମାଟି, ମନ୍ଦିର, ସ୍ମଶାନ ହରାଇ ଜନସାଧାରଣ ବିସ୍ଥାପିତ ହେଲେ । ଏହା ସହିତ ସରକାର ଭୂଅର୍ଜ୍ଜନ ଆଇନକୁ ବିଲୋପ କରି ସ୍ୱତନ୍ତ୍ର ଭୂଅର୍ଜ୍ଜନ ଆଇନ ୧୯୮୪ କରାଗଲା । ଏହି ଆଇନ ଦ୍ୱାରା ଜନସାଧାରଣ ଏକ ଏଳର ପିଛା ୧୦ରୁ ୧୫ଟଙ୍କା କ୍ଷତି ସହିଲେ । ପ୍ରବଳ ଜନ ବିରୋଧ ହେଲା କିନ୍ତୁ ବନ୍ଧ ନିର୍ମାଣ ହେଲା । ଯେଉଁମାନେ ଜମି ହରାଇଲେ ସେମାନଙ୍କୁ ଭିକ ଦେଲା ପରି ଅଳ୍ପ କିଛି ଅର୍ଥ ଧରାଇ ଦିଆଗଲା । ଯେଉଁମାନେ ଭୂମିହୀନ ସେମାନେ ତଡ଼ା ଖାଇଲେ । ହଜାର ହଜାର ବିସ୍ଥାପିତ ଲୋକ କ୍ଷତିପୂରଣ ପାଇବାରୁ ବଂଚିତ ହେଲେ । ହଜାର ହଜାର ଲୋକଙ୍କ ରକ୍ତରୁ ଶୋଷି ନିଆ ହୋଇଥିବା ଲାଲ୍ ପାଏନ୍ ଅର୍ଥାତ ଲାଲପାଣି ଏହି ନାଟକର ମୁଖ୍ୟ ସାଂରାଶ ହୋଇଥିବା ବେଳେ ଏହା ଦର୍ଶକଙ୍କ ମନ କିଣିନେଇଛି । ନାଟ୍ୟଧାରାର ସଭାପତି ପ୍ରମୋଦ ପଟ୍ଟନାୟକ, ନିର୍ଦ୍ଦେଶକ ଡ. ବିଜୟ କୁମାର ଚୈାଧୁରୀ ଏବଂ ସଂପାଦକ ଲକ୍ଷ୍ମୀଧର ମହାପାତ୍ରଙ୍କ ପ୍ରତ୍ୟେକ୍ଷ ତତ୍ୱାବଧାନରେ ଆୟୋଜିତ ହେଉଥିବା ରାଜ୍ୟ ସ୍ତରୀୟ ନାଟକ ମହୋତ୍ସବ ଚଳିତ ମାସ ୧ ତାରିଖରୁ ଆରମ୍ଭ ହୋଇଥିବା ବେଳେ ଏହା ଆସନ୍ତା ୭ ତାରିଖରେ ଉଦଯାପିତ ହେବ ବୋଲି ଜଣାପଡ଼ିଛି ।
ରାଜ୍ୟସ୍ତରୀୟ ନାଟକ ମହୋତ୍ସବ,ଚତୁର୍ଥ ସଂନ୍ଧ୍ୟାରେ ‘ଲାଲ୍ ପାଏନ୍’
