ନୟାଗଡ଼,(ବାଘୁଆବାର୍ତ୍ତା ବ୍ୟୁରୋ): କୃଷି ବିଭାଗରେ କାର୍ଯ୍ୟରତ ଠକ କର୍ମଚାରୀଙ୍କୁ ବାସାଡ୍ କରିବା ପାଇଁ ଏଗ୍ରି ଏକ୍ଷ୍ଟେସନ୍ ଆପ୍ ଆରମ୍ଭ କରାଯାଇଛି । ଏହି ଆପ୍ ଦ୍ୱାରା ଯେଉଁ କର୍ମଚାରୀମାନେ ଲୋକଙ୍କ ପାଖକୁ ନଯାଇ ଘରେବସି କାର୍ଯ୍ୟ କରନ୍ତି ସେମାନେ ଏବେ ଛାନିଆ ହୋଇପଡିଛନ୍ତି । ଏହି ଆପ୍ ଦ୍ୱାରା ପ୍ରତ୍ୟେକ କର୍ମଚାରୀ କେଉଁ ସମୟରେ କେଉଁ ଗ୍ରାମ ପଞ୍ଚାୟତ କିମ୍ବା କେଉଁ ଗ୍ରାମ ଏବଂ କେଉଁ ଲୋକ ସହିତ କ\’ଣ କାର୍ଯ୍ୟ କରୁଛନ୍ତି ଧରାପଡିଯିବେ । ମିଛ ଟୁର୍ ପ୍ରୋଗ୍ରାମ୍ ଦେଇ ଆଉ ଖସିପାରିବେ ନାହିଁ । ରାଜ୍ୟ ସରକାରଙ୍କ ମୋ-ସରକାର ଓ ୫-ଟି ଦ୍ୱାରା ପରିଚାଳିତ ଏଗ୍ରି ଏକ୍ଷ୍ଟେନ୍ସନ ଆପ୍କୁ ଆଜି ନୟାଗଡ଼ ଗ୍ରାମ୍ୟଉନ୍ନୟନ ବିଭାଗ ସୃଜନ ଗୃହରେ ଜିଲ୍ଲାପାଳ ଡ. ପୋମା ଟୁଡୁ ଯୋଗଦେଇ ଏ ସମ୍ପର୍କରେ ସମ୍ପୂର୍ଣ୍ଣ ତଥ୍ୟ ରଖିଛନ୍ତି । କୃଷିବିଭାଗ, ଉଦ୍ୟାନ ବିଭାଗ, ମତ୍ସ୍ୟ, ମୃତ୍ତିକା ଓ ପ୍ରାଣୀସମ୍ପଦ ବିଭାଗର ସମସ୍ତ କର୍ମଚାରୀମାନଙ୍କୁ ଏହି ଆପ୍ ସମ୍ବନ୍ଧରେ ସୂଚନା ପ୍ରଦାନ କରାଯାଇଛି । କାର୍ଯ୍ୟରେ ଖିଲାପ କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । କୃଷି ବିଭାଗର ଏହି ଆପ୍କୁ ନେଇ ଏବେ ସମସ୍ତ କର୍ମଚାରୀମାନଙ୍କ ମନରେ ଛାନିଆ ପଶିଯାଇଛି ।
