ଭୂବନେଶ୍ୱର, (ବାଘୁଆବାର୍ତ୍ତା ବ୍ୟୁରୋ): ବିଶ୍ୱ ବ୍ୟାଙ୍କ ସହାୟତାରେ ଓଡ଼ିଶା ହାୟର ଏଜୁକେସନ ପୋଗ୍ରାମ ଫର୍ ଏକ୍ସିଲନ୍ସି ଆଣ୍ଡ ଇଳ୍ୟୁଇଟ କାର୍ଯ୍ୟକ୍ରମ ଅନ୍ତର୍ଗତ ଏକ ଦିଗଦର୍ଶନ କର୍ମଶାଳାରେ ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ ଯୋଗ ଦେଇ ଉଚ୍ଚଶିକ୍ଷାର ଗୁଣାତ୍ମକ ମାନର ବିକାଶ, ପ୍ରଶାସନିକ ପରିଚାଳନା ଓ ଦକ୍ଷତା ବିକାଶ ଆଦିକୁ ଗୁରୁତ୍ୱ ଦେଇ ମତ ରଖିଛନ୍ତି । ଶିକ୍ଷାରେ ବିନିଯୋଗ ହେଉଥିବା ଅର୍ଥ ହେଉଛି ମାନବ ପାଇଁ ଶ୍ରେଷ୍ଠ ପୁଞ୍ଜି ଲଗାଣ, ବିଶ୍ୱ ବ୍ୟାଙ୍କ ସହାୟତାରେ ପରିଚାଳିତ ଏହି କାର୍ଯ୍ୟକ୍ରମର ସପଳ ଋପାୟନ କରି ଶିକ୍ଷା ବ୍ୟବସ୍ଥାରେ ଉନ୍ନତୀ ଆଣିବା ସହିତ ଛାତ୍ରଛାତ୍ରୀଙ୍କୁ ଏହାର ସୁଫଳ ଯୋଗାଇ ଦେବାକୁ ମନ୍ତ୍ରୀ ଆହ୍ୱାନ ଦେଇଛନ୍ତି । ମହାବିଦ୍ୟାଳୟର ଭିତ୍ତିଭୂମୀର ବିକାଶ, ଶିକ୍ଷାନୁଷ୍ଠାନରେ ଉତ୍ତମ ବାତାବରଣ ସୃଷ୍ଟି କରିବା, ନିର୍ଦ୍ଧାରିତ ସମୟରେ ପାଠ୍ୟକ୍ରମ ଶେଷ କରି ପରୀକ୍ଷା ଫଳ ଠିକ ସମୟରେ ପ୍ରକାଶ କରିବା ଉପରେ ଗୁରୁତ୍ୱ ଦେଇଥିଲେ । ୨୦୧୮ରୁ ୨୦୨୨ ଆର୍ଥିକ ବର୍ଷ ମଧ୍ୟରେ ୧୭୦ ମିଲିୟନ ଆମେରିକିୟ ଡଲାର ବିନିଯୋଗ କରାଯିବ । ରାଜ୍ୟର ଏଗାରଟି ସରକାରୀ ବିଶ୍ୱ ବିଦ୍ୟାଳୟ, ୧୩୭ଟି ମହାବିଦ୍ୟାଳୟକୁ ଅନ୍ତଭୁକ୍ତ କରାଯାଇଛି । ପ୍ରଥମ ପର୍ଯ୍ୟାୟରେ ୭୦ଟି ମହାବିଦ୍ୟାଳୟ ସଂଯୋଗ କରାଯାଇଛି, ଦ୍ୱିତୀୟ ପର୍ଯ୍ୟାୟରେ ୩୭ଟି ଏବଂ ୧୧ଟି ବିଶ୍ୱ ବିଦ୍ୟାଳୟକୁ ଅନ୍ତଭୂକ୍ତ କରାଯାଇଛି । ଶିକ୍ଷାନୁଷ୍ଠାନର ନାକ ମାନ୍ୟତା ହାସଲ, ଛାତ୍ରଛାତ୍ରୀଙ୍କୁ ନିଯୁକ୍ତି ସୁଯୋଗ ବୃଦ୍ଧି ଦିଗରେ ଆଲୋଚନା ହୋଇଥିଲା । ଏହି କାର୍ଯ୍ୟକ୍ରମର ରାଜ୍ୟ ପ୍ରକଳ୍ପ ନିର୍ଦ୍ଦେଶକ ପରମେଶ୍ୱରନ୍ ବି. ପରିଚାଳନା କରିଥିଲେ ।
