ଭୁବନେଶ୍ୱର, (ବାଘୁଆବାର୍ତ୍ତା): କଳିଙ୍ଗ ଷ୍ଟାଡିୟମ ବିଜୁ ପଟ୍ଟନାୟକ ସୁଇମିଂ ପୁଲରେ ଶନିବାରଠୁ ଆରମ୍ଭ ହେବାକୁ ଯାଉଛି ୪୮ତମ ଜାତୀୟ ଜୁନିୟର ଆକ୍ୱାଟିକ୍ ଚାମ୍ପିଅନସିପ୍ । ଓଡ଼ିଶା ରାଜ୍ୟ ସନ୍ତରଣ ସଂଘ ଏବଂ ରାଜ୍ୟ କ୍ରୀଡ଼ା ଓ ଯୁବସେବା ବିଭାଗର ମିଳିତ ଆୟୋଜନରେ ଏହି ଚାମ୍ପିଅନସିପ୍ ଆୟୋଜିତ ହେବ । ଏହି ୫ଦିନିଆ ପ୍ରତିଯାଗିତା ପାଇଁ କ୍ରୀଡ଼ା ବିଭାଗ ପକ୍ଷରୁ ସମସ୍ତ ବନ୍ଦୋବସ୍ତ କରାଯାଇଛି । ଖେଳାଳି ଓ ଅଫିସିଆଲମାନଙ୍କ ରହିବା, ଖାଦ୍ୟପେୟ ଓ ପ୍ରତିଯୋଗିତାର ସୁପରିଚାଳନା ଲାଗି ପଦକ୍ଷେପ ଗ୍ରହଣ କରାଯାଇଛି । ପ୍ରତିଯାଗିତାରେ ୩୦ଟି ରାଜ୍ୟ ତଥା କେନ୍ଦ୍ରଶାସିତ ଅଂଚଳରୁ ମୋଟ ୮୫୩ ଜଣ ପ୍ରତିଯୋଗୀ ଅଂଶଗ୍ରହଣ କରୁଛନ୍ତି । ସେମାନଙ୍କ ମଧ୍ୟରୁ ସନ୍ତରଣରେ ୫୨୮ ଜଣ ରହିଛନ୍ତି । ଏଥିରେ ୨୭୪ ବାଳକ ଓ ୨୫୪ ଜଣ ବାଳିକା ସାମିଲ ଅଛନ୍ତି । ସେମିତି ୱାଟରପୋଲୋରେ ମୋଟ୍ ୩୨୫ ଜଣରୁ ୧୨୦ ବାଳକ ଓ ୧୦୫ ବାଳିକା ରହିଛନ୍ତି । ଚାମ୍ପିଅନସିପ୍କୁ ପରିଚାଳନା କରିବା ପାଇଁ ୭୫ ଜଣ ବୈଷୟିକ ଅଧିକାରୀ ଏବଂ ୫୦ ଜଣ ସହଯୋଗୀ ଷ୍ଟାଫ୍ ନିୟୋଜିତ ହେବେ । ଶନିବାର ପୂର୍ବାହ୍ନରୁ ପ୍ରତିଯାଗିତା ଆରମ୍ଭ ହେବାକୁ ଥିବାବେଳେ ଅପରାହ୍ଣରେ କ୍ରୀଡ଼ା ଓ ଯୁବସେବା ମନ୍ତ୍ରୀଙ୍କ ଉପସ୍ଥିତିରେ ଏହି ପ୍ରତିଯୋଗିତାର ଉଦ୍ଘାଟନ ଉତ୍ସବ ଅନୁଷ୍ଠିତ ହେବ । ପ୍ରତିଯୋଗୀ ମାନଙ୍କୁ ଉତ୍ସାହିତ କରିବା ପାଇଁ ଚାମ୍ପିଅନସିପ୍ ଅବସରରେ କଳାହାଣ୍ଡିରୁ ଆସିଥିବା କଳାକାରଙ୍କ ଦ୍ୱାରା ଘୁମୁରା ନୃତ୍ୟ ପରିବେଷଣ କରାଯିବ ।
ଆଜିଠୁ କଳିଙ୍ଗ ଷ୍ଟାଡିୟମରେ ଜାତୀୟ ଜୁନିୟର ଆକ୍ୱାଟିକ ଚାମ୍ପିଅନସିପ୍
