ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଅଙ୍ଗନୱାଡ଼ି କର୍ମୀ ଓ ସହାୟିକାଙ୍କ ଜିଲ୍ଲା କମିଟି ବୈଠକ ନୟାଗଡ଼ ବ୍ଲକ ସମ୍ମିଳନୀ କକ୍ଷରେ ଆଜି ଅନୁଷ୍ଠିତ ହୋଇଯାଇଛି । ଜିଲ୍ଲା ସଭାନେତ୍ରୀ ଜ୍ୟୋତ୍ସାମୟୀ ପଣ୍ଡାଙ୍କ ସଭାପତିତ୍ୱରେ ଅନୁଷ୍ଠିତ ଏହି ବୈଠକରେ ଜିଲ୍ଲାର ୮ଟି ବ୍ଲକର ସଭାନେତ୍ରୀ ଓ ସଂପାଦିକ ମାନେ ଯୋଗ ଦେଇଥିଲେ । ଏହି ବୈଠକରେ ସରକାର ଛାତ୍ରଛାତ୍ରୀମାନଙ୍କୁ ଅଣ୍ଡା ଦେବା ପାଇଁ ୫ଟଙ୍କା ଅର୍ଥ ରାଶି ପ୍ରଦାନ କରୁଥିବା ବେଳେ ଅଣ୍ଡାର ବଜାର ଦର ୬ ଟଙ୍କା ରହିଥିବା ନେଇ ସରଗରମ ଆଲୋଚନା ହୋଇଥିଲା । ଉଚ୍ଚା ଦରରେ ଅଣ୍ଡା କିଣି ଛାତ୍ରଛାତ୍ରୀମାନଙ୍କୁ ଯୋଗାଇ ଦେବା ଆଉ ସମ୍ଭବ ପର ନୁହେଁ ବୋଲି ମତ ପ୍ରକାଶ ପାଇଥିଲା । ଅଙ୍ଗନୱାଡ଼ି କର୍ମୀ ଓ ସହାୟିକାଙ୍କ ଉପରେ ସରକାର ବିଭିନ୍ନ କାର୍ଯ୍ୟ ଲଦି ଦେଉଥିବା ବେଳେ ପାରିଶ୍ରମିକ ଦେବା ବେଳକୁ ପଛଘୁଂଚା ଦେଉଥିବା ନେଇ ଆଲୋଚନା ହେଇଛି । ସଠିକ ସମୟରେ ଦରମା ଦିଆଯାଉନଥିବାରୁ ବୈଠକରେ ଅସନ୍ତୋଷ ପ୍ରକାଶ ପାଇଛି । ଏହି ବୈଠକରେ ମେନକା ପଲେଇ, ରଞ୍ଜୁରାଣୀ ସାହୁ, ବିନୋଦିନି ଦେଇ, ବବିତା ସାହୁ, ରାଜ୍ୟ କୋଷାଧ୍ୟକ୍ଷା ସୁଶ୍ରୀ ସଂଗୀତା ଆଲୋଚନାରେ ଅଂଶ ଗ୍ରହଣ କରିଥିଲେ । ସେହିଭଳି ଅତିଥି ଭାବେ ରାଜ୍ୟ ବିଜୁ ଶ୍ରମିକ ସାମ୍ମୁଖ୍ୟ ସହ ସଂପାଦକ ଶ୍ରୀକାନ୍ତ ପଟ୍ଟନାୟକ ଯୋଗ ଦେଇ ସମସ୍ୟା ସଂମ୍ପର୍କରେ ଜିଲ୍ଲା ପ୍ରଶାସନ ସହ ଆଲୋଚନା କରାଯାଇ ସମାଧାନ କରିବାକୁ ଚେଷ୍ଟା କରାଯିବ ବୋଲି ମତ ଦେଇଥିଲେ । ଏଥି ସହିତ ପ୍ରତି ବ୍ଲକରେ କମିଟି ଗଠନ କରାଯାଇ ନିୟମିତ ବୈଠକ କରିବା ସହ ଜିଲ୍ଲା କମିଟି ସହ ଯୋଗସୁତ୍ର ରଖିବାକୁ ଶ୍ରମିକ ନେତା ଶ୍ରୀଯୁକ୍ତ ପଟ୍ଟନାୟକ ପରାମର୍ଶ ଦେଇଥିଲେ । ଏହି ବୈଠକରେ ଅନ୍ୟମାନଙ୍କ ମଧ୍ୟରେ ରୂପ ସେଠୀ, ମମତା ରଣା, ସଙ୍ଗୀତା କର ପ୍ରମୂଖ ଯୋଗ ଦେଇଥିଲେ ।
ଅଙ୍ଗନୱାଡ଼ି କର୍ମୀ ଓ ସହାୟିକା ସାମୂଖ୍ୟର ଜିଲ୍ଲା କମିଟି ବୈଠକ
