ନୟାଗଡ଼, (ବାଘୁଆବାର୍ତ୍ଥା): ଗଣିଆ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପରିସରରେ ୨୦୧୯-୨୦ ଆର୍ଥିକ ବର୍ଷ ପାଇଁ ରୋଗୀ କଲ୍ୟାଣ ବୈଠକ ଅନୁଷ୍ଠିତ ହୋଇ ଯାଇଛି । ସ୍ୱାସ୍ଥ୍ୟକେନ୍ଦ୍ରର ଇନଚାର୍ଯ୍ୟ ଡ. ମଧୁସୂଦନ ଦାଶଙ୍କର ଅଧ୍ୟକ୍ଷତାରେ ଅନୁଷ୍ଠିତ ଉକ୍ତ ବୈଠକରେ ରୋଗୀ କଲ୍ୟାଣ ସମିତିର ଅଧ୍ୟକ୍ଷ ତଥା ବିଧାୟକ ରମେଶ ଚନ୍ଦ୍ର ବେହେରା ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଅନ୍ୟ ମାନଙ୍କ ମଧ୍ୟରେ ବିଡିଓ ସିରିୟାଲ ପଟେଲ,ଜିଲ୍ଲା ପରିଷଦ ସଭ୍ୟ ମହେଶ୍ୱର ମହାରଣା,ବିପିଏମ୍ ତୁଷାର କାନ୍ତ ସାହୁ ପ୍ରମୁଖ ମଞ୍ଚାସୀନ ଥିଲେ । ବିପିଏମ୍ ପୂର୍ବ ବୈଠଳର ବିବରଣୀ ପାଠ କରିବା ସହିତ ଚଳିତ ବର୍ଷର ବାର୍ଷିକ ବଜେଟ୍ ଉପସ୍ଥାପନ କରିଥିଲେ । ଆମ୍ବୁଲାନ୍ସ ଡ୍ରାଇଭର ପ୍ରକାଶ ପାଣିଗ୍ରାହୀ ଦୀର୍ଘ ୨୪ ମାସ ଧରି ଦରମା ନପାଇ କାର୍ଯ୍ୟ କରୁଥିବା ବେଳେ ତାଙ୍କୁ ଚାକିରିରୁ ହଟାଇବାକୁ ଯୋଜନା କରାଯାଇଥିଲା । ଗଣିଆ ଭଳି ଏକ ଉପାନ୍ତ ଅଞ୍ଚଳରେ ଆମ୍ବୁଲାନ୍ସଟିର ଗୁରୁତ୍ୱ ଥିବାରୁ ଜଣେ ଡ୍ରାଇଭର ରହିବା ନିହାତି ଆବଶ୍ୟକ ବୋଲି ସଭାରେ ଉଦବେଗ ପ୍ରକାଶ ପାଇଥିଲା । ଯଦି ଡ୍ରାଇଭର ନରହିବେ ତେବେ ଦିନକୁ ଦିନ ଆମ୍ବୁଲାନ୍ସଟି ଖତ ଖାଇବ ବୋଲି ସଭ୍ୟ ମାନେ ପ୍ରକାଶ କରିଥିଲେ । ଏପରିକି ଉକ୍ତ ଡ୍ରାଇଭରଙ୍କୁ ରୋଗୀ କଲ୍ୟାଣ ସମିତିକୁ ଆସୁଥିବା ଅର୍ଥରୁ ମାସକୁ ୮ ହଜାର ଟଙ୍କା ଲେଖାଏଁ ଦେବା ପାଇଁ ସ୍ଥିର କରାଯାଇଥିଲା । ନଭେମ୍ବର ୨୦୧୯ ପର୍ଯ୍ୟନ୍ତ ତାଙ୍କୁ ବକେୟା ପାରିଶ୍ର୍ରମିକ ଭିତ୍ତିରେ ପ୍ରଦାନ କରାଯିବା ସହିତ ନଭେମ୍ବର ଠାରୁ ଅଦ୍ୟାବଧି ମାସକୁ ୮ ହଜାର ଟଙ୍କା ଲେଖାଏଁ ୫ ମାସର ବକେୟା ଅର୍ଥ ତୁରନ୍ତ ପ୍ରଦାନ କରିବାକୁ ବିଧାୟକ ନିର୍ଦ୍ଧେଷ ଦେଇଥିଲେ । ମେଡିକାଲ ଆମ୍ବୁଲାନ୍ସରେ ନୟାଗଡ ନେଲେ ନିର୍ଦ୍ଧାରିତ ଦେୟ ଦେବା ସହିତ ଏକ ଚୁକ୍ତିପତ୍ର ପ୍ରତ୍ୟେକ ରୋଗୀଙ୍କ ପରିବାରକୁ ପ୍ରଦାନ କରିବାକୁ ନିଷ୍ପତି ହୋଇଥିଲା । ଗଣିଆ ମେଡିକାଲରେ ସ୍ତ୍ରୀ ରୋଗ ବିଶେଷଜ୍ଞ ଡାକ୍ତର ନିଯୁକ୍ତି ପାଇଁ ସଭ୍ୟ ମାନେ ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲେ । ମେଡିକାଲରେ ଥିବା ଜେନେରେଟରଟି ବାରମ୍ବାର ଖରାପ ହେଉଥିବାରୁ ଏହାକୁ ତିଆରି କରିବାକୁ ନିଷ୍ପତି ହୋଇଥିଲା । ମେଡିକାଲକୁ ଯିବା ବାଟଟି ସଂଧ୍ୟ୍ୟାହେଲେ କିଟି କିଟି ଅନ୍ଧାର ହେଉଥିବା କଥା ବିପିଏମ୍ ପ୍ରକାଶ କରିଥିବାରୁ ବିଧାୟକ ନିଜସ୍ୱ ପାଣ୍ଠିରୁ ହାଇମାକ୍ସ ଲାଇଟ ଲଗାଇବାକୁ ପ୍ରତିଶୃତି ଦେଇଥିଲେ । ମେଡିକାଲର ପ୍ରବେଶ ଦ୍ୱାରରେ ଏକ ତୋରଣ ନିର୍ମାଣ କରିବାକୁ ସଭ୍ୟ ମାନେ ପ୍ରସ୍ତାବ ଦେଇଥିଲେ । ଶିକ୍ଷା ଓ ସ୍ୱାସ୍ଥ୍ୟ କ୍ଷେତ୍ରରେ ସବୁବେଳେ ପଛୁଆ ଥିବା ଗଣିଆ ବ୍ଲକକୁ ଏହି ଦୁଇଟି ବିଭାଗରେ ଉନ୍ନତି ଆଣିବାକୁ ହେଲେ ସମସ୍ତଙ୍କର ସହଯୋଗ ଦରକାର ବୋଲି ବିଧାୟକ ସମସ୍ତଙ୍କୁ ଅନୁରୋଧ କରିଥିଲେ ।
