ନୟାଗଡ଼,(ବାଘୁଆବାର୍ତ୍ତା ବ୍ୟୁରୋ): ବିଶ୍ୱ କୁଣ୍ଠରୋଗ ନିରାକରଣ ତଥା ଭେଦଭାବ ଦୁରୀକରଣ ସମ୍ପର୍କରେ ଏକ ସଚେତନତା ଦିବସ ସ୍ଥାନୀୟ ପଠାଣି ସାମନ୍ତ ଅଡିଟୋରିୟମ୍ରେ ପାଳନ କରାଯାଇଛି । ଜିଲ୍ଲା ସାମାଜିକ ସୁରକ୍ଷା ବିଭାଗ ଦ୍ୱାରା ଆୟୋଜିତ କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଜିଲ୍ଲପାଳ ଡ. ପୋମା ଟୁଡୁ ଯୋଗଦେଇଥିବା ବେଳେ ମୁଖ୍ୟବକ୍ତା ଭାବେ କୁଣ୍ଠ ନିରାକରଣ ଅଧିକାରୀ ଡ. ସୁବ୍ରତ ଦାସ, ଜିଲ୍ଲା ସମାଜମଙ୍ଗଳ ଅଧିକାରୀ ପ୍ରଭାତ କୁମାର ସାହୁ, ଜିଲ୍ଲା ଶିକ୍ଷାଧିକାରୀ ଲକ୍ଷ୍ମୀନାରାୟଣ ବେହେରା, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ଡ. ପ୍ରମୋଦ କୁମାର ନାୟକ, ସାମ୍ବାଦିକ ରାମକୃଷ୍ଣ ରଥ ପ୍ରମୁଖ ଯୋଗ ଦେଇଥିଲେ । ଏହି ଅବସରରେ ଏକ ସଚେତନତା ଶୋଭାଯାତ୍ରା ସ୍ଥାନୀୟ ଜଗନ୍ନାଥ ମନ୍ଦିର ଠାରୁ ବାହାରି ପଠାଣୀ ସାମନ୍ତ ଅଡିଟୋରିୟମ୍ଠାରେ ପହଞ୍ଚିଥିଲା । ଏହି ଅବସରରେ ଅତିରିକ୍ତ ଜିଲ୍ଲାପାଳ ବିଧାନଚନ୍ଦ୍ର ରାୟ, ଉପଜିଲ୍ଲାପାଳ ଲଗ୍ନଜିତ୍ ରାଉତ, ଏହି ଶୋଭାଯାତ୍ରାକୁ ଉଦ୍ଘାଟନ କରିଥିଲେ । ମୁଖ୍ୟଅତିଥି ଆଜିର ଦିବସରେ କୁଷ୍ଠକୁ ନଡରିବା ପାଇଁ ପରାମର୍ଶ ଦେଇଥିଲେ । ସଚେତନତା ମାଧ୍ୟମରେ କୁଷ୍ଠରୋଗର ନିରାକରଣ ହୋଇପାରିବ । କୁଷ୍ଠ ଏକ ଅଭିଶପ୍ତ ରୋଗ ନୁହେଁ । ସମସ୍ତେ ସଚେତନ ରହିଲେ ଏହି ରୋଗ ଆପେ ଆପେ ଦୂର ହୋଇପାରିବ । ଏହି ଅବସରରେ ୧୧୪ଜଣ କୁଷ୍ଠରୋଗୀଙ୍କୁ ୧୦ହଜାର ଟଙ୍କାର କିଟ୍ ପ୍ରଦାନ କରାଯାଇଥିଲା । ସ୍କୁଲ ଛାତ୍ରଛାତ୍ରୀଙ୍କ ଦ୍ୱାରା ବିଭିନ୍ନ ପ୍ରତିଯୋଗିତା କରାଯାଇ ଛାତ୍ରଛାତ୍ରୀମାନଙ୍କୁ ପୁରସ୍କୃତ କରାଯାଇଥିଲା ।
