ଓଲଟିଲା ବସ, ୧ ମୃତ ୧୫ ଆହାତ

ନୟାଗଡ଼,(ବାଘୁଆବାର୍ତ୍ତା): ନୟାଗଡ ଜିଲ୍ଲାର ପ୍ରମୁଖ ପର୍ଯ୍ୟଟନସ୍ଥଳୀ ପ୍ରଭୁ ଶ୍ରୀ ନୀଳମାଧବଙ୍କ କ୍ଷେତ୍ର କଂଟିଲୋକୁ ପର୍ଯ୍ୟଟକମାନଙ୍କୁ ନେଇ ଆସିଥିବା ଏକ ମିନି ଯାତ୍ରୀବାହୀ ବସ ରବିବାର ଅପରାହ୍ନ ୪ଟାରେ ଖଣ୍ଡପଡା-ନୟାଗଡ ପୂର୍ତବିଭାଗ ରାସ୍ତାର କଇଁଥପଲ୍ଲୀ ଗ୍ରାମ ନିକଟରେ ଦୁର୍ଘଟଣାଗ୍ରସ୍ତ ହୋଇ ରାସ୍ତା ପାଶ୍ୱର୍କୁ ଓଲଟି ପଡିଛି । ଫଳରେ ଉକ୍ତ ଯାତ୍ରୀବାହୀ ବସରେ ଯାତ୍ରା କରୁଥିବା ୩୦ ଜଣ ପର୍ଯ୍ୟଟକଙ୍କ ମଧ୍ୟରୁ ୧୫ରୁ ଉର୍ଦ୍ଧ ଆହତ ହୋଇଥିବା ବେଳେ ଜଣଙ୍କର ଘଟଣାସ୍ଥଳରେ ଅକାଳ ମୃତ୍ୟୁ ହୋଇଥିବା ଜଣାଯାଇଛି । ମୃତ ବ୍ୟକ୍ତିଙ୍କ ନାମ ରାମଚନ୍ଦ୍ର ରଣା(୫୫) ବୋଲି ଜଣାପଡିଛି । ଯାତ୍ରୀବାହୀ ଗାଡି ତଳୁ ରାମଚନ୍ଦ୍ରଙ୍କ ମୃତଦେହକୁ ଖଣ୍ଡପଡା ପୋଲିସ ଉଦ୍ଧାର କରି ବ୍ୟବଚ୍ଛେଦ ନିମନ୍ତେ ଖଣ୍ଡପଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଇଥିବା ବେଳେ ଦୁର୍ଘଟଣାରେ ଆହତ ଅନ୍ୟ ସମସ୍ତଙ୍କୁ ଆଶୁ ଚିକିତ୍ସା ନିମନ୍ତେ ଖଣ୍ଡପଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତୀ କରାଯାଇଛି । ତନ୍ମଧ୍ୟରୁ ଗୁରୁତର ଆହତ ବ୍ୟକ୍ତିମାନଙ୍କୁ ନୟାଗଡ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଯାଇଛି । ଦୁର୍ଘଟଣାରେ ମୃତ ଓ ଆହତ ସମସ୍ତ ପର୍ଯ୍ୟଟକଙ୍କ ଘର ଗଞ୍ଜାମ ଜିଲ୍ଲାର ଛତ୍ରପୁର ଥାନା ଅଧିନ ସୁନ୍ଦରପୁର ଗ୍ରାମରେ ବୋଲି ଜଣାପଡିଛି । ଦୁର୍ଘଟଣାରେ ଆହତ ଅଭିମନ୍ୟୁ ନାୟକ(୩୬)ଙ୍କ ସୁଚନାକ୍ରମେ ଶନିବାର ରାତି ୨ଟାରୁ ଏକ ମିନି ଯାତ୍ରୀବାହୀ ବସ୍ ଯୋଗେ ସମସ୍ତ ପର୍ଯ୍ୟଟକ କଂଟିଲୋ ଅଂଚଳକୁ ବୁଲି ଆସିଥିଲେ । କଂଟିଲୋରେ ପ୍ରଭୁ ଶ୍ରୀ ନୀଳମାଧବଙ୍କୁ ଦର୍ଶନ କରି ଅପରାହ୍ନରେ ଛତ୍ରପୁର ଅଭିମୁଳେ ଫେରୁଥିବା ବେଳେ ଏଭଳି ଅଘଟଣ ଘଟିଥିବା ଜଣାପଡିଛି । ତେବେ ଗାଡି ଚାଳକଙ୍କ ବେପରୁଆ ଗାଡି ଚାଳନା ଯୋଗୁଁ ଏଭଳି ଦୁର୍ଘଟଣା ଘଟିଥିବା ପ୍ରତ୍ୟେକ୍ଷଦର୍ଶୀଙ୍କଠାରୁ ପ୍ରକାଶ । ଦୁର୍ଘଟଣାଗ୍ରସ୍ତ ଯାତ୍ରୀବାହୀ ବସ ଚାଳକ ବୃନ୍ଦାବନ ସାହୁକୁ ଖଣ୍ଡପଡା ପୋଲିସ ଥାନାରେ ଅଟକ ରଖି ପଚରା ଉଚରା କରୁଛି । ଏହି ଦୁଃଖଦ ଘଟଣାକୁ ନେଇ ସାଧାରଣରେ ଶୋକର ଛାୟା ଖେଳି ଯାଇଛି ।