ଭୁବନେଶ୍ୱର,(ବାଘୁଆବାର୍ତ୍ତା ବ୍ୟୁରୋ): ଅର୍ଥମନ୍ତ୍ରୀ ନିରଞ୍ଜନ ପୁଜାରୀ ବିଧାନସଭାରେ ୨୦୨୦-୨୧ ବର୍ଷ ପାଇଁ କୃଷି ବଜେଟ ଉପସ୍ଥାପନ କରିଛନ୍ତି । ଏଥିପାଇଁ ୧୯୪୦୮ କୋଟି ବ୍ୟୟ ବରାଦ କରାଯାଇଛି । କୃଷକଙ୍କ ଆୟବୃଦ୍ଧି ସହିତ କୃଷକଙ୍କର ସମୃଦ୍ଧି ଓ କୃଷିନୀତି ୨୦୨୦କୁ ଅର୍ଥମନ୍ତ୍ରୀ ଘୋଷଣା କରିଛନ୍ତି । କାଳିଆ ଯୋଜନାପାଇଁ ୩୧୯୫ କୋଟି ଟଙ୍କାର ବ୍ୟୟ ବରାଦ କରାଯାଇଛି । ସେହିପରି ଭାବେ ଓୟୁଏଟିକୁ ଉତ୍କର୍ସ କେନ୍ଦ୍ରରେ ପରିଣତ କରିବାପାଇଁ ଲକ୍ଷ୍ୟ ରହିଥିବା ବେଳେ କୃଷି ଓ ଆନୁସଙ୍ଗିକ କାର୍ଯ୍ୟ ପାଇଁ ୬୦କୋଟି ବ୍ୟୟବରାଦ ହୋଇଛି । ୨୦୨୦-୨୧ରେ ୧ଲକ୍ଷ ୮୪ ହେକ୍ଟର ଜମିକୁ ଜଳସେଚନ କରାଯିବାର ଲକ୍ଷ୍ୟ ରଖାଯାଇଛି । ସାର ଯୋଗାଣ ପାଇଁ ୧୦୦ କୋଟିର ଆବର୍ତ୍ତନ ପାଣ୍ଠି କରାଯାଇଛି । ଆଗାମୀ ୫ବର୍ଷରେ କୃଷକମାନଙ୍କର ଆୟ ଉତ୍ପାଦନ ବୃଦ୍ଧି ଉପରେ ଫୋକସ୍ ରଖାଯାଇଛି । ଜଳସଂରକ୍ଷଣ ପାଇଁ ପ୍ରମୁଖ ନଦୀରେ ଇନ୍ଷ୍ଟିନ୍ ଷ୍ଟୋରେଜ୍ ଷ୍ଟ୍ରକ୍ଚର ପାଇଁ ୫ବର୍ଷରେ ୧୨ହଜାର କୋଟି ଖର୍ଚ୍ଚ ହେବ । କୃଷିକ୍ଷେତ୍ରରେ ଜାତୀୟ ଅଭିବୃଦ୍ଧି ହାର ୩.୧ ପ୍ରତିଶତ ରହିଥିବା ବେଳେ ରାଜ୍ୟରେ ଅଭିବୃଦ୍ଧି ହାର ୪.୫ ପ୍ରତିଶତ ରହିଛି ବୋଲି ଆଜି ବଜେଟ୍ରେ ଉପସ୍ଥାପନ କରିଛନ୍ତି । ବିହନ ପାଇଁ ୧୦୦ କୋଟି ଓ ସାର ପାଇଁ ୧୦୦ କୋଟି ଟଙ୍କାର ବ୍ୟବସ୍ଥା ରହିଥିବା ବେଳେ ଚଳିତ ଆର୍ଥିକ ବର୍ଷରେ ୧.୮୪ ଲକ୍ଷ ହେକ୍ଟରକୁ ଜଳଯୋଗାଣ ପାଇଁ ବ୍ୟବସ୍ଥା ରହିଛି । ବିଗତ ୫ବର୍ଷ ମଧ୍ୟରେ ୬ଟି ବୃହତ୍ତ ଜଳସେଚନ ପ୍ରକଳ୍ପ କରାଯାଇଛି । ବନ୍ୟା ନିୟନ୍ତ୍ରଣ ଓ ଜଳ ନିଷ୍କାସନ ପାଇଁ ୧୦୬୦ କୋଟି ବ୍ୟୟ ବରାଦ କରାଯାଇଛି । ରୁଫ୍ଟପ୍ ଓ ଗ୍ରାଉଣ୍ଡ ୱାଟର ରିଚାର୍ଜ ପାଇଁ ୫ବର୍ଷରେ ୨୪୬କୋଟି ଖର୍ଚ୍ଚ ହେବ । ସେହିପରି ଭାବେ ୧୫ଗୋଟି ଜିଲ୍ଲାରେ ୧୦ହଜାର ପୋଖରୀ ନବୀକରଣ ପାଇଁ ଯୋଜନା କରାଯାଇଥିବା ଜଣାଯାଇଛି ।
